មន្រ្តីតុលាការកំពូល នៅព្រឹកថ្ងៃពុធនេះ បានរកឃើញថាការកាត់ក្តីរបស់តុលាការថ្នាក់ក្រោមលើជនជាប់ចោទរ៉ាត់ រត្នមុនី មិនត្រឹមត្រូវ ដោយតុលាការជាន់ខ្ពស់នេះ បង្វែរឲ្យជំនុំជម្រះឡើងវិញ។
នៅម៉ោងជាង៨និង៣០នាទី លោកស្រី គឹម សត្ថាវី ប្រធានក្រុមប្រឹក្សាជំនុំជម្រះនៃតុលាការកំពូល បានប្រកាសថាការកាត់ក្តីរបស់តុលាការថ្នាក់ក្រោម«មិនត្រឹមត្រូវ» ហើយសម្រេចបញ្ជូនសំណុំរឿងនេះទៅសាលាឧទ្ធរណ៍ ដើម្បីជំនុំជម្រះឡើងវិញ។ ប៉ុន្តែលោកស្រីមិនបានបញ្ជាក់ថាតើមិនត្រឹមត្រូវត្រង់ចំណុចណានោះទេ។
លោកស្រីមានប្រសាសន៍ថា៖ «យល់ឃើញថាសាលដីកាព្រហ្មទណ្ឌរបស់សាលាឧទ្ធរណ៍ភ្នំពេញដែលបានសម្រេចសេចក្តីមកនេះ មិនត្រឹមត្រូវទេ»។
កាលពីថ្ងៃទី២៦ខែមិថុនា ឆ្នាំ២០១៩ សាលាដំបូងរាជធានីភ្នំពេញបានផ្តន្ទាទោសលោករ៉ាត់ រត្នមុនីឲ្យជាប់ពន្ធនាគាររយៈពេលពីរឆ្នាំពីបទ «ញុះញង់ឲ្យមានការរើសអើង»ពាក់ព័ន្ធនឹងការចេញផ្សាយខ្សែភាពយន្តឯកសារ«ម្ដាយខ្ញុំលក់ខ្ញុំ»ដែលផលិតដោយបណ្តាញព័ត៌មានរដ្ឋរុស្ស៊ីRT។ បន្ទាប់មក កាលពីខែវិច្ឆិកា ឆ្នាំ២០១៩ ប្រធានក្រុមប្រឹក្សាជំនុំជម្រះនៃសាលាឧទ្ធរណ៍លោក ប្លង់ សំណាង បានសម្រេចតម្កល់ការសម្រេចកាត់ទោសរបស់សាលាដំបូងរាជធានីភ្នំពេញ លើលោក មុនី។
លោក រ៉ាត់ រត្នមុនី ដែលកំពុងពិសារបាយសាច់ជ្រូកនិងកាហ្វេខ្មៅក្នុងបន្ទប់រង់ចាំមួយនៅទីធ្លាតុលាការកំពូល បានងើបឈរ ហើយនិយាយទៅកាន់អ្នកសារព័ត៌មានថាលោកសង្ឃឹមថាតុលាការនឹងសម្រេចថាលោកគ្មានទោសពៃរ៍នោះទេ ខណៈលោកនៅសល់ជាង៥ខែទៀត រួចផុតការជាប់ទោស ដែលលោកត្រូវបានកាត់ទោសឲ្យជាប់ពន្ធនាគារ២ឆ្នាំ។
លោក មុនី និយាយទាំងញញឹមថា៖ «ខ្ញុំសង្ឃឹមថាតុលាការឧទ្ធរណ៍ទម្លាក់ការចោទប្រកាន់»។ បន្ទាប់មកលោកត្រូវបានដាក់ខ្នោះដៃខាងធ្វេង ហើយខ្នោះម្ខាងទៀតដាក់ជនជាប់ចោទម្នាក់ទៀត ហើយសមត្ថកិច្ចនាំពួកគេទៅបន្តទៀត។
