នៅក្នុងសុន្ទរកថាឡើងកាន់តំណែងរបស់អ្នកស្រីនៅថ្ងៃពុធនេះ ប្រធានាធិបតីតៃវ៉ាន់អ្នកស្រី Tsai Ing Wen បានការពារលទ្ធិប្រជាធិបតេយ្យរបស់តៃវ៉ាន់ ប្រឆាំងនឹងការជ្រៀតជ្រែករបស់ចិន។
៤ ខែក្រោយមក បន្ទាប់ពីអ្នកស្រី Tsai Ing Wen បានឈ្នះការបោះឆ្នោតភ្លូកទឹកភ្លូកដីសម្រាប់ការកាន់តំណែងជាប្រធានាធិបតីនៅអាណត្តិទីពីរ អ្នកស្រីបាននិយាយថា កោះតៃវ៉ាន់ដែលដឹកនាំដោយខ្លួនឯងនេះនឹងមិនទទួលយកនូវការទាមទាររបស់ចិនដែលចង់ឲ្យតៃវ៉ាន់អនុវត្តនូវគោលការណ៍ «ប្រទេសមួយ ប្រព័ន្ធពីរ» ដើម្បីបញ្ចុះតម្លៃរបស់តៃវ៉ាន់ និងបំផ្លាញដល់ទំនាក់ទំនងបច្ចុប្បន្នរវាងតៃវ៉ាន់ និងចិនដីគោកនោះទេ។
ចិន និងតៃវ៉ាន់បានបែកជាពីរនៅក្នុងឆ្នាំ ១៩៤៩ បន្ទាប់ពីកងកម្លាំងជាតិនិយមរបស់លោក Chaing Kai-shek បានគេចខ្លួនទៅតាំងទីថ្មីនៅលើកោះតៃវ៉ាន់ ក្រោយពីបានចាញ់ក្រុមកុម្មុយនីស្តរបស់លោក ម៉ៅ សេទុង នៅក្នុងសង្គ្រាមស៊ីវិល។ ប៉ុន្តែ រដ្ឋាភិបាលក្រុងប៉េកាំងបានច្រានចោលនូវគំនិតដែលថាកោះតៃវ៉ាន់ជារដ្ឋឯករាជ្យ និងបានសន្យាថានឹងភ្ជាប់យកកោះតៃវ៉ាន់វិញតាមគ្រប់មធ្យោបាយទាំងអស់ ប្រសិនបើចាំបាច់ ដែលក្នុងនោះរួមមានទាំងការប្រើកម្លាំងយោធាផងដែរ។
នៅថ្ងៃពុធនេះ អ្នកស្រី Tsai Ing Wen បាននិយាយថា ទំនាក់ទំនងរវាងចិន និងតៃវ៉ាន់បានឈានដល់ «ចំណុចរបត់មួយនៅក្នុងប្រវត្តិសាស្ត្រ» ដោយអ្នកស្រីបានទទូចថា «សន្តិភាព ភាពស្មើគ្មា លទ្ធិប្រជាធិបតេយ្យ និងការពិភាក្សាគ្នា» គួរតែជាមូលដ្ឋានសម្រាប់ទំនាក់ទំនងណាមួយដំណើរការទៅមុខ។
រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានអបអរសាទរអ្នកស្រី Tsai Ing Wen នៅក្នុងសារផ្ទាល់ខ្លួន ដោយសរសើរអ្នកស្រីសម្រាប់ «ភាពក្លាហាន និងទស្សនវិស័យនៅក្នុងការដឹកនាំលទ្ធិប្រជាប្រធិបតេយ្យដ៏រស់រវើករបស់កោះតៃវ៉ាន់»។
ប៉ុន្តែនៅថ្ងៃពុធនេះ ក្រសួងការបរទេសចិនបានបញ្ជាក់ថា ការអបអរសាទររបស់លោក Pompeo នេះ បានបំផ្លាញធ្ងន់ធ្ងរដល់សន្តិភាព និងស្ថិរភាពនៃច្រកសមុទ្រតៃវ៉ាន់ និងដល់ទំនាក់ទំនងរវាងចិន និងសហរដ្ឋអាមេរិក។
ក្រសួងការបរទេសចិនបានបញ្ជាក់នៅក្នុងសេចក្ដីប្រកាសថា ប្រទេសចិននឹងចាត់វិធានការចាំបាច់នានាដើម្បីតបតទៅវិញ ហើយសហរដ្ឋអាមេរិកត្រូវតែទទួលរងនូវផលវិបាក៕
