ក្រុមសកម្មប្រយុទ្ធតាលីបង់មួយក្រុមបានវាយប្រហារដោយការបាញ់ប្រហារ និងដាក់បំផ្ទុះគ្រាប់បែកក្នុងក្រុងកាប៊ូលនៅព្រឹកថ្ងៃអង្គារនេះ ដោយបានសម្លាប់មនុស្សយ៉ាងតិច២៨នាក់ ហើយធ្វើឲ្យរបួសចំនួនជាង៣២៧នាក់។ នេះជាការអះអាងរបស់ប៉ូលិស និងក្រុមមន្ត្រីសុខាភិបាលក្នុងរដ្ឋធានីប្រទេសអាហ្វហ្គានីស្ថាន។
ការវាយប្រហារនេះតម្រង់គោលដៅលើអគារមួយដែលក្រុមមន្ត្រីនិយាយថា ជាកន្លែងស្នាក់នៅរបស់ក្រុមកងកម្លាំងសន្តិសុខពិសេសរបស់អាហ្វហ្គានីស្ថាន ដែលធ្វើការឲ្យទីភ្នាក់ងារស៊ើបការសម្ងាត់របស់អាហ្វហ្គានីស្ថាន ហើយទទួលភារកិច្ចខាងផ្នែកការពារមន្ត្រីរដ្ឋាភិបាល។
ការវាយប្រហារនេះបានចាប់ផ្តើមនៅម៉ោងប្រមាណ៩ព្រឹក ម៉ោងក្រុងស្រុក ដោយមានការវាយប្រហារគ្រាប់បែកអត្តឃាតដោយចុចបំផ្ទុះរថយន្តដឹកគ្រឿងផ្ទុះនៅឯច្រកចូលអគារនោះ។
ក្រុមតាលីបង់បានប្រកាសពីការទទួលខុសត្រូវចំពោះការវាយប្រហារមួយនេះ ដែលរងការថ្កោលទោសពីប្រធានាធិបតីអាហ្វហ្គានីស្តាន Ashraf Ghani៕
