ក្នុងសេចក្តីសម្រេចដែលមានសំឡេង៥ទល់នឹង៤របស់តុលាការកំពូលសហរដ្ឋអាមេរិកបានគាំទ្រលោកប្រធានាធិបតី Donald Trump ដោយអនុញ្ញាតឱ្យលោកទទួលបានប្រាក់រាប់ពាន់លានដុល្លារសម្រាប់ការសន្យាក្នុងយុទ្ធនាការរបស់លោកដើម្បីសាងសង់ជញ្ជាំងព្រំដែនអាមេរិកជាមួយប្រទេសម៉ិកស៊ិក។
សេចក្តីសម្រេចរបស់តុលាការកំពូលកាលពីថ្ងៃសុក្របាននិរាករណ៍សាលក្រមបង្កកប្រាក់២ពាន់៥រយលានដុល្លាររបស់ក្រសួងការពារជាតិ សម្រេចដោយតុលាការជាន់ទាប ហើយតម្កល់ដោយការសម្រេចរបស់សាលាឧទ្ធរណ៍។
លោក Trump បានបង្ហោះនៅលើបណ្តាញសង្គម Twitter ថា «ជ័យជម្នះធំណាស់សម្រាប់សន្តិសុខតាមព្រំដែន និងនីតិរដ្ឋ!»។
លោក Dror Ladin មេធាវីម្នាក់នៃគម្រោងសន្តិសុខជាតិរបស់សហភាពសេរីភាពស៊ីវិលអាមេរិក American Civil Liberties Union បានប្រាប់ទីភ្នាក់ងារសារព័ត៌មានបារាំង AFP ថា «សហគមន៍នៅព្រំដែន បញ្ហាបរិស្ថាន និងការបែងចែងអំណាចរវាងអង្គនីតិប្រតិបត្តិ អង្គនីតិបញ្ញតិ និងតុលាការតាមរដ្ឋធម្មនុញ្ញរបស់យើងនឹងត្រូវអន្តរាយជាអចិន្ត្រៃយ៍ប្រសិនបើលោក Trump អាចដកមូលនិធិយោធាសម្រាប់ធ្វើជញ្ជាំងព្រំដែនស្អប់ជនបរទេស ហើយដែល សភាបានបដិសេធជំទាស់នោះ»៕
