មេដឹកនាំកូរ៉េខាងជើងលោក គីម ជុងអ៊ុន បានធ្វើទស្សនកិច្ចទៅកាន់ប្រទេសចិនក្នុងសប្តាហ៍នេះ នៅក្នុងទស្សនកិច្ចមិនផ្លូវការមួយ។ នេះបើយោងតាមទីភ្នាក់ងារសារព័ត៌មានរបស់រដ្ឋ ស៊ីនហួរ នៅក្នុងប្រទេសចិន ដែលបានចេញផ្សាយនៅថ្ងៃពុធនេះ។
នេះគឺជាទស្សនកិច្ចទៅកាន់បរទេសជាលើកដំបូងបង្អស់របស់មេដឹកនាំកូរ៉េខាងជើងរូបនេះ ចាប់តាំងពីឡើងកាន់អំណាចកាលពីឆ្នាំ២០១១មក។
បណ្តាញសារព័ត៌មានបានរាយការណ៍ថា គេជឿថារថភ្លើងមួយគ្រឿងបានដឹកគណៈប្រតិភូរបស់កូរ៉េខាងជើងចេញពីទីក្រុងប៉េកាំង ខណៈមានការយាមកាមសន្តិសុខតឹងរ៉ឹងនៅក្នុងទីក្រុងនេះ។ ប៉ុន្តែគេនៅមិនទាន់ច្បាស់នៅឡើយទេថា នរណាខ្លះជិះលើរថភ្លើងនោះ។
មានការសង្ស័យថាគណៈប្រតិភូកូរ៉េខាងជើងបានធ្វើទស្សនកិច្ចក្នុងប្រទេសចិនកាលពីថ្ងៃចន្ទ បន្ទាប់ពីវីដេអូមួយពីទូរទស្សន៍របស់ជប៉ុនបានចាប់រូបភាពរថភ្លើងពណ៌បៃតងមួយគ្រឿងដែលមើលទៅរាងចាស់បានមកដល់ទីក្រុងប៉េកាំង។
បណ្តាញ NTV របស់ជប៉ុនបានផ្សាយថា រថភ្លើងដែលមានពណ៌បៃតងនិងលឿងនោះគឺស្រដៀងទៅនឹងរថភ្លើងរបស់អតីតមេដឹកនាំកូរ៉េខាងជើង លោក គីម ជុងអ៊ីល ដែលជាឪពុករបស់លោក គីម ជុងអ៊ុន ដែលបានទទួលមរណភាពហើយនោះ បានជិះទៅទីក្រុងប៉េកាំង កាលពីឆ្នាំ២០១១។
លោក គីម ជុងអ៊ីល គឺជាមេដឹកនាំកូរ៉េខាងជើងតែម្នាក់គត់ដែលជិះរថភ្លើងឯកជនដើម្បីជួបជាមួយនឹងមេដឹកនាំនៅទីក្រុងប៉េកាំង។
ទស្សនកិច្ចលើកនេះរបស់មេដឹកនាំកូរ៉េខាងជើងឬបងប្អូនស្រីរបស់លោក ដែលដើរតួនាទីយ៉ាងសំខាន់ជាបេសកជនការទូតពិសេសម្នាក់មកពីកូរ៉េខាងជើង នឹងនាំឲ្យមានទំនាក់ទំនងការទូតកាន់តែទូលំទូលាយ៕
