កោះតៃវ៉ាន់ ដែលត្រូវគេតាមដានមើលយ៉ាងខ្លាំងពីបរទេស ដោយសារខ្លួនបានអាចគ្រប់គ្រងបាននូវរីករាតត្បាតនៃជំងឺកូវីដ១៩នោះ ក្នុងដើមខែមេសានេះ បានចាប់ផ្តើមបញ្ជូនជំនួយខាងសុខាភិបាលទៅកាន់បណ្តាប្រទេសដែលរងគ្រោះខ្លាំងជាងខ្លួន នៅក្នុងយុទ្ធនាការមួយដែលអាចជួយឲ្យកោះតៃវ៉ាន់អាចតទល់នឹងគូប្រជែងខាងនយោបាយដ៏ខ្លាំងក្លារបស់ខ្លួនគឺប្រទេសចិន។
ក្រសួងការបរទេសរបស់កោះតៃវ៉ាន់និយាយកាលពីថ្ងៃទី១ ខែមេសា ថា ខ្លួននឹងបរិច្ចាគម៉ាស់មុខចំនួន១០លានម៉ាស់ចំពោះបុគ្គលិកសុខាភិបាលនៅអឺរ៉ុប សហរដ្ឋអាមេរិក និងប្រទេសសម្ព័ន្ធមិត្តខាងការទូតតូចៗចំនួន១៥ប្រទេស។ ក្រសួងការបរទេសនិយាយថា តៃវ៉ាន់ចង់ចែករំលែកជោគជ័យដែលខ្លួនមានមកដល់ពេលបច្ចុប្បន្ននេះ។
អ្នកស្រី Joanne Ou អ្នកនាំពាក្យក្រសួងការបរទេសថ្លែងថា៖ «អំណោយជាម៉ាស់ចំនួន១០លានម៉ាស់របស់ប្រទេសខ្ញុំ មានគោលដៅដើម្បីជួយបុគ្គលិកសុខាភិបាលនៅក្នុងប្រទេសដែលរងគ្រោះធ្ងន់ធ្ងរពីជំងឺរាតត្បាតនេះ ហើយដែលនេះបង្ហាញពីស្មារតី «តៃវ៉ាន់អាចជួយបាន» និងការជំរុញឲ្យមានសហប្រតិបត្តិការអន្តរជាតិ»។
អ្នកស្រី Ou បន្ថែមថា៖ «យើងបានសង្កេតឃើញថា បទពិសោធន៍និងរបៀបពង្រាយធនធានផ្នែកទប់ស្កាត់ជំងឺឆ្លងរបស់តៃវ៉ាន់ បានទទួលការសាទរពីសហគមន៍អន្តរជាតិរួចទៅហើយ»។
អ្នកស្រីថ្លែងថាជំនួយនេះ ជា «កម្មវិធីផ្តួចផ្តើមជំនួយមនុស្សធម៌ទ្រង់ទ្រាយធំ» ដំបូងរបស់តៃវ៉ាន់ នៅក្រោយពីមានការផ្ទុះរាតត្បាតនៃវីរុសកូរ៉ូណាប្រភេទថ្មីនេះ ដែលមកទល់នឹងពេលនេះបានរាលដាលដល់ប្រមាណ១៧០ប្រទេសហើយ ចាប់តាំងពីវីរុសនេះត្រូវបានគេរកឃើញដំបូងកាលពីជាង៣ខែមុននៅភាគកណ្តាលប្រទេសចិន។
ការផ្តល់ជំនួយអន្តរជាតិរយៈពេលយូររបស់តៃវ៉ាន់ នៅភ្លាមៗក្រោយពីមានកិច្ចប្រឹងប្រែងផ្តល់ជំនួយក្រៅប្រទេសរបស់ចិន នឹងធ្វើឲ្យកោះតៃវ៉ាន់មានឥរិយាបថប្រកបដោយសណ្តានចិត្តក្នុងក្រសែភ្នែកប្រទេសជាច្រើន ដរាបក្រុមមន្ត្រីនៅក្រុងតៃប៉ិមិនយករឿងជំនួយនេះមកធ្វើជារឿងនយោបាយអន្តរជាតិ នេះបើតាមអ្នកវិភាគ។
ចំនួនសរុបនៃការឆ្លងវីរុសកូរ៉ូណានៅកោះតៃវ៉ាន់បានកើនឡើងដល់៣៧៦ករណី ត្រឹមថ្ងៃអង្គារទី៧ ខែមេសា។ ប៉ុន្តែខុសពីតំបន់ផ្សេងទៀតជាច្រើនក្នុងពិភពលោក រដ្ឋាភិបាលនៃកោះនេះ មិនបានបញ្ជាឲ្យពលរដ្ឋត្រូវនៅផ្ទះ ឬបិទសកម្មភាពតាមទីប្រជុំជនឡើយ។ ប្រទេសចិនក៏បានរក្សាករណីឆ្លងវីរុសថ្មីនេះឲ្យនៅក្នុងកម្រិតគ្រប់គ្រងបានដែរ ដោយមានចំនួនអ្នកឆ្លងច្រើនជាងតៃវ៉ាន់ខ្លាំង ក៏ប៉ុន្តែចំនួនច្រើនត្រូវគេមើលឃើញថាដោយសារប្រទេសចិនជាប្រភពនៃវីរុសនេះផង។ មជ្ឈដ្ឋានខ្លះសង្ស័យថា ប្រទេសចិនបានរាយការណ៍មិនអស់ពីចំនួនពិតប្រាកដនៃអ្នកឆ្លងជំងឺកូវីដ១៩របស់ខ្លួន ដែលមកទល់នឹងពេលនេះតួលេខជាផ្លូវការរបស់ចិនគឺប្រមាណជាង៨២.០០០ករណី។
