វិធានការបិទសកម្មភាពសេដ្ឋកិច្ច និងសង្គមនៅទូទាំងពិភពលោក បានសង្គ្រោះជីវិតមនុស្សរាប់លាននាក់ពីការស្លាប់ដោយជំងឺកូវីដ១៩ នេះបើតាមការសិក្សាថ្មីមួយដែលបានចេញផ្សាយក្នុងទស្សនាវដ្តី Nature កាលពីថ្ងៃចន្ទ។
ការសិក្សាថ្មីនេះ ដែលធ្វើឡើងដោយមហាវិទ្យាល័យ Imperial College នៅទីក្រុងឡុងដ៏ប្រទេសអង់គ្លេសនេះបង្ហាញថា ការដាក់កំហិតរឹតត្បិតនានា រួមទាំងការបិទសាលារៀន និងអាជីវកម្មមិនចាំបាច់បានបង្ការការស្លាប់មនុស្ស៣លាននាក់ពីកូវីដ១៩នៅក្នុងប្រទេសអឺរ៉ុបចំនួន១១។
ការសិក្សាដាច់ដោយឡែកមួយទៀតដែលធ្វើឡើងដោយអ្នកស្រាវជ្រាវនៅសហរដ្ឋអាមេរិក និងចេញផ្សាយកាលពីថ្ងៃចន្ទដែរនោះ បានរកឃើញថា ចំណាត់ការរបស់អាជ្ញាធរក្នុងការរឹតត្បិតសកម្មភាពក្នុងសង្គមនៅក្នុងប្រទេសចិន កូរ៉េខាងត្បូង អ៊ីតាលី អ៊ីរ៉ង់ បារាំង និងសហរដ្ឋអាមេរិក បានបង្ការ ឬពន្យារការឆ្លងវីរុសដែលបង្កជំងឺកូវីដ១៩ ដល់មនុស្សប្រមាណ៥៣០លាននាក់។
គិតមកត្រឹមថ្ងៃចន្ទ នៅជុំវិញពិភពលោក វីរុសកូរ៉ូណាបានឆ្លងដល់មនុស្សជាង៧លាននាក់ហើយ ដោយមាន អ្នកស្លាប់ពីជំងឺកូវីដ១៩ចំនួនជាង៤០៣.០០០នាក់ នេះបើតាមតួលេខពីសាកលវិទ្យាល័យ Johns Hopkins នៅសហរដ្ឋអាមេរិក។
សហរដ្ឋអាមេរិកនៅតែជាប្រទេសដែលមានករណីស្លាប់ដោយកូវីដ១៩ ច្រើនជាងគេ ហើយបន្ទាប់មកមានប្រទេសអង់គ្លេស ប្រេស៊ីល និងអ៊ីតាលី។ សហរដ្ឋអាមេរិកក៏ជាប្រទេសមានការឆ្លងកូវីដ១៩ ច្រើនជាងគេដែរ ដោយកាលពីថ្ងៃចន្ទមានអ្នកឆ្លងជិត២លាននាក់ ហើយអាជ្ញាធរបានទទូចឲ្យពលរដ្ឋអាមេរិកដែលបានចូលរួមក្នុងមហាបាតុកម្មអស់ជិតពីរសប្តាហ៍មកនេះដើម្បីទាមទារយុត្តិធម៌ចំពោះការសា្លប់របស់បុរសស្បែកខ្មៅលោក George Floyd ទៅធ្វើតេស្តរកវីរុសកូរ៉ណា៕
