ភ្ជាប់​ទៅ​គេហទំព័រ​ទាក់ទង

របប​យោធា​ថៃ​បង្ក្រាប​បញ្ញវន្ត​និង​សកម្មជន​ដែល​និយាយ​ឥត​សំចៃ


បាតុករ​ថៃ​ដែល​ប្រឆាំង​រដ្ឋប្រហារ​កាន់​បដា​ក្នុង​អំឡុង​ការ​តវ៉ា​មួយ​នៅ​ខាង​ក្រៅ​បរិវេណ​ផ្សារ​ទំនើប​មួយ​នៅ​ក្រុង​បាងកក​កាល​ពី​ថ្ងៃ​​ទី​២៤ ខែ​ឧសភា ឆ្នាំ​២០១៤។
របប​យោធាគ្រប់គ្រង​ប្រទេស​ថៃ​បានកោះ​ហៅ​និង​ឃុំខ្លួនសកម្មជន​និង​និង​បញ្ញវន្ត​នៅ​ក្នុង​មួយ​សប្តាហ៍​ក្រោយ​ដែល​ក្រុម​យោធា​នេះ​បាន​ចូលកាន់កាប់​អំណាច​តាម​រយៈ​រដ្ឋប្រហារ។ ក្រុម​យោធា​និយាយ​ថា ​ខ្លួន​កំពុង​ធ្វើ​របៀបវារៈ​កែទម្រង់​មួយ​ដែល​មាន​គោលដៅដោះស្រាយ​វិបត្តិ​ជាប់​គាំងនយោបាយរបស់​ប្រទេស​ថៃ​រយៈ​ពេល​ជាង​៦​ខែ​មក​នេះ។

ចាប់​តាំង​ពី​ក្រុម​យោធា​នៃ​ប្រទេស​ថៃ គឺ​ក្រុមប្រឹក្សា​រក្សាសន្តិភាពនិង​សណ្តាប់​ធ្នាប់​ជាតិបាន​កាន់​កាប់​អំណាច​មក បាតុករ​ប្រឆាំង​រដ្ឋប្រហារ​រាប់​រយ​នាក់​បាន​ប្រមូល​ផ្តុំ​គ្នា​នៅ​រាជធានី​បាងកក​ ក្នុង​ព្រឹត្តិការណ៍​ជួប​ជុំ​គ្នា​រៀបចំ​ភ្លាមៗ​តាម​ការ​ផ្ញើ​សារតាម​ទូរស័ព្ទ​និង​តាមបណ្តាញ​សង្គម។

ក្រុម​ទាហាន​ត្រូវ​គេ​បញ្ជូន​ឲ្យទៅ​ប្រឈម​នឹងក្រុម​បាតុករ​និង​ដើម្បីបោស​សម្អាត​ផ្លូវ​នានា ហើយ​ពេល​ខ្លះ​ពួក​គេ​បាន​ចាប់​ខ្លួន​ពួក​បាតុករ​ចំពោះ​ការ​ប្រឆាំង​នឹង​បំរាម​ហាម​មិន​ឲ្យ​ជួប​ជុំ​គ្នា។ របប​យោធា​ក៏​បាន​កោះហៅ​មន្ត្រី​នៃ​រដ្ឋាភិបាល​ដែល​ត្រូវ​បណ្តេញ​ចេញ​ សកម្មជន និង​ក្រុម​បញ្ញវន្ត ហើយ​ឃុំ​ខ្លួន​ពួក​គេជា​ច្រើន​ដោយ​មិនមាន​កាល​កំណត់​ នៅ​ឯ​ទីតាំង​សម្ងាត់​មួយ។

ពួក​គេ​ភាគ​ច្រើន​បាន​គោរព​បទ​បញ្ជា​ ហើយ​បាន​ទៅ​បង្ហាញ​ខ្លួន​នៅ​ការិយាល័យ​យោធា។ ប៉ុន្តែ​មាន​សកម្មជន​មួយ​ចំនួន ដូច​ជា​លោក Sombat Boonngamanong សកម្មជន​ចលនា«អាវ​ក្រហម»​ដែល​គាំទ្រ​រដ្ឋាភិបាល បាន​បដិសេធ​មិន​គោរព​តាម​បទបញ្ជា​នេះ។