អ្នកស្រី Yun Sun (យុន សាន់) អ្នកស្រាវជ្រាវជាន់ខ្ពស់នៃកម្មវិធីអាស៊ីបូព៌ានៅវិទ្យាស្ថានស្រាវជ្រាវ Stimson Center ក្នុងរដ្ឋធានីវ៉ាស៊ីនតោនថ្លែងថា៖ «ប្រសិនបើយើងបកស្រាយសារ [របស់តៃវ៉ាន់] ដោយមិនពាក់ព័ន្ធជាមួយនយោបាយនោះ តៃវ៉ាន់គួរត្រូវបានគេសរសើរ។»
ក៏ប៉ុន្តែកោះតៃវ៉ាន់ក៏ប្រកួតប្រជែងដណ្តើមការទទួលស្គាល់ជាអន្តរជាតិ ជាមួយនឹងប្រទេសចិនដីគោកដែលមានកម្លាំងយោធានិងសេដ្ឋកិច្ចខ្លាំងក្លាជាងខ្លួន។ ប្រទេសចិនទាមទារអធិបតេយ្យភាពលើកោះតៃវ៉ាន់ដែលគ្រប់គ្រងខ្លួន ហើយប្រទេសចិនប្រើអំណាចរបស់ខ្លួនដើម្បីធ្វើឲ្យអង្គការអន្តរជាតិដូចជាអង្គការសុខភាពពិភពលោក WHO បិទខ្ទប់ការចូលរួមរបស់ដែនកោះនេះ។
អ្នកផ្តល់ជំនួយនៅក្នុងប្រទេសចិនបានបញ្ជូនម៉ាស់និងឧបករណ៍ធ្វើតេស្តវីរុសរាប់សែនទៅក្រៅប្រទេស។ ជាឧទាហរណ៍ ជំនួយរបស់ចិនពេលនេះ កំពុងត្រូវគេប្រើនៅប្រទេសអ៊ីតាលី ជប៉ុន ប៉ាគីស្ថាន ហ្វីលីពីន រុស្ស៊ី និងកូរ៉េខាងត្បូងជាដើម។ កាលពីថ្ងៃទី៣០ ខែមីនា ខេត្ត Heilongjiang របស់ចិនបានផ្តល់អំណោយជាម៉ាស់ប្រើពេលវះកាត់ចំនួន៥០.០០០ ដល់ខេត្តមួយរបស់ប្រទេសជប៉ុន នេះបើតាមសេចក្តីរាយការណ៍របស់ទីភ្នាក់ងារព័ត៌មានផ្លូវការ Xinhua របស់ចិន។
ប្រទេសចិនមានសមត្ថភាពផលិតម៉ាស់បាន១១៦លានម៉ាស់ក្នុងមួយថ្ងៃ បើប្រៀបធៀបនឹងសមត្ថភាពផលិតចំនួន១០លានម៉ាស់ក្នុងមួយថ្ងៃរបស់តៃវ៉ាន់។
អ្នកស្រី Yun Sun នៃវិទ្យាស្ថាន Stimson Center ថ្លែងបន្តថា៖ «បើយើងពិនិត្យមើលត្រឹមកត្តាសមត្ថភាព ខ្ញុំគិតថា តៃវ៉ាន់មិនអាចប្រកួតទៅរួចជាមួយប្រទេសចិនដីគោកទេ។ ប៉ុន្តែត្រង់ចំណុចនេះតើវាមានន័យថា តៃវ៉ាន់មិនគួរសូម្បីតែព្យាយាមប្រកួតនឹងប្រទេសចិនឬទេ? ខ្ញុំគិតថាតៃវ៉ាន់គួរប្រកួត ហើយតៃវ៉ាន់គួរចូលរួមធ្វើវិភាគទាន»។
កោះតៃវ៉ានអាចលេចមុខលេចមាត់លើឆាកអន្តរជាតិក្នុងនាមជាអ្នកផ្តល់ជំនួយមិនពាក់ព័ន្ធជាមួយនយោបាយ ខណៈដែលប្រទេសចិនកំពុងមានជម្លោះជាមួយសហរដ្ឋអាមេរិក ដែលជាប្រទេសមានការឆ្លងជំងឺកូវីដ១៩ខ្លាំងជាងគេក្នុងពិភពលោក នេះបើតាមការវិភាគរបស់អ្នកស្រី Yun Sun។ រដ្ឋាភិបាលក្រុងវ៉ាស៊ីនតោននិយាយថា ប្រទេសចិនបានលាក់បាំងទំហំពិតប្រាកដនៃរាតត្បាតរបស់កូវីដ១៩នៅក្នុងប្រទេសខ្លួន ខណៈរដ្ឋាភិបាលទីក្រុងប៉េកាំងមិនសប្បាយចិត្តនឹងការណ៍ដែលប្រធានាធិបតីសហរដ្ឋអាមេរិកលោក Donald Trump បានហៅវីរុសកូរ៉ូណាប្រភេទថ្មី ថាជា «វីរុសចិន»។
