អាជ្ញាធរបង់ក្លាដេសបានចាប់ខ្លួនជនជាប់សង្ស័យបួននាក់នៅក្នុងការទាក់ទិនជាមួយនឹងការសម្លាប់អ្នកធ្វើការផ្នែកផ្តល់ជំនួយជនជាតិអ៊ីតាលីម្នាក់ ដែលត្រូវបានបាញ់សម្លាប់នៅក្នុងរដ្ឋធានីនៃប្រទេស ដែលស្ថិតក្នុងប៉ែកខាងត្បូងនៃទ្វីបអាស៊ីកាលពីខែកញ្ញា។
ក្រុមមន្ត្រីបាននិយាយថា ពួកជនជាប់សង្ស័យបានទទួលសារភាពថា បានធ្វើឃាតលោក Cesare Tavella ដែលជាអ្នកចាត់ចែងកិច្ចការនៃគម្រោងការក្នុងមូលដ្ឋានរបស់ទីភ្នាក់ងារអភិវឌ្ឍន៍សាកលមួយមានមូលដ្ឋានក្នុងប្រទេសហូឡង់នៅក្នុងតំបន់ការទូតនៃរដ្ឋធានីដាកា។
ក្រុមអ្នកវាយប្រហារជិះម៉ូតូបានបាញ់សម្លាប់លោក Tavella នៅក្នុងការវាយប្រហារមួយស្រដៀងគ្នានឹងការបាញ់សម្លាប់ពលរដ្ឋជប៉ុនម្នាក់នៅពេលប៉ុន្មានថ្ងៃបន្ទាប់មកក្នុងក្រុង Rangpu ឋិតនៅចម្ងាយ ៣៣០គ.ម.ពីរដ្ឋធានីដាកា។
ពួករដ្ឋឥស្លាមបានប្រញាប់ប្រញាល់អះអាងទាមទារការទទួលខុសត្រូវជាបន្ទាន់ដល់ការធ្វើឃាតលោក Tavella។ ក្រុមមន្ត្រីបង់ក្លាដេសបានច្រានចោលការ
អះអាងនេះដោយនិយាយថា អង្គការភេរវជននេះគ្មានជំហរមាំទាំនៅក្នុងប្រទេស បង់ក្លាដេសទេ។ អាជ្ញាធរបង់ក្លាដេសបានបន្ទោសពួកជនសកម្មប្រយុទ្ធឥស្លាម និយមក្នុងប្រទេស និងពួកអ្នកនយោបាយអំពីការស្លាប់របស់អ្នកធ្វើការផ្នែកផ្តល់ជំនួយរូបនេះ។
ក្រុមប៉ូលិសបាននិយាយថា ពួកបុរសជាប់សង្ស័យទាំងនេះបានត្រូវនិយាយប្រាប់ដោយ«បងធំ» ដែលជាអ្នកបង្គាប់ឲ្យសម្លាប់អ្នកធ្វើការខាងផ្តល់ជំនួយនេះ។ «បងធំ»នោះបាននិយាយប្រាប់បុរសទាំងនេះឲ្យផ្តោតការយកចិត្តទុកដាក់លើការធ្វើឃាតជនបរទេសស្បែកសម្នាក់«ដើម្បីបង្កើតចលាចល»ក្នុងប្រទេស៕
