គណៈប្រតិភូកោះតៃវ៉ាន់ដែលរួមមានមន្ត្រីរដ្ឋាភិបាលនិងអ្នកជំនួញតៃវ៉ាន់ នឹងទៅបំពេញទស្សនកិច្ចនៅសាធារណរដ្ឋស្លូវ៉ាគី ឆែក និងប្រទេសលីទុយអានី ដែលជាការបំពានទៅនឹងការប្រឆាំងរបស់រដ្ឋាភិបាលក្រុងប៉េកាំងដែលមិនចង់ឲ្យមានទំនាក់ទំនងការទូតណាមួយជាមួយដែនកោះតៃវ៉ាន់នោះទេ។ នេះបើតាមការលើកឡើងរបស់មន្ត្រីកោះតៃវ៉ាន់កាលពីថ្ងៃអង្គារនេះ និងត្រូវបានផ្សាយដោយទីភ្នាក់ងារព័ត៌មាន AFP។
គណៈប្រតិភូកោះតៃវ៉ាន់ដែលមានសមាជិក៦៥នាក់ នឹងទៅបំពេញទស្សនកិច្ចនៅក្នុងប្រទេសទាំងបីខាងលើនេះចាប់ពីថ្ងៃទី២០ដល់ថ្ងៃទី៣០ ខែតុលាខាងមុខនេះដើម្បីលើកកម្ពស់វិស័យពាណិជ្ជកម្មនិងការវិនិយោគរបស់កោះតៃវ៉ាន់។ នេះបើតាមការបញ្ជាក់របស់លោក Chen Li-kuo ប្រធាននាយកដ្ឋានកិច្ចការអឺរ៉ុបនៃក្រសួងការបរទេសតៃវ៉ាន់។
លោកបានថ្លែងនៅក្នុងកិច្ចប្រជុំសារព័ត៌មានតាមប្រព័ន្ធអនឡាញថា៖ «យើងបានបន្តដើម្បីធ្វើឲ្យទំនាក់ទំនងរបស់យើងកាន់តែជ្រាលជ្រៅថែមទៀតជាមួយប្រទេសក្នុងតំបន់អឺរ៉ុបខាងកើតនិងកណ្តាល ដែលជាការបង្ហាញនូវការសាមគី្គភាពគ្នានិងមិត្តភាពមួយ នៅក្នុងចំណោមដៃគូប្រជាធិបតេយ្យអន្តរជាតិ»។
ប្រទេសទាំងបីនេះ បានផ្តល់វ៉ាក់សាំងបង្ការជំងឺកូវីដ១៩ដល់កោះតៃវ៉ាន់ហើយបានបង្ហាញសញ្ញាពីការចង់ឲ្យមានទំនាក់ទំនងដ៏ជិតស្និទ្ធមួយជាមួយដែនកោះមួយនេះ បើទោះបីជាការណ៍នេះ បានធ្វើឲ្យចិនខឹងសម្បាយ៉ាងណាក្តី។
រដ្ឋាភិបាលក្រុងប៉េកាំង បានដកឯកអគ្គរដ្ឋទូតរបស់ខ្លួនចេញពីប្រទេសលីទុយអានីហើយបានទាមទារឲ្យប្រទេសនេះដកឯកអគ្គរដ្ឋទូតខ្លួនចេញពីប្រទេសចិនផងដែរ។ ប្រទេសលីទុយអានី ក៏បានដកឯកអគ្គរដ្ឋទូតរបស់ខ្លួនចេញពីប្រទេសចិននៅពេលបន្ទាប់មក។
ប្រទេសចំនួន១៥ប៉ុណ្ណោះនៅលើពិភពលោកដែលបានទទួលស្គាល់រដ្ឋាភិបាលកោះតៃវ៉ាន់ជំនួសឲ្យរដ្ឋាភិបាលក្រុងប៉េកាំងដែលបានអះអាងថា ដែនកោះមួយនេះជាផ្នែកមួយនៃទឹកដីរបស់ខ្លួនហើយបានសន្យាថានឹងចូលគ្រប់គ្រងដែនកោះមួយនេះ ដោយការប្រើកម្លាំងយោធា ក្នុងករណីដែលចាំបាច់៕