ផ្ទុយ​ទៅ​វិញ លោក Sombat ថ្លែង​ថា អាជ្ញាធរ​អាច​មក​តាមរក​លោក​នៅ​តាមហាងអាហារ​ McDonald’s របស់​ក្រុង​បាងកក ដែល​នៅ​ទី​នោះ​មាន​ក្រុម​បាតុករ​ប្រមូល​ផ្តុំ​ភ្លាមៗ​មិន​ឲ្យ​ដឹង​មុន​ ពាក់​របាំង​មុខ​ដែល​មាន​រូប​លោក Sombat។ អ្នក​នាង Chatuporn ជា​បាតុករ​ម្នាក់។ អ្នក​នាង​និយាយ​ថា ​យុទ្ធសាស្ត្រ​ប្រមូល​ផ្តុំ​ថ្មី​នេះ​កើត​មាន​ឡើង​ក្រោយ​ពេល​ដែល​មេដឹកនាំ​នយោបាយ​របស់​ពួក​គេ​ជា​ច្រើន​នាក់​ត្រូវ​បាន​ចាប់​ខ្លួន។

អ្នក​នាង Chatuporn​ ពន្យល់​ថា៖ «ដោយសារ​លោក Sombat លេង​ល្បែងពាក់​មុខ​ជាមួយ​មនុស្ស​គ្រប់​រូប គឺ​ថា​ប្រសិន​បើ​អ្នក​ចង់​ចាប់​ខ្លួន​គាត់ សូម​ទៅ​ចាប់​ខ្លួន​គាត់​នៅ​គ្រប់កន្លែង។ គឺ​ពួក​យើង​មាន​នៅ​គ្រប់​ទី​កន្លែង គឺ​អាច​មាន​ជា​បាតុកម្ម​ភ្លាមៗ​យ៉ាង​ដូច្នេះ។ ព្រោះ​ពួក​គេ​ចង់​ចាប់​មេដឹកនាំ​ទាំង​អស់​ ពួក​គេ​បាន​ចាប់​នាយករដ្ឋមន្ត្រី​របស់​យើង​និង​បាន​ឃុំ​ខ្លួនគាត់​នៅ​កន្លែង​សម្ងាត់​មួយ​ ប៉ុន្តែ​លោក Sombat ជា​អ្នក​ដែល​ពួក​គេ​ចាប់​មិន​បាន»។

ក្រៅ​ពី​លោក Sombat ក្រុម​យោធា​ក៏​បាន​កោះហៅ​និង​ចាប់​ខ្លួន​អ្នក​កាសែត​និង​បញ្ញវន្ត​ផង​ដែរ ក៏​ដូច​ជា​ចាប់​អ្នក​ដឹកនាំ​នយោបាយ​ណា​ដែល​ប្រឆាំង​នឹង​រដ្ឋប្រហារ។

មេដឹកនាំ​រដ្ឋប្រហារ​និង​ជា​មេបញ្ជាការ​កងទ័ព គឺ​លោក Prayuth Chan-ocha បាន​ថ្លែង​ថា ​លោក​សង្ឃឹម​ថា​ការ​គ្រប់គ្រង​របស់​យោធា​នឹង​បញ្ចប់​វិបត្តិ​នយោបាយ​ដ៏​រ៉ាំ​រ៉ៃ​របស់​ប្រទេស​ថៃ។ វិបត្តិ​នេះ​កើត​ឡើង​ដោយ​សារ​រដ្ឋាភិបាល​ដែល​ជាប់​តាម​ការ​បោះឆ្នោត​ដោយ​ប្រជាធិបតេយ្យ​ ហើយ​នឹង​ក្រុមអ្នក​ប្រឆាំង​ មិន​អាច​ឈាន​ដល់​ការ​ធ្វើ​សម្បទាន​ណា​មួយ ដែល​នាំ​ឲ្យ​មាន​បាតុកម្ម​រាប់​ខែ​ដែលរាំងស្ទះ​រាជធានី​បាងកក។

លោក Werachon Sukhondhapatipak អ្នក​នាំពាក្យ​រង​របស់​យោធា​ថៃ​និយាយ​ថា យោធា​នឹង​លះបង់​អំណាច​គ្រប់គ្រង​ប្រទេស​វិញ នៅ​ពេល​ដែល​ខ្លួន​បាន​ដោះស្រាយ​បញ្ហា​ទាំង​ឡាយ។

