ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុមហ៊ុន​ស្បែកជើង​កីឡា​របស់​តៃវ៉ាន់​នៅ​កម្ពុជា​រារែក​មិន​ចង់​សង​សំណង​ដល់​កម្មករ


អ្នក​លក់​ម្នាក់​បង្ហាញ​ស្បែកជើង​ម៉ាក Reebok និង​ម៉ាក Adidas នៅ​ក្នុង​ក្រុង​តៃប៉ិ កាលពី​ថ្ងៃទី៤ ខែសីហា ឆ្នាំ២០០៥។

ក្រុមហ៊ុន​តៃវ៉ាន់​មួយ​ដែល​ក្រុមហ៊ុន​មេ​របស់​ក្រុមហ៊ុន​នេះ​រក​ចំណូល​បាន​ជាង ៥ រយ​លាន​ដុល្លារ​អាមេរិក​កាល​ពី​ឆ្នាំ​មុន បាន​បដិសេធ​មិន​សង​សំណង​តាម​ការ​សម្រេច​របស់​ក្រុមប្រឹក្សា​អាជ្ញាកណ្ដាល​ដល់​កម្មករ​រាប់​ពាន់​នាក់​ដែល​ខ្លួន​បាន​បញ្ឈប់។

ក្រុមហ៊ុន Pou Yuen (Cambodia) Enterprise Ltd. ដែល​ជា​ក្រុមហ៊ុន​ផលិត​សម្ភារៈ​កីឡា​ឲ្យ​ក្រុមហ៊ុន Amer Sports ក្នុង​ប្រទេស​ហ្វាំងឡង់ មិន​បាន​ជូន​ដំណឹង​ដល់​កម្មករ​នោះ​ទេ នៅ​ពេល​ដែល​ក្រុមហ៊ុន​នេះ​បិទ​រោងចក្រ​របស់​ខ្លួន​នៅ​ក្នុង​ទីក្រុង​ភ្នំពេញ​កាល​ពី​ខែ​ធ្នូ​ឆ្នាំ​មុន។

ក្រុមហ៊ុន Yue Yuen Industrial (Holdings) Limited ដែល​ជា​ក្រុមហ៊ុន​មេ​របស់​ក្រុមហ៊ុន​នេះ គឺ​ជា​ក្រុមហ៊ុន​ផលិត​ស្បែក​ជើង​កីឡា​ដ៏​ធំ​បំផុត​នៅ​លើ​ពិភពលោក ដែល​ផលិត​ស្បែកជើង​ម៉ាក Nike ម៉ាក Addidas ម៉ាក Reebok ម៉ាក ASICS​ ម៉ាក New Balance និង​ម៉ាក Puma ជា​ដើម។

ក្រុមហ៊ុន Yue Yuen រក​ចំណូល​បាន ៥១៩ លាន​ដុល្លារ​អាមេរិក​កាល​ពី​ឆ្នាំ ២០១៧។ នេះ​បើ​យោង​តាម​របាយការណ៍​ប្រចាំ​ឆ្នាំ​របស់​ក្រុមហ៊ុន​នេះ។

ប៉ុន្តែ ក្រុមហ៊ុន Pou Yuen (Cambodia) Enterprise Ltd. បែរ​ជា​បដិសេធ​មិន​ព្រម​ផ្ដល់​សំណង​ដល់​កម្មករ​ចំនួន ៤៧៨ នាក់ ស្រប​តាម​ការ​សម្រេច​របស់​ក្រុមប្រឹក្សា​អាជ្ញាកណ្ដាល​នៃ​ប្រទេស​កម្ពុជា​នោះ​ទេ។ ក្រុមប្រឹក្សា​អាជ្ញាកណ្ដាល​នេះ​បាន​សម្រេច​ថា កម្មករ​ម្នាក់ៗ​ត្រូវ​ទទួល​បាន​ប្រាក់​បៀវត្សរ៍​ជា​មធ្យម​ប្រហែល ២ ពាន់។ នេះ​បើ​យោង​តាម​កា​បញ្ជាក់​របស់​មជ្ឈមណ្ឌល​សម្ព័ន្ធ​ភាព​ការងារ និង​សិទ្ធិ​មនុស្ស ដែល​ហៅ​កាត់​ថា​សង់ត្រាល់។

ក្រុមប្រឹក្សា​អាជ្ញាកណ្ដាល​បាន​សម្រេច​កាល​ពី​ចុង​ខែ​កុម្ភៈ​ថា កម្មករ​ទាំង​អស់​ដែល​ធ្វើ​ការ​ឲ្យ​ក្រុមហ៊ុន Pou Yuen នេះ​បាន​ជាង ២ ឆ្នាំ គួរតែ​ត្រូវ​បាន​ចាត់ទុក​ជា​កម្មករ​អចិន្ត្រៃយ៍។

ករណី​នេះ​តម្រូវ​ឲ្យ​កម្មករ​ម្នាក់ៗ​ទទួល​បាន​សំណង​សម្រាប់​ការណ៍​ដែល​ក្រុមហ៊ុន​មិន​ជូន​ដំណឹង​ជា​មុន សំណង​សម្រាប់​ការ​បញ្ឈប់​ពី​ការងារ សំណង​សម្រាប់​ថ្ងៃ​ឈប់​សម្រាក​ដែល​មិន​បាន​ប្រើ សំណង​លើ​ការ​ខូចខាត និង​ប្រាក់​បៀវត្សរ៍​ចុង​ក្រោយ​របស់​ពួកគេ។

ប៉ុន្តែ ផ្ទុយ​ទៅ​វិញ ក្រុមហ៊ុន Pou Yuen នេះ បាន​ចាត់ទុក​កម្មករ​ទាំង​នោះ​ថា​ជា​កម្មករ​ធ្វើ​ការ​មួយ​រយៈ និង​បាន​ផ្ដល់​សំណង​ដល់​ពួកគេ​តែ ៥ ភាគរយ​នៃ​ប្រាក់​ខែ​របស់​ពួកគេ​តែ​ប៉ុណ្ណោះ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG