នាយករដ្ឋមន្ត្រីស៊ុយអែតលោក Stefan Lofven កាលពីថ្ងៃសុក្របានថ្លែងការពារយុទ្ធសាស្ត្ររបស់ប្រទេសលោកក្នុងការទប់ស្កាត់ការរាតត្បាតនៃជំងឺកូវីដ១៩ ដើម្បីប្រឆាំងនឹងទស្សនៈថាស៊ុយអែតកន្លងមកមានលក្ខណៈព្រងើយកន្តើយចំពោះការរាលដាលជាសាកលនៃជំងឺនេះ។
កន្លងមកប្រទេសនៅអឺរ៉ុបដទៃទៀតបានសម្តែងការបារម្ភថា អាជ្ញាធរស៊ុយអែតប្រើវិធី «ធូររលុង» ក្នុងការប្រយុទ្ធនឹងវីរុសកូរ៉ូណាដែលបង្កជំងឺកូវីដ១៩។ ពួកគេថាបើទោះបីស៊ុយអែតហាមមិនឲ្យពលរដ្ឋជួបប្រជុំគ្នាជាហ្វូង និងមានវិធានរក្សាគម្លាតពីគ្នាក្នុងសង្គមក៏ដោយ ក៏ស៊ុយអែតមិនបានបិទភោជនីយដ្ឋាន ឬសាលារៀនដូចនៅប្រទេសផ្សេងទៀតទេ។
នាយរដ្ឋមន្ត្រីស៊ុយអែតលោក Stefan Lofven ថ្លែងទៅកាន់អ្នកកាសែតបរទេសនៅរាជធានីស្តុកខុលដោយទទូចថា ជីវភាពរស់នៅក្នុងប្រទេសស៊ុយអែតមិនមានលក្ខណៈធម្មតាមិនប្រែប្រួលដូចការរាយការណ៍ព័ត៌មាននៅអន្តរជាតិកន្លងមកទេ។
លោក ថា ពលរដ្ឋស៊ុយអែតជាច្រើនមិនចាកចេញពីផ្ទះទេ។ ប៉ុន្តែលោកទទួលស្គាល់ថា ចំនួនអ្នកស្លាប់ពីជំងឺកូវីដ១៩របស់ស៊ុយអែតដែលមានចំនួនប្រមាណ៣.៥០០នាក់ជាចំនួនមធ្យមច្រើនខ្លាំងជាងបណ្តាប្រទេសជិតខាងស៊ុយអែតដូចជាហ្វាំងឡង់ ន័រវែស និងដាណឺម៉ាក ដែលប្រទេសទាំងនេះសុទ្ធតែបានដាក់វិធានការរឹតត្បិតតឹងតែងជាងស៊ុយអែត។
ប្រព័ន្ធផ្សព្វផ្សាយក្នុងស្រុករបស់ស៊ុយអែតក្នុងប៉ុន្មានសប្តាហ៍បានរាយការណ៍ថា មានការកើនឡើងនៃការស្លាប់នៅតាមមណ្ឌលមនុស្សចាស់ដែលចូលនិវត្តន៍ ហើយនាយករដ្ឋមន្ត្រី Lofven ថាស៊ុយអែតមានមនុស្សចាស់ស្លាប់ច្រើនបើទោះបីអាជ្ញាធរព្យាយាមការពារពួកគេយ៉ាងណាក៏ដោយ៕
