ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

ប្រទេស​ស្រីលង្កា​ថា មូលនិធិ​រូបិយវត្ថុ​អន្តរជាតិ IMF នឹង​ពិចារណា​​សំណើ​សុំ​ជំនួយ​បន្ទាន់​របស់ខ្លួន


បាតុករ​ម្នាក់​កាន់​ទង់ជាតិ​ស្រីលង្កា​ក្នុង​អំឡុង​ការតវ៉ា​ប្រឆាំង​នឹង​ប្រធានាធិបតី​ស្រីលង្កា​លោក Gotabaya Rajapaksa ក្នុង​ពេល​មាន​វិបត្តិ​សេដ្ឋកិច្ច​ក្នុង​ទីក្រុង​កូឡុំបូ ប្រទេស​ស្រីលង្កា ថ្ងៃទី១៥ ខែមេសា ឆ្នាំ២០២២។

មូលនិធិ​រូបិយវត្ថុ​អន្តរជាតិ IFM នឹង​ពិចារណាផ្តល់​ជំនួយ​ហិរញ្ញវត្ថុ​សង្គ្រោះ​បន្ទាន់​មួយ​ទៅ​ឲ្យ​ប្រទេស​ស្រីលង្កា​ដែល​កំពុង​វណ្ឌក​ដោយសារ​បំណុល​បរទេសនោះ។ នេះ​បើតាម​ការ​ឲ្យ​ដឹង​របស់​ក្រសួង​ហិរញ្ញវត្ថុ​ប្រទេស​ស្រីលង្កា​នៅ​ថ្ងៃ​អង្គារ​នេះ​ បន្ទាប់ពី​មាន​ការជួយ​អន្តរាគមន៍​តំណាងដោយ​ប្រទេស​ឥណ្ឌា។ នេះបើ​តាម​សេចក្តីរាយការណ៍​របស់​ទីភ្នាក់ងារ​ព័ត៌មាន Reuters។

គណៈប្រតិភូ​ស្រីលង្កា​ដែល​ដឹកនាំ​ដោយ​រដ្ឋមន្ត្រី​ក្រសួង​ហិរញ្ញវត្ថុ​លោក Ali Sabry បាន​ជួប​ពិភាក្សា​ជាមួយ​មូលនិធិ IMF ក្នុង​រដ្ឋធានី​វ៉ាស៊ីនតោន​កាលពី​ថ្ងៃ​ចន្ទ​ម្សិលមិញ​ស្តីពី​កម្មវិធី​មួយ​ដែល​រដ្ឋាភិបាល​ស្រីលង្កា​សង្ឃឹម​ថា នឹងជួយបង្កើន​ដល់​ប្រាក់​បម្រុង​របស់​ខ្លួន​និង​ធ្វើ​ជា​ស្ពាន​ហិរញ្ញវត្ថុ​ដើម្បី​ទិញទំនិញ​ចាំបាច់​នានា​ពី​ក្រៅ​ប្រទេស​ដូច​ជា​ប្រេង​ឥន្ទនៈ ស្បៀង​អាហារ និង​ថ្នាំ​ពេទ្យ​ជាដើម។

លោក Shamir Zavahir ដែល​ជា​ទីប្រឹក្សា​មួយ​រូប​របស់​រដ្ឋមន្ត្រី​ហិរញ្ញវត្ថុ​ស្រីលង្កា បាន​បង្ហោះសារ​មួយ​នៅ​លើ Twitter ថា ស្រីលង្កាបាន​ស្នើ​សុំ​កម្ចី​មួយ​នៅ​ក្រោម​កម្មវិធី​ហិរញ្ញវត្ថុ​បន្ទាន់​ ឬ RFI សម្រាប់​ប្រទេស​ដែល​ត្រូវការការគាំទ្រ​ជា​បន្ទាន់នៃ​តុល្យភាពសម្រាប់​ការបង់​ថ្លៃ​របស់​ខ្លួន​នោះ។ លោក​ថា មូលនិធិ IMF មិន​ទាន់​បដិសេធ​នូវ​សំណើ​សុំ​នេះ​ទេ។

សេចក្តីថ្លែងការណ៍​របស់ក្រសួង​ហិរញ្ញវត្ថុ​ស្រីលង្កា បាន​និយាយ​ថា «មូលនិធិ IMF បាន​ប្រាប់​ទៅ​រដ្ឋមន្ត្រី​ហិរញ្ញវត្ថុ​ស្រី​លង្កា​ថា ប្រទេស​ឥណ្ឌា​បាន​ធ្វើ​ជា​តំណាង​ឲ្យប្រទេស​ស្រីលង្កា​នៅ​ក្រោម​កម្មវិធី​កម្ចី RFI នេះ»។

វិបត្តិ​ហិរញ្ញវត្ថុរបស់​ស្រីលង្កា​កើត​មាន​ឡើង​ ខណៈ​ពេល​ដែល​ជំងឺ​រាតត្បាត​កូវីដ១៩ បាន​ប៉ះពាល់​ដល់​ស្ថានភាព​ហិរញ្ញវត្ថុ​របស់​ប្រទេស​នេះ​ដែលចាត់ចែង​មិន​បាន​ត្រឹម​ត្រូវ​ ក៏​ដូច​ជា​ការ​ឡើង​ថ្លៃ​ខ្ពស់​នៃ​ប្រេង​ឥន្ធនៈ​ដែល​ធ្វើ​ឲ្យ​ប៉ះពាល់​ដល់​ប្រាក់​បម្រុង​បរទេស​របស់​ខ្លួននោះ។

កង្វះ​ប្រេង​ឥន្ធនៈ ស្បៀងអាហារ និង​ថ្នាំពេទ្យ​ កំពុង​កើត​មាន​ឡើង​នៅ​ក្នុង​ប្រទេស​នេះ អស់​រយៈ​ពេល​ជា​ច្រើន​សប្តាហ៍​កន្លង​ទៅ។

ការតវ៉ា​នៅ​តាម​ដង​ផ្លូវ បាន​កើត​មាន​ឡើងប្រឆាំង​នឹងប្រធានាធិបតី​ស្រីលង្កា​លោក Gotabaya Rajapaksa និង​នាយក​រដ្ឋមន្ត្រី​ដែល​ជា​ប្អូន​ប្រុស​របស់​លោក គឺ​លោក​ Mahinda Rajapaksa នៅ​ក្នុង​ប្រទេស​កោះ​មួយនេះ​ដែល​មាន​ប្រជាពលរដ្ឋ​សរុប​ប្រមាណ២២លាននាក់៕

XS
SM
MD
LG