ជើងហោះហើរ មានគម្រោងចាប់ផ្តើមបន្តការហោះហើរដោយមានកម្រិតនៅថ្ងៃអាទិត្យនេះនៅអាកាសយានដ្ឋានទីក្រុង Brussels (ប្រ៊ុចសែល) ដែលជាកន្លែងពួកអ្នកដាក់គ្រាប់បែកអត្តឃាត បានធ្វើការវាយប្រហារដែលមានគ្រោះថ្នាក់ដល់ជីវិតកាលពីជិត២សប្តាហ៍មុន។
ការផ្ទុះនៅទីនោះនិងនៅជិតស្ថានីយរថភ្លើងក្រោមដី បានសម្លាប់មនុស្ស៣២នាក់ហើយបានបំផ្លាញតំបន់ចេញដំណើររបស់អាកាសយានដ្ឋាន។
ជើងហោះហើរអាកាសចរណ៍៣របស់ទីក្រុងប្រ៊ុចសែល មានគម្រោងចាកចេញនៅរសៀលថ្ងៃអាទិត្យនេះ។ អាកាសយានដ្ឋាន បានហៅជើងហោះហើរនេះថា ជាជើងហោះហើរនិមិត្តរូប ដោយមានការបន្ថែមជើងហោះហើរក្នុងរយៈពេលប៉ុន្មានថ្ងៃខាងមុខទៀត។
លោក Arnaud Feist អគ្គនាយកក្រុមហ៊ុនអាកាសយានដ្ឋានទីក្រុងប្រ៊ុយសែល បាននិយាយកាលពីថ្ងៃសៅរថា «ការចាប់ផ្តើមកិច្ចប្រតិបត្តិការឡើងវិញ ទោះបីតែមួយផ្នែកក៏ដោយ នេះជាសញ្ញានៃសេចក្តីសង្ឃឹមដែលបង្ហាញថា ឆន្ទៈនិងកម្លាំងរបស់យើង បានកើតមានឡើងវិញហើយហើយយើង មិនចុះចាញ់ទេ»។
ប៉ូលីសប៊ែលហ្ស៊ិក បានត្អូញត្អែរអំពីអ្វីដែលពួកគេ បាននិយាយថាមានការខ្វះសន្តិសុខនៅអាកាសយានដ្ឋាន ហើយបានគំរាមកំហែងធ្វើកូដកម្មប្រសិនបើ វិធានការណ៍ជាក់លាក់មួយចំនួន មិនត្រូវបានអនុវត្តទេ ក៏ប៉ុន្តែពួកគេបានឈោងដល់កិច្ចព្រមព្រៀងជាមួយរដ្ឋាភិបាលរួចហើយ។
ប៉ូលិសក៏បានធ្វើការចាប់ខ្លួនមនុស្សជាច្រើនកាលពីថ្ងៃសៅរ៍បន្ទាប់ពីការប្រឈមដ៏តានតឹងរវាងបាតុករស្តាំនិយម និង ពួកយុវជនប្រឆាំងការប្រកាន់ពូជសាសន៍នៅក្នុងទីក្រុងប្រ៊ុចសែល។
ក្រុមស្តាំនិយម មានផែនការធ្វើបាតុកម្មនៅក្នុងទីក្រុង Molenbeek ជាសង្កាត់ដែលមានពួកអ្នកកាន់សាសនាអ៊ីស្លាមរស់នៅដ៏ច្រើនលើសលុបដែលនៅទីនោះមានពួកអ្នកចូលរួមការវាយប្រហារទីក្រុងប៉ារីសខែវិច្ឆិកា ឆ្នាំ២០១៥មួយចំនួនដែរ។ ក្រុមប្រឆាំងការប្រកាន់ពូជសាសន៍ បានអំពាវនាវឲ្យមានបាតុកម្មតបតវិញ។
ក្រុមទាំង២ បានត្រូវហាមឃាត់ដោយពួកអាជ្ញាធរមូលដ្ឋាន ដោយភ័យខ្លាចពីការកើតមានឡើងនូវចលាចលដូចថ្ងៃអាទិត្យសប្តាហ៍មុននៅពេលដែលប៉ូលិស បានប្រើកាណុងទឹកដើម្បីបំបែកពួកបាតុករដែលមានគ្នាប្រមាណ៤៥០នាក់៕
