នាយករដ្ឋមន្ត្រីថៃលោក Prayut Chan-O-cha បាននិយាយនៅថ្ងៃច័ន្ទនេះថា ប្រទេសថៃចាំបាច់ត្រូវគ្រប់គ្រងឲ្យបាននូវ «ការតវ៉ាខុសច្បាប់»។ លោកថ្លែងដូច្នេះនៅពេលដែលលោកបានបើកសម័យប្រជុំសភាពិសេសមួយដើម្បីពិភាក្សាអំពីរឿងបាតុកម្មគាំទ្រលទ្ធិប្រជាធិបតេយ្យអស់ជាច្រើនខែកន្លងមកនៅក្នុងប្រទេស។
លោក Prayut ដែលជាអតីតមេបញ្ជាការយោធាដែលបានធ្វើរដ្ឋប្រហារឆ្នាំ ២០១៤ បានប្រឈមនូវសម្ពាធកើនឡើងពីបាតុកររាប់ម៉ឺននាក់ក្នុងពេលប៉ុន្មានសប្តាហ៍ថ្មីៗនេះ ដែលទាមទារឲ្យលោកចុះចេញពីតំណែង។
ការតវ៉ាដែលដឹកនាំដោយនិស្សិត កំពុងទាមទារឲ្យលោក Prayut ចុះចេញពីតំណែង ឲ្យតាក់តែងឡើងវិញនូវរដ្ឋធម្មនុញ្ញដែលព្រាងដោយយោធា និងឲ្យមានការបញ្ចប់ការរំខានយាយីរបស់រដ្ឋាភិបាលលើអ្នកនយោបាយប្រឆាំង។
លោក Prayut បាននិយាយដូច្នេះថា៖ «ទោះបីជាប្រជាពលរដ្ឋមានសេរីភាពនៅក្នុងការតវ៉ាផ្អែកលើរដ្ឋធម្មនុញ្ញក៏ដោយ ក៏អាជ្ញាធរចាំបាច់ត្រូវបង្ក្រាបការតវ៉ាខុសច្បាប់»។
លោកបានបន្ថែមថា៖ «យើងមិនចង់ឃើញការប៉ះទង្គិចគ្នា ឬកុបកម្មនៅក្នុងប្រទេសនោះទេ»។ លោកបានចោទប្រកាន់បាតុករមួយចំនួនថាបានធ្វើ «សកម្មភាពមិនត្រឹមត្រូវ»។
ទោះបីជាលោក Prayut បានទទួលស្គាល់នូវការទាមទាររបស់បាតុករនៅក្នុងសុន្ទរកថាបើកសម័យប្រជុំពិសេសរបស់សភានេះក៏ដោយ ក៏សម័យប្រជុំសភាដែលមានរយៈពេល ២ ថ្ងៃនេះ មិនបានដាក់បញ្ហានេះនៅក្នុងរបៀបវារៈនោះទេ៕
