ក្រុមកីឡាបាល់ឱបអាមេរិកាំងចំនួនពីរ ដែលមានក្រុម San Francisco 49ers និងក្រុម Kansas City Chiefs នឹងប្រកួតគ្នានៅយប់នេះក្នុងទីក្រុង Miami រដ្ឋ Florida នៅក្នុងការប្រកួតជើងឯកសម្ព័ន្ធបាល់ឱបថ្នាក់ជាតិអាមេរិកដែលមានឈ្មោះថា Super Bowl។
ក្រុមកីឡា Chiefs ទើបតែមានឱកាសប្រកួតដល់ជុំផ្ដាច់ព្រ័ត្រលើកនេះប៉ុណ្ណោះ ចាប់តាំងពីឆ្នាំ១៩៧០មក ដែលមានរយៈពេល២៦ឆ្នាំមកហើយ គឺមុនពេលដែលកីឡាករខ្សែប្រយុទ្ធរបស់ខ្លួន លោក Patrick Mahomes ចាប់កំណើតទៅទៀត។
ចំណែកឯក្រុម 49ers វិញ សង្ឃឹមថានឹងទទួលបានជ័យជម្នះនៅក្នុងការប្រកួត Super Bowl នៅថ្ងៃអាទិត្យនេះ។ ក្រុមនេះមិនដែលឈ្នះបានពានរង្វាន់ទេចាប់តាំងពីឆ្នាំ១៩៩៥មក។
កីឡាករ Jimmy Garoppolo ដែលជាកីឡាករខ្សែប្រយុទ្ធរបស់ក្រុម 49ers នេះ ព្យាយាមដើម្បីឈ្នះពានរង្វាន់ Super Bowl ជាលើកដំបូង ក្នុងនាមជាកីឡាករដែលទើបតែចាប់ផ្ដើមចូលលេងម្នាក់។ លោក Garoppolo ធ្លាប់លេងឲ្យក្រុម New England Patriots ដែលធ្លាប់ឈ្នះពានរង្វាន់ មុនពេលដែលលោកប្ដូរទៅលេងឲ្យក្រុម 49ers។
គេរំពឹងថា ពលរដ្ឋអាមេរិកាំងជាង១០០លាននាក់នឹងទស្សនាការប្រកួតកីឡានេះ។
តារាចម្រៀង កញ្ញា Demi Lovato នឹងច្រៀងបទគោរពទង់ជាតិ ហើយតារាចម្រៀង Shakira និង Jennifer Lopez នឹងច្រៀងនៅវគ្គពាក់កណ្ដាលការប្រកួត។ ការប្រកួតនេះនឹងចាប់ផ្ដើមនៅម៉ោង ៦:៣០នាទីល្ងាចម៉ោងក្នុងសហរដ្ឋអាមេរិក នៅឯពហុកីឡាដ្ឋាន Hard Rock ក្នុងក្រុង Miami៕
