នាយករដ្ឋមន្ត្រីថៃលោក ប្រាយុទ្ធ ចាន់អូចា បានធ្វើការអំពាវនាវតាមកញ្ចក់ទូរទស្សន៍កាលពីថ្ងៃព្រហស្បតិ៍ ឲ្យមានឯកភាពជាតិ នៅចំពេលដែលមានបាតុកម្មដឹកនាំដោយនិស្សិតប្រឆាំងនឹងរដ្ឋាភិបាលស្ទើររាល់ថ្ងៃ តាំងពីពាក់កណ្តាលខែកក្កដាមក។
លោក ប្រាយុទ្ធ បានអំពាវនាវឲ្យពលរដ្ឋថៃគ្រប់រូបប្រឆាំងនឹងនយោបាយនៃការស្អប់ខ្ពើមនិងបំបែកបំបាក់ខាងជំនឿឬជំនាន់ដោយលោកបញ្ជាក់ថា៖ «អនាគតគឺជារបស់យុវជនជំនាន់ក្រោយ។ សូមទុកឲ្យយុវជនជាអ្នកនាំផ្លូវ និងផ្តល់នូវភាពជាអ្នកដឹកនាំខាងសីលធម៌ ដើម្បីបង្ហាញយើងទាំងអស់គ្នាពីរបៀបនៃការដើរលើមាគ៌ាដ៏លំបាកនៃការសហការគ្នាជាមួយអ្នកណាដែលអាចមិនយល់ស្របជាមួយនឹងយើងក្នុងអំឡុងពេលដែលជាតិកំពុងប្រឈមនឹងការលំបាកនេះ»។
ក្រុមបាតុករបានទាមទារឲ្យលោក ប្រាយុទ្ធ ចុះចេញពីតំណែង និងឲ្យមានការបញ្ចប់ការក្តោបក្តាប់អំណាចរបស់ពួកយោធានៅក្នុងនយោបាយថៃ។ លោក ប្រាយុទ្ធ បានឡើងកាន់អំណាចតាមរយៈរដ្ឋប្រហារយោធាមួយកាលពីឆ្នាំ ២០១៤។
លោក ប្រាយុទ្ធ ធ្លាប់បានថ្លែងកាលពីពេលមុនថា បាតុកម្មដែលដឹកនាំដោយនិស្សិតនៅក្នុងការប្រឆាំងរដ្ឋាភិបាលនេះអាចប្រឈមនឹងវិធានការច្បាប់ ហើយថាអាជ្ញាធរគួរស៊ើបអង្កេតអ្នកនៅពីក្រោយបាតុកម្មទាំងនេះ។
មកទល់នឹងពេលនេះមានអ្នកដឹកនាំបាតុកម្មពីររូបត្រូវបានចាប់ខ្លួនក្រោមបទចោទថាបានរំលោភលើបម្រាមមិនឲ្យមានការជួបជុំគ្នាទ្រង់ទ្រាយធំក្នុងពេលមានការរាតត្បាតនៃជំងឺកូវីដ១៩។ អ្នកទាំងពីរនាក់នោះគឺមេធាវីខាងសិទ្ធិមនុស្សលោក Anon Nampa អាយុ ៣៥ ឆ្នាំ និងសកម្មជននិស្សិតលោក Panupong Jadno អាយុ ២៣ ឆ្នាំ ដែលអ្នកទាំងពីរនៅពេលនេះត្រូវបានអាជ្ញាធរដោះលែងឲ្យនៅក្រៅឃុំដោយមានប្រាក់ធានា។
នៅក្នុងការតវ៉ាកន្លងមក បាតុករខ្លះថែមទាំងទាមទារឲ្យមានកំណែទម្រង់របបរាជានិយមថៃ ដែលជាប្រធានបទរសើបបំផុតមួយនៅក្នុងប្រទេសថៃ។ នៅក្រោមច្បាប់ថៃ ការប្រមាថព្រះមហាក្សត្រអាចនឹងមានទោសជាប់ពន្ធនាគាររហូតដល់ ១៥ ឆ្នាំ៕
