មុនជំនួបរវាងមេដឹកនាំគណបក្សធំៗទាំងពីរនៅកម្ពុជានៅឯពិធីគោរពវិញ្ញាណក្ខន្ធសពម្តាយក្មេកលោកនាយករដ្ឋមន្ត្រី ហ៊ុន សែន កាលពីថ្ងៃអង្គារ លោក កឹម សុខា ត្រូវបានតុលាការកោះហៅឲ្យចូលខ្លួនក្នុងសវនាការមួយនៅសាលាឧទ្ធរណ៍នៅសប្តាហ៍ក្រោយ។ ប៉ុន្តែ រហូតមកដល់ថ្ងៃព្រហស្បតិ៍នេះ មិនទាន់មានការបញ្ជាក់ណាមួយថាតើលោក កឹម សុខា នឹងបង្ហាញខ្លួននៅក្នុងសវនាការនោះឬយ៉ាងណាទេ។
មេធាវីម្នាក់របស់លោក កឹម សុខា គឺលោក ចាន់ ចេន បានថ្លែងប្រាប់វីអូអេនៅថ្ងៃព្រហស្បតិ៍នេះថា៖ «រហូតមកដល់ពេលនេះ មិនទាន់ច្បាស់នៅឡើយទេថាតើឯកឧត្តម កឹម សុខា នឹងមានវត្តមាននៅសាលាឧទ្ធរណ៍ឬក៏យ៉ាងណា ដោយសារពេលវេលាវានៅឆ្ងាយដែរ»។
សារព័ត៌មានក្នុងស្រុក វីអូឌី បានរាយការណ៍កាលពីថ្ងៃអង្គារថា ព្រះរាជអាជ្ញាសាលាឧទ្ធរណ៍ លោក តាន់ សេណារ៉ុង កាលពីថ្ងៃទី៣០ ខែមេសា ឆ្នាំ២០២០ បានកោះហៅ លោក កឹម សុខា អតីតមេដឹកនាំគណបក្សសង្គ្រោះជាតិដែលត្រូវបានតុលាការកំពូលកម្ពុជារំលាយ ឱ្យចូលរួមសវនាការជំនុំជម្រះមួយនៅរសៀលថ្ងៃទី១៣ ខែឧសភា ឆ្នាំ២០២០។
ក្រុមមេធាវីការពារក្តីឲ្យលោក កឹម សុខា កាលពីថ្ងៃទី២៥ខែមីនា បានដាក់ពាក្យបណ្តឹងជំទាស់នឹងការសម្រេចរបស់ចៅក្រមសាលាដំបូងរាជធានីភ្នំពេញ ដែលបានទទួលយកភស្តុតាងបន្ថែមដាក់ចូលក្នុងសំណុំរឿងចោទប្រកាន់ពីបទក្បត់ជាតិ ប្រឆាំងនឹងមេដឹកនាំបក្សប្រឆាំងរូបនេះ៕
