មន្ត្រី អេហ្ស៊ីប បាននិយាយថាមនុស្ស៣០៥នាក់បានត្រូវសម្លាប់ដោយជនជាប់សង្ស័យថាជាជនសកម្មប្រយុទ្ធនៅក្នុងការវាយប្រហារមួយក្នុងព្រះវិហារឥស្លាម មួយមានមនុស្សពេញនៅក្នុងផ្នែកខាងជើងនៃឧបទ្វីប Sinai មានចលាចល។ មនុស្ស២៧នាក់ក្នុងបណ្តាពួកជនដែលបានបាត់បង់ជីវិតជាពួកកុមារ។
ការិយាល័យរដ្ឋអាជ្ញាសាធារណៈបាននិយាយថាជ្រុលនិយមពី២០ទៅ៣០នាក់បានយកជាទីដៅនៃការវាយប្រហារព្រះវិហារ al-Rawdah នៅក្នុងក្រុង Bir al-Abed ដែលឋិតនៅខាងលិចទីរួមខេត្ត el-Arish។
ជនសកម្មប្រយុទ្ធបានទៅដល់ព្រះវិហារ នេះដោយជិះរថយន្ត។ ពួកគេបានបំផ្ទុះគ្រាប់បែកមួយហើយបន្ទាប់មកបានរត់ចូលក្នុងព្រះវិហារឥស្លាម នេះដែលនៅទីនោះពួកគេបានបាញ់ទៅលើក្រុមអ្នកសូត្រធ៌មនៅពេលពួកគេបានខិតខំព្យាយាមរត់គេចខ្លួនចេញពីទីនោះ។ ពួកជនប្រដាប់អាវុធទាំងនេះក៏បានប្រើប្រាស់ឡានឆេះដើម្បីរាំងខ្ទប់កន្លែងចេញពីអាគារនោះ។
អ្នកឃើញហេតុការណ៍ដោយផ្ទាល់ក៏បាននិយាយដែរថាជនសកម្មប្រយុទ្ធបានបាញ់ទៅលើឡានពេទ្យនៅពេលពួកបុគ្គលិកសង្រ្គោះបន្ទាន់បានខិតខំព្យាយាមជម្លៀសជនរងគ្រោះទៅកាន់មន្ទីរពេទ្យ។ ទីភ្នាក់ងារព័ត៌មានរដ្ឋបានផ្សាយថាមានមនុស្ស១២៨បានត្រូវរបួសនៅក្នុងការវាយប្រហារនោះ។ ការវាយប្រហារនេះបានធ្វើឡើងនៅក្នុងព្រះវិហារ មួយរបស់សមាជិកនិកាយ Sufi ដែលជាចលនាអាថ៌កំបាំងមួយរបស់ឥស្លាម៕
