រដ្ឋមន្ត្រីការពារជាតិតៃវ៉ាន់លោក Chiu Kuo-cheng បាននិយាយនៅថ្ងៃចន្ទនេះថា តៃវ៉ាន់ត្រូវការអាវុធដែលបាញ់បានចម្ងាយឆ្ងាយនិងចំគោលដៅ ដើម្បីរារាំងប្រទេសចិនដែលកំពុងអភិវឌ្ឍប្រព័ន្ធអាវុធរបស់ខ្លួនយ៉ាងឆាប់រហ័សសម្រាប់វាយប្រហារកោះតៃវ៉ាន់។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
នៅខែនេះ តៃវ៉ាន់បានស្នើបន្ថែមការចំណាយជិត ៩ ពាន់លានដុល្លារទៀតលើវិស័យការពារជាតិសម្រាប់រយៈពេល ៥ ឆ្នាំខាងមុខ ដែលក្នុងនោះរួមមានទាំងការចំណាយលើមីស៊ីលថ្មីផងដែរ។ តៃវ៉ាន់ស្នើដូច្នេះ ខណៈពេលដែលខ្លួនបានលើកឡើងអំពីតម្រូវការបន្ទាន់នៅក្នុងការធ្វើទំនើបកម្មអាវុធនៅពេលកំពុងប្រឈមនឹង «ការគំរាមកំហែងធ្ងន់ធ្ងរ» ពីប្រទេសចិន។
លោក Chiu បានថ្លែងនៅក្នុងរដ្ឋសភាថា តៃវ៉ាន់ចាំបាច់ត្រូវតែមានលទ្ធភាពបង្ហាញឱ្យចិនដឹងថា ខ្លួនអាចការពារខ្លួនឯងបាន។ លោកបានបន្ថែមដោយសំដៅលើសមត្ថភាពមីស៊ីលរបស់តៃវ៉ាន់ថា៖ «អាវុធអភិវឌ្ឍន៍ថ្មីនេះត្រូវតែអាចបាញ់បានចម្ងាយឆ្ងាយ ជាក់លាក់ចំគោលដៅ និងអាចចល័តបាន ដើម្បីឱ្យសត្រូវដឹងថា យើងត្រៀមខ្លួនរួចរាល់នៅពេលពួកគេបញ្ជូនកងទ័ពមក»។
នៅក្នុងរបាយការណ៍ជាលាយលក្ខណ៍អក្សរមួយផ្ញើទៅកាន់រដ្ឋសភា ក្រសួងការពារជាតិតៃវ៉ាន់បានបញ្ជាក់ថា មីស៊ីលរយៈចម្ងាយមធ្យមនិងរយៈចម្ងាយឆ្ងាយកំពុងត្រូវបានប្រើនៅក្នុងសមយុទ្ធបាញ់ស្ទាក់នៅកន្លែងសាកល្បងសំខាន់មួយនៅមាត់សមុទ្រភាគអាគ្នេយ៍កោះតៃវ៉ាន់។
លោក Chiu បានបដិសេធមិនផ្តល់ព័ត៌មានលម្អិតដល់អ្នកយកព័ត៌មានអំពីថាតើមីស៊ីលរបស់តៃវ៉ាន់អាចបាញ់បានចម្ងាយប៉ុន្មាននោះទេ ដែលនេះជាអ្វីដែលរដ្ឋាភិបាលតៃវ៉ាន់តែងតែលាក់ការណ៍បានយ៉ាងល្អ៕
