តៃវ៉ាន់បានទទួលរថក្រោះចម្បាំង Abrams ទំនើបចំនួន ៣៨ គ្រឿងពីសហរដ្ឋអាមេរិក ដែលនេះគឺជាការទទួលបានរថក្រោះថ្មីដំបូងបង្អស់របស់តៃវ៉ាន់នៅក្នុងរយៈពេល ៣០ ឆ្នាំចុងក្រោយនេះ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AFP ដែលយោងលើការបញ្ជាក់របស់ក្រសួងការពារជាតិតៃវ៉ាន់កាលពីថ្ងៃចន្ទ។
សហរដ្ឋអាមេរិកគឺជាសម្ព័ន្ធមិត្តដ៏សំខាន់បំផុតនិងជាអ្នកផ្គត់ផ្គង់សព្វាវុធដ៏ធំបំផុតជាយូរមកហើយរបស់តៃវ៉ាន់ ដោយធ្វើឲ្យចិនដែលអះអាងថាតៃវ៉ាន់ជាផ្នែកមួយនៃទឹកដីរបស់ខ្លួនខឹងសម្បា។
រថក្រោះប្រភេទ M1A2 ចំនួន ៣៨ គ្រឿងនេះដែលជាក្រុមដំបូងនៃរថក្រោះប្រភេទនេះសរុបចំនួន ១០៨ គ្រឿង ត្រូវបានបញ្ជាទិញកាលពីឆ្នាំ ២០១៩។ រថក្រោះក្រុមដំបូងនេះត្រូវបានបញ្ជូនដល់តៃវ៉ាន់កាលពីយប់ថ្ងៃអាទិត្យនិងត្រូវបានផ្ទេរទៅកាន់មូលដ្ឋានហ្វឹកហ្វឺនយោធាមួយកន្លែងនៅក្នុងទីក្រុង Hsinchu ភាគខាងត្បូងរដ្ឋធានីតៃប៉ិ។ នេះបើតាមការបញ្ជាក់របស់ក្រសួងការពារជាតិតៃវ៉ាន់។
ទីភ្នាក់ងារព័ត៌មានកណ្ដាលពាក់កណ្ដាលផ្លូវការរបស់តៃវ៉ាន់បានរាយការណ៍ថា រថក្រោះទាំងនេះគឺជារថក្រោះថ្មីដំបូងបង្អស់ដែលបញ្ជូនទៅដល់តៃវ៉ាន់នៅក្នុងរយៈពេល ៣០ ឆ្នាំចុងក្រោយនេះ។
កម្លាំងរថក្រោះរបស់តៃវ៉ាន់នៅពេលបច្ចុប្បន្ននេះមានរថក្រោះ CM 11 Brave Tiger ផលិតនៅតៃវ៉ាន់និងរថក្រោះ M60A3 ផលិតនៅសហរដ្ឋអាមេរិកសរុបចំនួនប្រហែល ១.០០០ គ្រឿង។ រថក្រោះ Abrams ដែលជារថក្រោះធ្ងន់ជាងគេបំផុតមួយនៅលើពិភពលោកគឺជាផ្នែកដ៏សំខាន់មួយនៃយោធាសហរដ្ឋអាមេរិក។
ក្រសួងការបរទេសចិនកាលពីថ្ងៃចន្ទបានជំរុញសហរដ្ឋអាមេរិកឲ្យ «បញ្ឈប់ការផ្ដល់សព្វាវុធដល់តៃវ៉ាន់...និងបញ្ឈប់ការគាំទ្រកងកម្លាំងឯករាជ្យភាពតៃវ៉ាន់»។
អ្នកនាំពាក្យក្រសួងការបរទេសចិនលោក Lin Jian បាននិយាយថា៖ «ការប៉ុនប៉ងរបស់អាជ្ញាធរតៃវ៉ាន់នៅក្នុងការស្វែងរកឯករាជ្យតាមរយៈកម្លាំងនិងការជួយរបស់បរទេសគឺនឹងបរាជ័យជាក់ជាមិនខាន»។
លោកបានបន្ថែមថា៖ «ចិននឹងការពារយ៉ាងម៉ឺងម៉ាត់នូវអធិបតេយ្យភាពជាតិ សន្តិសុខ និងបូរណភាពទឹកដីរបស់ខ្លួន»៕
