នាយករដ្ឋមន្រ្តីនៃប្រទេសស្រីលង្កាលោក Ranil Wickremesinghe បាននិយាយថា ការបំផ្ទុះគ្រាប់បែកអត្តឃាត ដែលបានបំផ្លាញប្រទេសនោះនៅថ្ងៃបុណ្យប៉ាកកាលពីថ្ងៃអាទិត្យ អាចមានជាប់ទាក់ទិននឹងក្រុមរដ្ឋឥស្លាម ដែលបានអះអាងទទួលខុសត្រូវ។
មន្រ្តីម្នាក់ទៀតនិយាយថា ការបំផ្ទុះគ្រាប់បែកនោះជាការសងសឹកចំពោះការវាយប្រហារលើវិហារឥស្លាមកាលពីខែមុននៅក្នុងប្រទេសនូវែលសេឡង់។ កាលពីថ្ងៃអង្គារ ស្រីលង្កាបានធ្វើការកាន់ទុក្ខទូទាំងប្រទេសរយៈពេលមួយថ្ងៃនៅពេលដែលចំនួនអ្នកស្លាប់បានកើនឡើងដល់ ៣២១នាក់។
ការផ្ទុះនោះបានកម្ទេចសណ្ឋាគារចំនួន ៤និងវិហារគ្រឹស្តសាសនាដ៏ល្បីល្បាញចំនួន ៣ ដែលមានគោលដៅលើអ្នកទេសចរ និងអ្នកសូត្រធម៌គ្រឹស្តសាសនា។
លោកនាយករដ្ឋមន្រ្តី Wickremesinghe បាននិយាយនៅឯសន្និសីទកាសែតថា «យើងនឹងតាមដានការអះអាងរបស់ក្រុមរដ្ឋឥស្លាម។ យើងជឿជាក់ថា អាចមានការជាប់ទាក់ទិន»។
ពេលដែលកន្លែងកើតហេតុមានការកាន់ទុក្ខយ៉ាងខ្លាំងនិងការសូត្រធម៌របស់អ្នកបន់ស្រន់ ពិធីបុណ្យសពដ៏ធំលើកទី១ បានធ្វើឡើងនៅឯវិហារគ្រឹស្តសាសនា St. Sebastian ក្នុងទីក្រុងNegombo ដែលបានរងការបំផ្លិចបំផ្លាញដ៏អាក្រក់អាក្រីបំផុត។
ពលរដ្ឋនៅទូទាំងប្រទេសបានឱនក្បាលនិងស្មឹងស្មាតរយៈពេល ៣នាទីនៅម៉ោង ៨និង៣០នាទីម៉ោងក្នុងស្រុក ដែលកត់សម្គាល់នៃការចាប់ផ្តើមនៃការផ្ទុះលើកទី១ដែលបានធ្វើឲ្យរង្គើប្រទេស។ ទង់ជាតិនៅអាគាររដ្ឋាភិបាលបានបញ្ចុះនៅពាក់កណ្តាលដង ហើយក្រុមអ្នកកាន់ទុក្ខបានកាន់ទៀននៅខាងក្រៅវិហារគ្រឹស្តសាសនាមួយទៀត ដែលបានត្រូវបានរងការវាយប្រហារនៅក្នុងរដ្ឋធានីកូឡុំបូ៕
