លោក Seksakol Atthawong ដែលជាទីប្រឹក្សាជាន់ខ្ពស់របស់លោកនាយករដ្ឋមន្ត្រី Prayut Chan-ocha នៃប្រទេសថៃ បាននិយាយថា លោកកំពុងជំរុញឲ្យមានការដាក់ញ្ញត្តិមួយដើម្បីដកអង្គការសិទ្ធិមនុស្ស Amnesty International ចេញពីប្រទេសថៃ ដោយសារតែអង្គការនេះបានគាំទ្រក្រុមបាតុករដែលទាមទារឲ្យមានការកាត់បន្ថយឥទ្ធិពលរបបរាជាធិបតេយ្យដ៏មានអំណាចនៅក្នុងប្រទេសថៃ។
លោក Seksakol ដែលជាអនុរដ្ឋមន្ត្រីម្នាក់នៅក្នុងខុទ្ទកាល័យនាយករដ្ឋមន្ត្រីថៃ បានថ្លែងប្រាប់ VOA កាលពីចុងសប្ដាហ៍មកនេះថា លោកប្រមូលបានហត្ថលេខាចំនួនមួយលាននៅក្នុងញ្ញត្តិ ដែលលោកបានចាប់ផ្ដើមកាលពីឆ្នាំមុន ហើយលោកនឹងដាក់ញ្ញត្តិនេះទៅកាន់ក្រសួងមហាផ្ទៃ និងក្រុមប្រឹក្សាសន្ដិសុខជាតិនៅថ្ងៃព្រហស្បតិ៍ខាងមុខនេះ។
លោក Seksakol បានថ្លែងក្នុងសម្ដីដើមជាភាសាថៃថា៖ «អង្គការ [Amnesty International] នេះពាក់ព័ន្ធនឹងការសហការជាមួយនឹងក្រុមបាតុករ ហើយក្រុមបាតុករនេះគឺប្រឆាំងនឹងរដ្ឋធម្មនុញ្ញរបស់ប្រទេសថៃ ក្រោមរបបរាជាធិបតេយ្យ»។
ពាក្យ «ក្រុមបាតុករ» នេះចង់សំដៅលើចលនាតវ៉ាដែលដឹកនាំដោយយុវជន ដែលបានចាប់ផ្ដើមឡើងកាលពីឆ្នាំ ២០១៩ ដើម្បីស្នើឲ្យលោក Prayut ចុះចេញពីតំណែង ប៉ុន្តែក្រោយមក ក្រុមនេះបានទាមទារឲ្យមានកំណែទម្រង់ចំនួន ១០ ចំណុច ដែលមានគោលបំណងកាត់បន្ថយឥទ្ធិពលនយោបាយរបស់របបរាជាធិបតេយ្យ។
លោក Seksakol បានចាប់ផ្ដើមបង្កើតញ្ញត្តិរបស់លោកនេះកាលពីខែវិច្ឆិកា ឆ្នាំមុន បន្ទាប់ពីអង្គការ Amnesty International បានរិះគន់សាលដីការបស់តុលាការធម្មនុញ្ញ ដែលសាលដីកានោះ បានបញ្ជាក់ថា ចំណុចទាំង ១០ ដែលទាមទារដោយក្រុមបាតុករនោះមិនមែនមានគោលបំណងកែទម្រង់របបរាជាធិបតេយ្យនោះទេ ប៉ុន្តែមានគោលបំណង «ផ្ដួលរំលំ» របបរាជាធិបតេយ្យទាំងស្រុង ដែលផ្ទុយទៅនឹងរដ្ឋធម្មនុញ្ញដែលការពារមិនឲ្យមានការរិះគន់លើរបបរាជាធិបតេយ្យ។
អង្គការ Amnesty International បានហៅសាលដីការបស់តុលាការនោះថាជា «ការព្រមានដ៏គ្រោះថ្នាក់មួយ» ចំពោះពលរដ្ឋថៃក្នុងការប្រើប្រាស់សិទ្ធិដើម្បីបញ្ចេញទស្សនៈរបស់ខ្លួន ហើយថា សាលដីកានោះអាចនឹងបើកផ្លូវឲ្យមានការចោទប្រកាន់ធ្ងន់ធ្ងរចំពោះអ្នកដែលបញ្ចេញទស្សនៈ៕
