កងកម្លាំងយោធាស៊ីរីបានប្រកាសអំពីបទឈប់បាញ់ឯកតោភាគីរយៈពេល៧២ម៉ោង នៅទូទាំងប្រទេសកាលពីថ្ងៃពុធ ស្របពេលដែលពិធីបុណ្យសាសនាឥស្លាមរ៉ាម៉ាឌនបញ្ចប់។
ដោយសំដៅទៅលើសេចក្តីថ្លែងការណ៍មួយរបស់យោធា ប្រព័ន្ធផ្សព្វផ្សាយផ្លូវការបានឲ្យដឹងថា បទឈប់បាញ់នេះនឹងមានប្រសិទ្ធភាពចាប់ពីម៉ោង១ព្រឹក ថ្ងៃទី៦ ខែកក្កដា រហូតដល់ពាក់កណ្តាលអាធ្រាត្រថ្ងៃទី ៨ ខែកក្កដា ម៉ោងក្នុងស្រុក។
សេចក្តីថ្លែងការណ៍នោះមិនបានបញ្ជាក់ឲ្យលម្អិតអំពីថាតើ បទឈប់បាញ់នោះមានសុពលភាពទៅលើសកម្មភាពរបស់យោធាទៅលើក្រុមជីហាត ដូចជាក្រុមរដ្ឋឥស្លាម និងក្រុម Nusra Front ដែលជាឧបសម្ព័ន្ធរបស់ក្រុមអាល់កៃដាឬយ៉ាងណានោះទេ។
ដោយថ្លែងទៅកាន់អ្នកកាសែតក្នុងរដ្ឋធានីប៊ីលីស៊ី (Tbilisi) ប្រទេសហ្សកហ្ស៊ី មុនពេលបើកកិច្ចប្រជុំកំពូលប្រចាំឆ្នាំរបស់អង្គការអូតង់នៅក្នុងទីក្រុងវ៉ាសូរី (Warsaw) ប្រទេសប៉ូឡូញ លោករដ្ឋមន្ត្រីការបរទេសអាមេរិក John Kerry ស្វាគមន៍ចំពោះការប្រកាសអំពីបទឈប់បាញ់នេះ ដោយបាននិយាយថា «បទឈប់បាញ់នេះធ្វើឲ្យមានភាពស្ងប់ស្ងាត់ដើម្បីប្រារព្ធពិធីបុណ្យ Eid»។
លោក Kerry បានអំពាវនាវដល់គ្រប់ភាគីទាំងអស់ឲ្យសាទរចំពោះបទឈប់បាញ់នេះ ដើម្បីអនុញ្ញាតឲ្យមានការផ្អាកការបង្ហូរឈាមដែលកំពុងបន្តនៅក្នុងប្រទេសនេះ។
លោក Kerry ក៏បានថ្លែងថា ការឈប់បាញ់ក្នុងប្រទេសស៊ីរីគឺផ្អែកលើការពិភាក្សាគ្នា របស់អង្គការអន្តរជាតិគាំទ្រស៊ីរី ដែលរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុង មូស្គូ គឺជាសហប្រធាន៕