ម្ចាស់នាវាកុងតឺន័រដ៏ធំមួយរបស់ជប៉ុន ដែលកំពុងធ្វើឲ្យស្ទះព្រែកជីកស៊ុយអេ បានសុំអភ័យទោស ខណៈផ្លូវទឹកសំខាន់នេះនៅតែស្ទះចរាចរណ៍ដឹកទំនិញរយៈពេល ២ ថ្ងៃពេញ។
ប្រតិបត្តិករកប៉ាល់ដឹកទំនិញប្រវែង ៤០០ ម៉ែត្រឈ្មោះថា Ever Given បាននិយាយថា វាអស់ថាមពល នៅពេលដែលវាជួបប្រទះនឹងខ្យល់បក់ខ្លាំង ហើយកឿងទទឹកផ្លូវទឹក ខណៈដែលវាកំពុងធ្វើដំណើរពីសមុទ្រក្រហមឆ្ពោះទៅកាន់ព្រែកជីកស៊ុយអេ កាលពីថ្ងៃអង្គារ។
កិច្ចខិតខំប្រឹងប្រែងដើម្បីទាញ ឬជីកយកនាវានេះចេញ មិនបានជោគជ័យទេ រហូតមកដល់ពេលនេះ។ នាវានេះដឹកកុងតឺន័រចំនួន ២ ម៉ឺន ដែលផ្ទុកទំនិញនៅពេលវាកឿង។
នៅលើគេហទំព័ររបស់ខ្លួនក្រុមហ៊ុនជប៉ុនឈ្មោះ Shoei Kisen Kaisha បានសរសេរថា៖ «យើងសូមទោសដោយស្មោះ ចំពោះបង្កឲ្យមានការកកស្ទះដ៏ព្រួយបារម្ភ ចំពោះកប៉ាល់នានាត្រូវធ្វើដំណើរតាមព្រែកជីកស៊ុយអេ និងភាគីពាក់ព័ន្ធដោយសារតែគ្រោះថ្នាក់នេះ»។
មានរហូតដល់ ១២ ភាគរយនៃពាណិជ្ជកម្មទាំងអស់របស់ពិភពលោកត្រូវឆ្លងកាត់ព្រែកជីកស៊ុយអេ ដែលភ្ជាប់អឺរ៉ុបនិងអាស៊ីដោយភ្ជាប់សមុទ្រមេឌីទែរ៉ាណេនឹងសមុទ្រក្រហម។ នៅល្ងាចថ្ងៃពុធ នាវាជាង ១៥០ គ្រឿង កំពុងរង់ចាំឆ្លងកាត់ព្រែកនេះ។
នៅក្នុងសន្និសីទសារព័ត៌មាននៅទីក្រុងតូក្យូ កាលពីថ្ងៃព្រហស្បតិ៍ លោក Katsunobu Kato ប្រធានខុទ្ទកាល័យនាយករដ្ឋមន្ត្រីជប៉ុន បានមានប្រសាសន៍ថា រដ្ឋាភិបាលជប៉ុនកំពុងធ្វើការយ៉ាងជិតស្និទ្ធជាមួយអាជ្ញាធរអេហ្ស៊ីបលើបញ្ហានេះ។
ទោះជាយ៉ាងណាលោក Kato មានប្រសាសន៍ថា៖ «មិនមានពេលវេលាកំណត់ច្បាស់លាស់ថា អាចដោះស្រាយពេលណាទេ»។
អាជ្ញាធរព្រែកជីកស៊ុយអេនិយាយថា ក្នុងមួយថ្ងៃៗ នាវាប្រហែល ៥០ គ្រឿង រួមទាំងនាវាដឹកប្រេងផង ឆ្លងកាត់ផ្លូវទឹកប្រវែង ១៩៣ គីឡូម៉ែត្រដែលមនុស្សជីកនេះ។
ក្រុមហ៊ុនស្រាវជ្រាវទីផ្សារ Kpler ប្រាប់កាសែត The New York Times ថា ព្រែកជីកនេះផ្តល់សេវាប្រហែល ១ ភាគ ១០ នៃការផ្គត់ផ្គង់ប្រេងប្រចាំថ្ងៃក្នុងពិភពលោក។ របាយការណ៍ប្រព័ន្ធផ្សព្វផ្សាយបាននិយាយថា កប៉ាល់មួយចំនួនត្រូវបានគេបង្វែរទៅតាមផ្លូវផ្សេង រីឯកប៉ាល់ខ្លះទៀតបានទម្លាក់កុងតឺន័រដាក់លើឡានដឹកទំនិញដើម្បីដឹកចេញ៕
