ប្រទេសថៃនឹងមិនអនុញ្ញាតឲ្យលោក សម រង្ស៊ី ប្រធានស្ដីទីគណបក្សសង្គ្រោះជាតិ ដែលត្រូវបានតុលាការរំលាយ ឆ្លងកាត់តាមប្រទេសថៃ ដើម្បីធ្វើដំណើរទៅកាន់ប្រទេសកម្ពុជានោះទេ។ នេះបើតាមការបញ្ជាក់របស់នាយករដ្ឋមន្ត្រីថៃលោក Prayut Chan-O-Cha នៅថ្ងៃពុធនេះ។
លោក Prayut និយាយដូច្នេះថា៖ «ខ្ញុំគិតថា លោក [សម រង្ស៊ី] នឹងមិនអាចចូលទឹកដី [ថៃ] បានទេ»។ លោក Prayut បានបន្ថែមថា៖ «យើងនឹងមិនអនុញ្ញាតឲ្យក្រុមប្រឆាំងរដ្ឋាភិបាលណាមួយប្រើទឹកដីថៃជាមូលដ្ឋាននោះទេ»។
លោក សម រង្ស៊ី ដែលបានរស់នៅនិរទេសខ្លួនក្នុងប្រទេសបារាំងតាំងពីឆ្នាំ ២០១៥ មក ដើម្បីគេចពីការចោទប្រកាន់របស់តុលាការកម្ពុជា ដែលលោកអះអាងថាមានលក្ខណៈនយោបាយនោះ បានប្ដេជ្ញាថានឹងធ្វើមាតុភូមិនិវត្តន៍ទៅកាន់ប្រទេសកម្ពុជាវិញនៅថ្ងៃទី ៩ ខែវិច្ឆិកាខាងមុខនេះ ចំថ្ងៃបុណ្យឯករាជ្យជាតិរបស់ប្រទេសកម្ពុជា។
ប៉ុន្តែលោកនាយករដ្ឋមន្ត្រី ហ៊ុន សែន បានបញ្ជាក់ម្ដងហើយម្ដងទៀតថា ដីកាចាប់ខ្លួនលោក សម រង្ស៊ី ត្រូវបានផ្ញើទៅកាន់ប្រទេសជិតខាង ហើយទាហានត្រូវបានពង្រាយនៅព្រំដែនកម្ពុជា-ថៃ ដើម្បីរារាំងដំណើរមាតុភូមិនិវត្តន៍របស់លោក សម រង្ស៊ី។
គណបក្សសង្គ្រោះជាតិត្រូវបានរំលាយកាលពីខែវិច្ឆិកា ឆ្នាំ ២០១៧។ ចាប់តាំងពីពេលនោះមក សមាជិកសំខាន់ៗនៃគណបក្សនេះបានភៀសខ្លួនទៅបរទេស។ ក្នុងរយៈពេលជាច្រើនសប្ដាហ៍ថ្មីៗនេះ ប៉ូលិសបានចាប់ខ្លួនសកម្មជនបក្សប្រឆាំងជាច្រើនមុនការធ្វើមាតុភូមិនិវត្តន៍របស់លោក សម រង្ស៊ី ចូលមកដល់។
កាលពីថ្ងៃអង្គារម្សិលមិញ លោក សម រង្ស៊ី បានបង្ហោះលើ Facebook នូវរូបសំបុត្រយន្តហោះក្រុមហ៊ុន Thai Airways ដែលបង្ហាញលេខកៅអី និងឈ្មោះរបស់លោក ធ្វើដំណើរពីទីក្រុងប៉ារីស ប្រទេសបារាំងនៅថ្ងៃទី ៧ ខែវិច្ឆិកា ទៅដល់ទីក្រុងបាងកក ប្រទេសថៃ នៅថ្ងៃទី ៨ ខែវិច្ឆិកា និងរូបលិខិតឆ្លងដែនរបស់លោក រួមទាំងលិខិតមួយច្បាប់ដែលលោកផ្ញើទៅកាន់លោក Prayut សុំការអនុញ្ញាតឆ្លងកាត់ប្រទេសថៃ ដើម្បីធ្វើដំណើរទៅកាន់ប្រទេសកម្ពុជា៕
