លោក មាជ សុវណ្ណារ៉ា មន្ត្រីគណបក្សប្រឆាំងត្រូវបានកងសន្តិសុខ បញ្ជូនទៅកាន់ពន្ធនាគារវិញកាលពីថ្ងៃពុធ ក្រោយសវនការដែលធ្វើឡើងនៅតុលាការកំពូលពាក់ព័ន្ធនឹងការប្តឹងទាស់ចំពោះការហាមឃាត់របស់សាលាដំបូងរាជធានីភ្នំពេញ ដែលមិនអនុញ្ញាតឲ្យលោកបានទៅទទួលការព្យាបាលជំងឺនៅក្រៅប្រទេស។
តុលាការកំពូលកាលពីព្រឹកថ្ងៃពុធមិនទាន់សម្រេចថា នឹងច្រានចោលសាលក្រមសាលាដំបូងរាជធានីភ្នំពេញដែលបានរារាំងលោក មាជ សុវណ្ណារ៉ា មិនឲ្យធ្វើដំណើរចេញក្រៅប្រទេសកម្ពុជាដើម្បីទទួលការព្យាបាលជំងឺ ដោយសំអាងលើហេតុផលថា ដំណើរការក្តីក្តាំមន្ត្រីគណបក្សប្រឆាំងរូបនេះ នឹងនាំនូវការរាំងស្ទះដល់នីតិវិធីរបស់តុលាការ។ នេះបើតាមការបញ្ជាក់ពីមេធាវីការពារក្តីលោក មាជ សុវណ្ណារ៉ា និងការប្រកាសរបស់តុលាការកំពូល។
សាលាដំបូងរាជធានីភ្នំពេញ កាលពីខែកក្កដា ឆ្នាំ២០១៥ បានកាត់ទោសលោក មាជ សុវណ្ណារ៉ា ប្រធាននាយកដ្ឋានព័ត៌មាននៃគណបក្សសង្គ្រោះជាតិ និងសកម្មជនគណបក្សប្រឆាំង១០នាក់ផ្សេងទៀត ឲ្យជាប់ក្នុងពន្ធនាគារពី៧ទៅដល់២០ឆ្នាំពាក់ព័ន្ធនឹងសំណុំរឿងចូលរួម និងធ្វើកុប្បកម្មប្រឆាំងនឹងរដ្ឋាភិបាលដើម្បីរំដោះទីលានប្រជាធិបតេយ្យកាលពីខែកក្កដា ឆ្នាំ២០១៤។
ការចេញសាលក្រមរបស់សាលាដំបូងរាជធានីភ្នំពេញនៅពេលនោះ ដែលហាមមិនឲ្យលោក មាជ សុវណ្ណារ៉ា ចេញទៅក្រៅប្រទេសនេះ គឺត្រូវបានតុលាការធ្វើឡើងមុនមួយថ្ងៃនៃការទោសលោក មាជ សុវណ្ណារ៉ា ឲ្យជាប់ក្នុងពន្ធនាគារចំនួន២០ឆ្នាំ។
លោក ជួង ជូងី មេធាវីការពារលោក មាជ សុវណ្ណារ៉ា ប្រាប់ក្រុមអ្នកសារព័ត៌មាន ក្រោយពីបានដើរចេញពីបន្ទប់អង្គសវនាការក្នុងតុលាការកំពូលថា ការចេញសាលក្រមហាមឃាត់មិនឲ្យកូនក្តីលោកចេញទៅទទួលការព្យាបាលជំងឺនៅសហរដ្ឋអាមេរិក គឺធ្វើផ្ទុយនឹងនីតិវិធីតុលាការ ហើយថា កូនក្តីលោកមិនដែលធ្វើឲ្យខូចដល់នីតិវិធីរបស់តុលាការនៅក្នុងដំណាក់កាលស៊ើបសួរនោះឡើយ។
មេធាវីរូបនេះពន្យល់ថា៖
