ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ស៊ុយអែត​ប្រកាស​បង្វែរ​ជំនួយ​សម្រាប់​កម្ពុជាទៅផ្តោត​​លើ​​គំនិត​ផ្តួចផ្តើម​គាំទ្រ​លទ្ធិ​ប្រជាធិបតេយ្យ​​


បុរស​ម្នាក់​ទម្លាក់​សន្លឹក​ឆ្នោត​របស់​លោក​ទៅ​ក្នុង​ហិប​ឆ្នោត ក្នុង​ការិយាល័យ​បោះ​ឆ្នោត​មួយ នៅ​ខណ្ឌ​សែន​សុខ រាជធានី​ភ្នំពេញ កាលពី​ថ្ងៃ​ទី២៩ ខែ​កក្កដា ឆ្នាំ​២០១៨។ (ទី អូលីស្សា/VOA)

ប្រទេស​ស៊ុយអែត នៅ​ថ្ងៃ​សុក្រ​នេះ​ បាន​សម្រេច​ផ្តោត​ជំនួយ​អភិវឌ្ឍន៍​របស់​ខ្លួន​សម្រាប់​កម្ពុជា ​ទៅ​លើ​ការ​គាំទ្រ​ការ​គោរព​សិទ្ធិ​មនុស្ស​ លទ្ធិ​ប្រជា​ធិបតេយ្យ​ និង​នីតិរដ្ឋ​កាន់តែ​ខ្លាំងក្លា​ ដោយ​បង្វែរ​យុទ្ធ​សាស្ត្រ​កម្មវិធី​ជំនួយ​របស់​ខ្លួន​ទៅ​តំបន់​អាស៊ី​ប៉ាស៊ីហ្វិក​វិញ។

សេចក្តី​ថ្លែង​ការណ៍​របស់​ស្ថានទូត​ស៊ុយអែត​ប្រចាំ​កម្ពុជា ចុះ​ថ្ងៃ​ទី​១២ ​ខែ​មិថុនា​នេះ បាន​រៀបរាប់ថា​លំហ​ប្រជា​ធិបតេយ្យ​នៅ​កម្ពុជា​ប៉ុន្មាន​ឆ្នាំ​កន្លង​ទៅ​ថ្មីៗ​នេះ មាន​ការ«​រឹតត្បិត​យ៉ាង​ធ្ងន់ធ្ងរ»។​

លោក Peter Eriksson រដ្ឋមន្ត្រី​ទទួល​បន្ទុក​សហ​ប្រតិបត្តិការ​អភិវឌ្ឍន៍​អន្តរ​ជាតិ​ស៊ុយ​អែត ​បាន​ថ្លែង​ក្នុង​សេចក្តី​ថ្លែង​ការណ៍​នេះ​ថា៖​

«ការណ៍​នេះ​ បង្ក​ការ​លំបាក​ដល់​ការ​បន្ត​ការ​សហការ​ដែល​ជិតស្និទ្ធ​និង​ទូលំទូលាយ។ ដូច្នេះ​រដ្ឋាភិបាល​[ស៊ុយអែត]​បាន​ជ្រើស​រើស​បង្វែរ​កិច្ច​ប្រឹងប្រែង​ការ​អភិវឌ្ឍន៍​របស់​យើង​ដើម្បី​ផ្តល់​ការ​គាំទ្រ​ប្រសើរ​ជាង​នេះ​ដល់​ការ​ផ្លាស់ប្តូរទាក់​ទង​នឹង​សិទ្ធិ​មនុស្ស ប្រជា​ធិបតេយ្យ​ និង​នីតិរដ្ឋ​ក្នុង​ប្រទេស​[កម្ពុជា]»។

​លោក ​Eriksson បន្ត​ទៀត​ថា​ ​ស៊ុយអែត​នឹង​បន្ត​គាំទ្រ​អង្គការ​សង្គមស៊ីវិល ក្រុម​អ្នក​ការពារ​សិទ្ធិ​មនុស្ស ​និង​អ្នក​គាំទ្រ​ប្រជា​ធិបតេយ្យ​នៅ​កម្ពុជា។​