កោះតៃវ៉ាន់បានបង្កើនការអំពាវនាវឲ្យគេអនុញ្ញាតឲ្យកោះនេះអាចចូលជាសមាជិកអង្គការសុខភាពពិភពលោក WHO។ ប្រទេសចិនកន្លងមកតែងរាំងខ្ទប់សមាជិកភាពរបស់តៃវ៉ាន់នៅក្នុងអង្គការអន្តរជាតិនេះ។
ក្នុងចំណោមជំនួយអន្តរជាតិរបស់ខ្លួន ក្រសួងការបរទេសតៃវ៉ាន់និយាយថា សហរដ្ឋអាមេរិកនឹងទទួលបានម៉ាស់ចំនួន១០០.០០០ម៉ាស់ក្នុងមួយសប្តាហ៍ ដោយបន្ថែមម៉ាស់២លានទៀតសម្រាប់បុគ្គលិកពេទ្យដែលនៅជួរមុខនៃការទប់ស្កាត់ជំងឺរាតត្បាតនេះ។ បណ្តាប្រទេសសម្ព័ន្ធមិត្តដែលមានចំណងការទូតជាមួយតៃវ៉ាន់ ដែលភាគច្រើនជាប្រទេសតូចៗនិងក្រីក្រ នឹងទទួលបានម៉ាស់ចំនួន១លានម៉ាស់ បូកនឹងឧបករណ៍ស្គែនកម្តៅ៨៤គ្រឿង។ ម៉ាស់ចំនួន៧លាននឹងត្រូវបញ្ជូនទៅអឺរ៉ុប។
លោក Sean King អនុប្រធាននៃក្រុមហ៊ុនប្រឹក្សាខាងយុទ្ធសាស្ត្រនយោបាយមួយឈ្មោះ Park Strategies ដែលមានមូលដ្ឋាននៅបូរីញូវយ៉ក ថ្លែងថា៖ «ពលរដ្ឋអាមេរិកភាគច្រើនប្រហែលមិនបានដឹង ឬគិតច្រើនអំពីជោគជ័យដ៏ខ្លាំងរបស់តៃវ៉ាន់ក្នុងការទប់ស្កាត់ជំងឺកូវីដ១៩មកទល់នឹងពេលនេះ»។
អ្នកវិភាគរូបនេះថ្លែងបន្តទៀតថា៖ «ប៉ុន្តែការណ៍ដែលអង្គការសុខភាពពិភពលោក WHO បដិសេធមិនចូលរួមសកម្មភាពអ្វីជាមួយតៃវ៉ាន់ ដែលត្រូវគេគិតថាតាមបញ្ជារបស់ប្រទេសចិន ការណ៍នេះធ្វើឲ្យកោះតៃវ៉ាន់ទទួលបានការអាណិតអាសូរយ៉ាងខ្លាំងពីសាធារណមតិនៅសហរដ្ឋអាមេរិក។ ខ្ញុំប្រាកដណាស់ថា ការណ៍ដែលតៃវ៉ាន់បញ្ជូនម៉ាស់ទាំងនេះមកយើងខ្ញុំនៅសហរដ្ឋអាមេរិក ក្នុងពេលយើងខ្ញុំកំពុងត្រូវការចាំបាច់ នឹងធ្វើឲ្យពលរដ្ឋអាមេរិកាំងកាន់តែមានទស្សនៈវិជ្ជមានថែមទៀតចំពោះតៃវ៉ាន់»។
ហើយនយោបាយការទូតខាងសុខាភិបាលច្រើនទៀតកាន់តែលេចចេញជារូបរាងឡើង។
មន្ត្រីសហរដ្ឋអាមេរិកនិងមន្ត្រីតៃវ៉ាន់ បានយល់ព្រមគ្នាកាលពីខែមីនា ដើម្បីធ្វើការជាមួយគ្នាខាងផ្នែកស្រាវជ្រាវនិងបង្កើតវ៉ាក់សាំង។ ដាច់ដោយឡែកពីនេះ សាកលវិទ្យាល័យ Academia Sinica របស់តៃវ៉ាន់កំពុងពិភាក្សាជាមួយមន្ត្រីសហភាពអឺរ៉ុប អំពីមធ្យោបាយនានាដែលពួកគេអាចសហការគ្នាក្នុងការប្រយុទ្ធប្រឆាំងនឹងជំងឺកូវីដ១៩ នេះបើតាមការរាយការណ៍របស់ទីភ្នាក់ងារព័ត៌មានកណ្តាលរបស់កោះតៃវ៉ាន់៕
ប្រែសម្រួលដោយ សឹង សុផាត