«កូនក្តីខ្ញុំ មាជ សុវណ្ណារ៉ា តាំងពីដើមរហូតមក អត់ដែលបង្ហាញឲ្យឃើញថា គាត់រាំងស្ទះដំណើរការនីតិវិធីរបស់តុលាការទាល់តែសោះ ទោះបីគាត់មានសញ្ជាតិអាមេរិកាំង គាត់ចេញទៅក្រៅញឹកញាប់ក្តី។ ប៉ុន្តែគាត់ចូលរួមសហការជាមួយតុលាការជានិច្ច អត់ដែលធ្វើឲ្យរាំងស្ទះទាល់តែសោះ បែរជាតុលាការចេញសេចក្តីសម្រេចហាមដែលមិនមានភាពចាំបាច់ អញ្ចឹងហើយ ទើបគាត់តវ៉ារហូតមកដល់កំពូលហ្នឹងបាទ»។
ការអធិប្បាយរបស់លោកមេធាវី ជួង ជូងី កើតមានឡើង ក្រោយការសួរដេញដោលនៅក្នុងបន្ទប់អង្គសវនាការអស់រយៈពេលជាង១ម៉ោង។ ចៅក្រម គឹម សត្ថាវី ជាប្រធានអង្គជំនុំជម្រះបានសម្រេចពន្យារការប្រកាសសេចក្តីសម្រេចរបស់តុលាការតុលាការកំពូលទៅថ្ងៃទី២៦ ខែតុលា។
VOA មិនទាន់អាចសុំការអធិប្បាយពីចៅក្រម គឹម សត្ថាវី បានទេ កាលពីល្ងាចថ្ងៃពុធ។
លោក មាជ សុវណ្ណារ៉ា ដែលមានសញ្ជាតិអាមេរិកាំងបានប្រាប់ក្រុមអ្នកសារព័ត៌មាន នៅក្នុងបរិវេណតុលាការកំពូលថា រឿងក្តីលោកគឺជារឿងនយោបាយ។ លោកនិយាយថា៖
«ខ្ញុំជឿថា រឿងនយោបាយ ដោះដោយនយោបាយ ហើយលោក ហ៊ុន សែន គាត់ចាស់ ហើយកូនគាត់នៅធ្វើនយោបាយជាមួយគ្នា នៅពេលក្រោយទៀត»។
លោក មាជ សុវណ្ណារ៉ា អះអាងថា លោកស្រី រ៉ូណា ស្មីត (Rhona Smith) ប្រេសិតពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា បានទៅជួបលោក ហើយបានលើកឡើងអំពីប្រព័ន្ធតុលាការដែលមិនយុត្តិធម៌។ យ៉ាងណាក៏ដោយ ថ្លែងនៅក្នុងសន្និសីទព័ត៌មានក្នុងទីក្រុងភ្នំពេញកាលពីថ្ងៃពុធ លោកស្រី ស្មីត មិនបានលើកឡើងពីជំនួបលោកស្រីជាមួយលោក មាជ សុវណ្ណារ៉ា នោះទេ តែលោកស្រីបានសម្តែងការព្រួយបារម្ភអំពីភាពអាប់អួរនៃបរិយាកាសនយោបាយក្នុងប្រទេសកម្ពុជា។
លោក មាជ សុវណ្ណារ៉ា និងសកម្មជន១០នាក់ផ្សេងទៀតនៃគណបក្សប្រឆាំងត្រូវតុលាការដោះលែងឲ្យនៅក្រៅឃុំកាលពីថ្ងៃទី១៣ ខែមេសា ឆ្នាំ២០១៥ ដោយសារមានការសម្របសម្រួលនយោបាយរវាងលោក សម រង្ស៊ី នៃគណបក្សសង្គ្រោះជាតិដែលជាគណបក្សជំទាស់ និងលោកនាយករដ្ឋមន្ត្រីហ៊ុន សែន ប្រធានគណបក្សប្រជាជនកម្ពុជាដែលជាគណបក្សកាន់អំណាច។ តុលាការបានចាប់ពួកគេឃុំឃាំងវិញនៅថ្ងៃ២១ ខែកក្កដា ឆ្នាំ២០១៥ នៅពេលមានវិបត្តិនយោបាយក្រោយពីសកម្មជនគណបក្សសង្គ្រោះជាតិទៅត្រួតពិនិត្យព្រំដែនកម្ពុជាវៀតណាម និងមានបញ្ហាផែនទីរវាងប្រទេសទាំងពីរ៕