«គឺ​សន្តិសុខ សន្តិភាព និង​សណ្តាប់​ធ្នាប់។ សន្តិភាព​និង​សណ្តាប់ធ្នាប់​ ពលរដ្ឋថៃ​នឹង​ចុះ​សម្រុង​គ្នា ហើយ​វា​ត្រូវ​តែ​ជា​សន្តិភាពនិង​សណ្តាប់​ធ្នាប់យូរ​អង្វែង មិនមែន​គ្រាន់​តែ​សន្តិភាព​បណ្តោះអាសន្ន​ប៉ុណ្ណោះ​ទេ។ ហើយ​បន្ទាប់​ពី​នោះ​មកទើប​យើង​នឹង​បន្ត​និយាយ​គ្នា​អំពី​ការ​បោះឆ្នោត។ ប៉ុន្តែ​សម្រាប់​ពេល​នេះ យើង​ត្រូវ​ដោះស្រាយ​បញ្ហា​ទាំង​អស់របស់​ប្រទេស​នេះ ជា​ពិសេស​បញ្ហា​ចម្បងៗ»។

អ្នក​នាំ​ពាក្យ​នោះបាន​សន្យា​ថា មេ​ដឹកនាំ​នយោបាយ​ដែល​កំពុង​ត្រូវ​ឃុំ​ខ្លួន ​នឹង​ត្រូវ​ដោះលែង​វិញនៅ​ពេល​ដែល​ទី​ផ្លូវ​សាធារណៈ​ចាប់​មាន​សណ្តាប់​ធ្នាប់​ឡើង​វិញ ប៉ុន្តែ​លោក​មិន​បាន​បញ្ជាក់លម្អិត​ថា​ នឹង​មាន​អ្វី​កើត​ឡើង​ចំពោះ​អ្នក​ត្រូវ​ឃុំ​ខ្លួន​ដទៃ​ទៀត​ទេ។

លោក Pavin Chachavalpongpun ជា​អ្នក​វិភាគ​នយោបាយនិង​ជា​អតីត​អ្នក​ការទូត​មួយ​រូប​ស្ថិត​នៅ​ក្នុង​ចំណោមមនុស្ស​ដែល​ត្រូវ​យោធា​កោះហៅ​ឲ្យ​ទៅ​បង្ហាញ​ខ្លួន។ ប៉ុន្តែ​លោក​ថ្លែង​ថា លោក​មិន​បាន​ឆ្លើយ​តប​តាម​ការ​បញ្ជា​នោះ​ទេ ដោយ​សារ​លោក​មិន​ទទួល​ស្គាល់​ភាព​ស្រប​ច្បាប់​នៃ​រដ្ឋប្រហារ​នេះ។ លោក​ថាការ​កោះហៅ​ជា​ការ​រំលោភ​សេរីភាព​នៃ​ការ​ស្រាវជ្រាវ​និង​ជា​ការ​ប៉ុនប៉ង​គំរាម​កំហែង។

លោក Pavin និយាយ​ថា៖ «នេះ​ជា​រដ្ឋប្រហារ​លើក​ទី​១៩​ហើយ។ ការណ៍​ដែល​ពួក​គេ​ចាប់​ផ្តើម​យាយីបញ្ញវន្ត​និង​អ្នក​ស្រាវជ្រាវ​គឺ​ជា​អ្វី​ដែល​ថ្មី​មិន​ធ្លាប់​មាន​ពី​មុន។ គឺ​ដំបូង​បំផុត​ពួក​គេ​ព្យាយាម​កំណត់​ខ្លឹមសារ​ដែល​ពលរដ្ឋបញ្ជូន​ទៅ​វិញ​ទៅ​មក​ទូទាំង​ប្រទេស។ ខ្ញុំ​គិត​ថា​ក្រុម​បញ្ញវន្ត​អាច​គំរាម​កំហែង​ដល់​តួនាទី​អំណាច​របស់​ក្រុម​អ្នក​ធ្វើ​រដ្ឋប្រហារ»។

លោក Pavin ជឿ​ថា​ ដំណើរ​ការ​កោះហៅ​អ្នក​ដែល​និយាយ​ឥត​សំចៃ​ ដោយ​មាន​ការ​គំរាមអំពី​ការ​កាត់​ទោសនៅ​ពេល​អនាគត​នៅក្រោម​ច្បាប់​អាជ្ញាសឹក​និង​ច្បាប់ប្រមាថ​ព្រះ​ជេស្តា​ផង នឹង​កាន់​តែ​ធ្វើ​ឲ្យ​រដ្ឋប្រហារ​នេះ​បាត់​បង់​ភាព​ស្រប​ច្បាប់​ថែម​ទៀត។ លោក Pavin និយាយ​ថា រឿង​នេះនឹង​កាន់​តែ​លើក​ទឹក​ចិត្ត​ឲ្យ​មាន​ការ​រិះគន់​ចំពោះ​របប​យោធា​ថែម​ទៀត៕

​ប្រែសម្រួល​ដោយ សឹង សុផាត
XS
SM
MD
LG