មន្ត្រីសុខាភិបាលថៃបាននិយាយ កាលពីថ្ងៃព្រហស្បតិ៍ថា ប្រទេសថៃនឹងបន្ធូរបន្ថយ នីតិវិធីប្រឆាំងនឹង វីរុសកូរ៉ូណា ដើម្បីអនុញ្ញាតឱ្យអ្នកជំងឺពីបរទេសមកទទួលការព្យាបាលបន្ថែមទៀត ចាប់ពីខែក្រោយ បន្ទាប់ពីមានការអំពាវនាវពីមន្ទីរពេទ្យដែលចង់ព្យាបាលអតិថិជនមកពីក្រៅប្រទេស។
ប្រទេសថៃគឺជាមជ្ឈមណ្ឌលដ៏សំខាន់សម្រាប់វិស័យទេសចរណ៍វេជ្ជសាស្ត្រ ទាក់ទាញអ្នកជម្ងឺមកពីតំបន់អាស៊ីមជ្ឈឹមបូព៌ា និងប្រទេសផ្សេងទៀត។ យោងតាមទិន្នន័យរបស់រដ្ឋាភិបាល បានឱ្យដឹងថា នៅក្នុងឆ្នាំ២០១៩ ប្រទេសនេះមានអត្រាអ្នកជំងឺបរទេសចំនួន ៦៣ម៉ឺន ២ពាន់នាក់ ដែលបានចំណាយប្រាក់ចំនួន ៣,៩ពាន់លានដុល្លារ។ ប៉ុន្តែ ការរឹតត្បិតក្នុងការប្រយុទ្ធប្រឆាំងនឹងវីរុសនេះ បានបន្ថយចំនួនអ្នកជំងឺបរទេសជាទូទៅ ចាប់តាំងពីខែមេសា។
មន្ត្រីសុខាភិបាលជាន់ខ្ពស់ លោក Tares Krassanairawiwong បានប្រាប់រ៉យទ័រថា មានអ្នកជំងឺបរទេសចំនួនតែ ១៧២នាក់ប៉ុណ្ណោះ ដែលត្រូវបានអនុញ្ញាតចាប់តាំងពីមានការបន្ធូរបន្ថយវិធានការនេះ នៅក្នុងខែកក្កដា។ ប៉ុន្តែឥឡូវនេះមណ្ឌលសុខភាពបន្ថែមទៀតនឹងត្រូវបានអនុញ្ញាតឱ្យទទួលយកអ្នកជំងឺបរទេស។
ប្រធានប្រតិបត្ដិមន្ទីរពេទ្យ Thonburi Healthcare Group Pcl លោក Boon Vasin បានប្រាប់រ៉យទ័រថា អ្នកជំងឺ ៤នាក់ របស់មន្ទីរពេទ្យលោកបានស្លាប់ ដោយសារពួកគេមិនអាចទទួលបានការអនុញ្ញាត។លោកបានមានប្រសាសន៍ដូចនេះ ដោយលើកឡើងពីអ្នកជំងឺដែលត្រូវការការព្យាបាលជំងឺបេះដូងទឹកនោមផ្អែមនិងជំងឺមហារីក។
លោក Boon បាននិយាយថា ការអនុញ្ញាតមិនមានភាពស៊ីចង្វាក់គ្នាទេ ហើយលោកបានជំរុញឱ្យអាជ្ញាធរបញ្ជាក់និងបន្ធូរបន្ថយវិធានការនេះ។ ប្រទេសថៃមានអ្នកឆ្លងវីរុសនេះចំនួន ៣.៤០៤នាក់ និងមានអ្នកស្លាប់ចំនួន ៥៨នាក់។ លោកបានរំពឹងថា អ្នកជំងឺនឹងត្រូវបានអនុញ្ញាតឱ្យឆ្លងកាត់ព្រំដែនពីប្រទេសមីយ៉ាន់ម៉ា និងកម្ពុជា៕
