បាងកក៖ ក្រុមប្រឆាំងនៅប្រទេសថៃ បានរៀបចំធ្វើបាតុកម្មមួយថ្ងៃ កាលពីថ្ងៃសៅរ៍ ដោយចោទប្រកាន់រដ្ឋាភិបាលពីបទប្រព្រឹត្ដអំពើពុករលួយ និងអភិបាលកិច្ចមិនល្អ។ រដ្ឋាភិបាលភ័យខ្លាចថា បាតុកម្មនោះអាចបណ្ដាលឲ្យមានអំពើឃោរឃៅ។
ការប៉ះទង្គិចគ្នាតូចតាចកើតមានឡើងនៅពេលដែលកងនគរបាល ប្រើឧស្ម័នបង្ហូរទឹកភ្នែកមុននិងចាប់ខ្លួន។ ការប៉ះទង្គិចគ្នានេះបណ្តាលឲ្យមន្ត្រីនគរបាល និងបាតុករមួយចំនួនបានរងរបួស។
បាតុកម្មមួយថ្ងៃ កាលពីថ្ងៃសៅរ៍
បាតុកររាប់ពាន់នាក់បានប្រឈមតទល់នឹងកិច្ចការពារសន្ដិសុខដ៏រឹងមាំ កាលពីថ្ងៃសៅរ៍ខណៈដែលក្រុមបាតុករបាននាំគ្នាដើរលើផ្លូវ ដើម្បីទាមទារឲ្យនាយករដ្ឋមន្ដ្រី យីងឡាក់ ស៊ីណាវ៉ាត្រ លាលែងចេញពីដំណែង។ កងកម្លាំងនគរបាល និងក្រុម ការពារសន្ដិសុខខេត្ដរាប់រយនាក់បាន ឈរបាំងផ្លូវនៅជិតទីកន្លែងបាតុកម្ម។ អាជ្ញាធរ និយាយថា មនុស្សជាង១០០នាក់បានត្រូវចាប់ខ្លួន។
ក្រុមប្រឆាំងរដ្ឋាភិបាល ហៅ ពីថាក់ សៃអាម ឬ អ្នកការពារប្រទេសថៃ ដឹកនាំដោយឧត្ដមសេនីយចូលនិវត្ដម្នាក់ សង្ឃឹមថា នឹងអាចប្រម៉ូលបានមនុស្ស១០ម៉ឺននាក់ ដើម្បីធ្វើបាតុកម្មនៅកណ្ដាលក្រុងបាងកក។ តែអាជ្ញាធរនគរបាលនិយាយថា មនុស្ស តិចជាង៣ ម៉ឺននាក់បានមកចូលរួម។
រដ្ឋាភិបាលបានប្រកាសប្រើអំណាចពេលគ្រាអាសន្នតាមរយៈច្បាប់សន្ដិសុខផ្ទៃក្នុង រួចបានបង្កើនវត្ដមានកងកម្លាំងនគរបាលដែលបណ្ដាលឲ្យមនុស្សចំនួនតិចចូលរួមធ្វើបាតុកម្ម ហើយនគរបាលបានដាក់របាំងឃំាងផ្លូវជាច្រើននៅក្រៅក្រុងដែលពន្យឺត ល្បឿនមនុស្សដែលចង់ចូលមកក្នុងទីកន្លែងធ្វើបាតុកម្ម។
នៅពេលល្ងាចនៃថ្ងៃបាតុកម្ម ឧត្ដមសេនីយ ប៊ូនឡឺត កៃប្រាសិទ បានបញ្ឈប់ការដើរតវ៉ា ដោយនិយាយថា នគរបាលបានប្រើឧបាយកលទាក់ទាញបាតុករ ឲ្យប្រើអំពើហិង្សា។ ការដើរតវ៉ានោះ ក៏បានត្រូវពន្យឺតដោយសារភ្លៀងធំនៅពេលល្ងាច។
កាលពីព្រឹកកងនគរបាលបានបាញ់គ្រាប់ឧស្ម័នបង្ហូរទឹកភ្នែក មកលើក្រុមបាតុករដែលព្យាយាម ទម្លាយក្រវាត់កាពាររបស់នគរបាល។
លោក ពាន ពិនហ៊ុត អ្នកសម្របសម្រួលបាតុកម្មថ្លែងថា មនុស្សច្រើននាក់បានពុលដោយសារផ្សែងឧស្ម័ន ហើយបានត្រូវយកទៅព្យាបាលនៅ មន្ទីរពេទ្យជិតខាង។
ពេលនេះ នគរបាលប្រដាប់ដោយអាវុធ បានរារាំងបាតុករមិនឲ្យចូលទៅលើផ្លូវ។ កាលពីព្រឹកនគរបាលបានប្រើឧស្ម័នបង្ហូរទឹកភ្នែកមកលើប្រជាពលរដ្ឋដើម្បីគំរាម តែ មួយម៉ោងក្រោយមកនគរបាលឈប់ប្រើគ្រាប់ឧស្ម័ន។ មិត្ដភក្ដិខ្ញុំ អ្នកយកព័ត៌មាន និងអ្នកដទៃបានរងគ្រោះដោយផ្សែងឧស្ម័នបង្ហូរទឹកភ្នែក ហើយមានអ្នកខ្លះទៀតបានត្រូវនគរបាលចាប់ឃុំ។
ការដើរបាតុកម្មជាលើកទី២ នេះធ្វើឡើងដោយក្រុម ពីថាក់ សៃអាម ហើយត្រូវបាន
មើលឃើញថា ជាការសាកល្បងកម្លាំងរបស់ក្រុមប្រឆាំងនឹងរដ្ឋាភិបាលរបស់លោកស្រី យីង ឡាក់ ស៊ីណាវ៉ាត្រ ដែលជាប់ឆ្នោតនៅខែ កក្កដា ២០១១។
ក្រុមបាតុករកាលពីថ្ងៃសៅរ៍ បានថ្លែងប្រាប់វីអូអេ អំពីការព្រួយបារម្ភរបស់ខ្លួនគឺមកពីអំពើពុករលួយ ការទិញសម្លឹកឆ្នោត និង ការចាត់ចែងសេដ្ឋកិច្ច នៅក្រោមរដ្ឋាភិបាលមួយដែលគេហៅថា បានប្រើនយោបាយដែលទាញយកប្រយោជន៍ពីប្រជាពលរដ្ឋ។
ពាណិជ្ជករម្នាក់ដែលសុំមិនចេញឈ្មោះនិយាយថា ប្រាក់ខែច្រើនសន្ធឹករបស់មន្ដ្រីរដ្ឋាភិបាលខ្លះ និងអំពើពុករលួយ ជារឿងចម្បងនៃការព្រួយបារម្ភរបស់គាត់៕