រដ្ឋាភិបាលកម្ពុជា​បច្ចុប្បន្ន​ត្រូវ​បាន​រិះ​គន់​យ៉ាង​ខ្លាំង​ពី​សំណាក់​រដ្ឋាភិបាល​បស្ចិម​ប្រទេស ដោយសារ​ការ​បង្ក្រាប​ទៅ​លើ​ក្រុម​ប្រឆាំង អង្គការ​សង្គម​ស៊ីវិល​ និង​ប្រព័ន្ធ​ផ្សព្វផ្សាយ​ឯករាជ្យ​ក្នុង​ប្រទេស​កម្ពុជា​ នៅ​មុន​ការ​បោះឆ្នោត​ជាតិ​ឆ្នាំ​ ២០១៨។​

គណបក្ស​សង្គ្រោះជាតិ​ដែល​ត្រូវ​មើល​ឃើញ​ថា​ ​ជា​បក្ស​ប្រឆាំង​ដ៏​ធំ​ និង​ជាគូប្រជែង​នយោបាយប្រកៀក​ប្រកិត​បំផុត​ជាមួយ​គណបក្ស​កាន់​អំណាច ត្រូវ​បាន​តុលាការ​កំពូល​កម្ពុជា​រំលាយ​ចោល​កាល​ពី​ឆ្នាំ​ ២០១៧។​

លោក ផៃ ស៊ីផាន​ ប្រធាន​អង្គភាព​អ្នក​នាំពាក្យ​រដ្ឋាភិបាល​កម្ពុជា បាន​មាន​ប្រសាសន៍​ប្រាប់​វីអូអេ​នៅ​ថ្ងៃ​សុក្រ​នេះ​ថា​ លទ្ធិ​ប្រជា​ធិបតេយ្យ​នៅ​កម្ពុជា​កំពុង​ដើរ​ទៅ​មុខ​ ហើយ​ថា​ ការ​ផ្តល់​ ឬ​ការ​បង្វែរ​កម្មវិធី​ជំនួយ​របស់​រដ្ឋាភិបាល​បរទេស​ណា​មួយ គឺ​ជា​សិទ្ធិ​សម្រេច​របស់​រដ្ឋាភិបាល​នោះ។​

«អាហ្នឹង​ជា​ការ​សម្រេច​អធិបតេយ្យ​របស់​ប្រទេស​គេ​ទេ​ របស់រដ្ឋាភិបាល​គេ​ទេ។​ អាហ្នឹង​យើង​មើល​ឃើញ ក៏​ប៉ុន្តែ​អ្វី​ដែល​កម្ពុជា​ចង់​បាន​ដើម្បី​ឆ្លើយតប​ទៅ​នឹង​ការ​អភិវឌ្ឍរបស់​ខ្លួន​ គឺ​ការ​បណ្តាក់​ទុន​ផ្ទាល់​ពី​ខាង​ក្រៅ»។​

លោក​បន្ត​ថា​ ​កម្មវិធី​ជំនួយ​អភិវឌ្ឍន៍​បរទេស​ខ្លះ​មិន​មែន​ជា ​«ភាព​ស្លាប់​រស់​របស់​ដំណើរ​ការ​កម្ពុជា​ទេ»។​

ជំនួយ​អភិវឌ្ឍន៍​របស់​ស៊ុយអែត​សម្រាប់​កម្ពុជា ដោយ​ផ្អែក​លើ​យុទ្ធ​សាស្ត្រ​សហ​ប្រតិបត្តិការអភិវឌ្ឍន៍​ទ្វេរ​ភាគី​ នឹង​ត្រូវ​បញ្ចប់​នៅ​ត្រឹម​ថ្ងៃ​ទី​ ១​ ខែ​កក្កដា ​ឆ្នាំ​ ២០២១។​

នៅ​ឆ្នាំ​ ២០១៩ ជំនួយ​អភិវឌ្ឍន៍​របស់​ស៊ុយអែត​សម្រាប់​កម្ពុជា​នេះ​ មាន​ចំនួន​ជិត​ ២៤ ​លាន​ដុល្លារ​អាមេរិក។ នេះ​បើ​យោង​តាម​ស្ថានទូត​ស៊ុយអែត​ប្រចាំ​កម្ពុជា៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG