មនុស្សយ៉ាងតិច១៨នាក់បានស្លាប់នៅពេលដែលរថយន្តដឹកអ្នកដំណើរបានបុកគ្នាជាមួយរទេះភ្លើងកាលពីព្រឹកថ្ងៃអាទិត្យនៅតំបន់ភាគកណ្តាលប្រទេសថៃ។
អាជ្ញាធរនិយាយថា រថយន្តដឹកអ្នកដំណើរនោះ បានឆ្លងកាត់ផ្លូវរទេះភ្លើងនៅពេលដែលរទេះភ្លើងបានបុករថយន្តនោះនៅជិតស្ថានីយរថភ្លើងមួយដែលស្ថិតនៅចម្ងាយ៦៣គីឡូម៉ែត្រភាគខាងកើតរាជធានីបាងកក។ សេចក្តីរាយការណ៍ បានបញ្ជាក់ថា រទេះភ្លើងនោះបានដឹកកម្មកររោងចក្រចំនួន៦០នាក់ទៅកាន់វត្តអារាមមួយនៅពេលនោះ។
មនុស្សយ៉ាងហោចណាស់ក៏៣០នាក់ដែរ បានរងរបួស។
រូបភាពដែលបានថតនៅកន្លែងកើតហេតុ បានបង្ហាញរថយន្តដឹកអ្នកដំណើរនោះ ក្រឡាប់ហើយមានកំទិចបាក់បែកនៅជុំវិញកន្លែងកើតហេតុនោះ។
លោក Maitree Tritilanon អភិបាលខេត្តដែលការបុកគ្នាបានកើតមានឡើងបានប្រាប់ពួកអ្នកយកព័ត៌មានថា ឧបទ្ទវហតុនោះ គួរចាត់ទុកជាការព្រមាន ដើម្បីធ្វើឲ្យប្រសើរឡើងនូវកន្លែងមានហានិភ័យសម្រាប់ចរាចរណ៍។
តាមការឲ្យដឹងរបស់អង្គការសុខភាពពិភពលោក ប្រទេសថៃមានអត្រាស្លាប់ខ្ពស់បំផុតមួយនៅតាមផ្លូវនៅក្នុងពិភពលោក៕
