នៅថ្ងៃពុធនេះ គណបក្សប្រឆាំងមួយនៅប្រទេសថៃ បានស្នើឲ្យមានការធ្វើវិសោធនកម្មលើច្បាប់ប្រមាថព្រះមហាក្សត្រ ដោយបានបញ្ជាក់ថា ការធ្វើវិសោធនកម្មនេះអាចបន្ធូរបន្ថយភាពតានតឹងនយោបាយ និងអាចធ្វើឲ្យប្រសើរឡើងនូវសេរីភាពនៃការបញ្ចេញមតិ នៅចំពេលដែលមានការតវ៉ាប្រឆាំងរដ្ឋាភិបាល។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters។
សំណើឲ្យមានការធ្វើវិសោធនកម្មនេះបានធ្វើឡើងដោយសមាជិកសភា ៤៤ រូបខាងគណបក្សចលនាទៅមុខ (Move Forward Party) ដែលជាគណបក្សប្រឆាំង។
កន្លងមក សកម្មជនយ៉ាងតិច ៥៨ នាក់ ត្រូវបានចោទប្រកាន់ពីបទប្រមាថព្រះមហាក្សត្រចាប់តាំងពីខែវិច្ឆិកាឆ្នាំមុនមក។ ការចោទប្រកាន់នេះគឺពាក់ព័ន្ធនឹងការតវ៉ារបស់ពួកគេឲ្យមានកំណែទម្រង់របបរាជានិយម និងឲ្យមានការបញ្ចប់ការពាក់ព័ន្ធរបស់យោធានៅក្នុងរដ្ឋាភិបាល។
គណបក្សចលនាទៅមុខ ចង់ឲ្យមានការអនុញ្ញាតចំពោះការរិះគន់ដោយស្មោះត្រង់លើព្រះមហាក្សត្រនិងរាជវង្សានុវង្ស ការកាត់បន្ថយលក្ខខណ្ឌនៃការដាក់ទោស និងការអនុញ្ញាតឲ្យតែការិយាល័យកិច្ចការរាជវង្សានុវង្សតែប៉ុណ្ណោះ ជាជាងពលរដ្ឋធម្មតា នៅក្នុងការដាក់ពាក្យបណ្តឹងទាក់ទិននឹងការប្រមាថព្រះមហាក្សត្រ ដើម្បីរារាំងមិនឲ្យមានការបំពានច្បាប់នេះ។
នៅក្នុងសំណើវិសោធនកម្មនេះ អ្នកដែលបង្ខូចព្រះនាម ឬគំរាមកំហែងព្រះមហាក្សត្រ នឹងនៅតែប្រឈមនឹងការជាប់ពន្ធនាគារដដែល ប៉ុន្តែគឺជាប់យូរបំផុតត្រឹមតែមួយឆ្នាំប៉ុណ្ណោះ ឬក៏ពិន័យជាប្រាក់ចំនួន ៣ សែនបាត ឬក៏ទាំងពីរ។
លោក Chaithawat Tulathon សមាជិកសភាមួយរូបនៃគណបក្សចលនាទៅមុខ បាននិយាយថា៖ «នេះគឺជាសំណើមួយដែលយើងគិតថា ភាគីទាំងអស់អាចពិភាក្សាបាន អាចទទួលយកបាន ហើយវានឹងជួយបន្ធូរបន្ថយភាពតានតឹងនយោបាយ»៕