VOA មិនអាចសុំការអត្ថាធិប្បាយពីលោក ទូច ថារិទ្ធិ អ្នកនាំពាក្យសាលាឧទ្ធរណ៍ និងលោក ប្លង់ សំណាង ប្រធានក្រុមប្រឹក្សាជំនុំជម្រះក្តីរបស់សាលាឧទ្ធរណ៍ដែលកាត់ទោស លោក មុនី បាននៅឡើយទេ។ ភរិយារបស់លោកមុនី គឺលោកស្រី ឡុង គឹមហ៊ាង អាយុ៣៦ឆ្នាំនិងមានកូនប្រុសម្នាក់អាយុ២ឆ្នាំ៦ខែថ្លែងប្រាប់ VOA នៅថ្ងៃពុធនេះថាលោកស្រីមានការភ្ញាក់ផ្អើលដែលតុលាការកំពូលរកឃើញថាការកាត់ទោសរបស់តុលាការជាន់ក្រោមមិនត្រឹមត្រូវហើយបញ្ជូនទៅសាលាឧទ្ធរណ៍វិញ។ ប៉ុន្តែលោកស្រីថាតុលាការគួរតែដោះលែងប្តីរបស់លោកស្រីនៅពេលនេះ។
លោកស្រីមានប្រសាសន៍ថា៖ «ខ្ញុំពិតជាខកចិត្តនឹងតុលាការកំពូល ដោយសារតែបើតុលាការកំពូលរកឃើញការកាត់ក្តីមិនត្រឹមត្រូវលើប្តីខ្ញុំហើយ តុលាការកំពូលគួរតែដោះលែងឲ្យមានសេរីភាព មិនគួរឲ្យគាត់បន្តឲ្យនៅក្នុង(ពន្ធនាគារ)ព្រៃសទាំងអយុត្តិធម៌បែបហ្នឹងទៀតទេ។ ប្តីខ្ញុំគួរត្រូវបានដោះលែង»។
លោកស្រីជំរុញឲ្យសាលាឧទ្ធរណ៍កាត់ក្តីនេះឲ្យបានលឿនដើម្បីឲ្យប្តីរបស់លោកស្រីឆាប់បានចេញពីពន្ធនាគារ។
លោក យី សុខសាន្ត មន្រ្តីស៊ើបអង្កេតជាន់ខ្ពស់នៃសមាគមអាដហុក ដែលបានឃ្លាំមើលការប្រកាសសាលដីកានេះ មានប្រសាសន៍នៅខាងក្រៅរបងតុលាការថាការសម្រេចរបស់តុលាការកំពូលជាការពន្យារពេលបន្ថែមលើជនជាប់ចោទ ដែលលោកថាគ្មានទោសកំហុស។ លោកបន្តថាមន្រ្តីតុលាការថ្នាក់ក្រោមគួរតែត្រូវពិន័យចំពោះការកាត់ទោសមិនត្រឹមត្រូវលើលោក មុនី។
លោកមានប្រសាសន៍នៅខាងក្រៅតុលាការកំពូលជិតព្រះបរមរាជវាំងថា៖ «បើសិនជាគាត់យកថាមន្រ្តីសាលាឧទ្ធរណ៍ កាត់មិនត្រឹមត្រូវ មានន័យថាគាត់គួរតែដាក់ទោសដល់មន្រ្តីសាលាឧទ្ធរណ៍ គាត់មិនគួរទៅបង្វិលសំណុំរឿងហ្នឹងទៅវិញទេ»។
កាលពីកន្លងទៅ តុលាការក៏បានបង្គាប់ឲ្យលោករត្នមុនី បង់ប្រាក់ជំងឺចិត្តចំនួន៧០លានរៀលឬស្មើនឹងប្រមាណ១៧.៥០០ដុល្លារអាមេរិកដល់ដើមបណ្តឹងរដ្ឋប្បវេណីចំនួនពីរនាក់ដែលជាតួសម្តែងក្នុងខ្សែភាពយន្តឯកសាររឿង«ម្តាយខ្ញុំលក់ខ្ញុំ»។អាជ្ញាធរថាពួកគេមិនមានសាច់រឿងដូចក្នុងវីដេអូដែលផ្សាយដោយសារព័ត៌មានRT នោះទេ។ អាជ្ញាធរបញ្ជាក់ថានេះការប្រឌិតរឿងដែលមិនឆ្លុះបញ្ចាំងការណ៍ពិតនៅកម្ពុជា៕
