ក្នុងកិច្ចប្រឹងប្រែងដើម្បីបង្ការការឆ្លងវីរុសកូរ៉ូណាថ្មីពីបរទេស ខណៈការរាតត្បាតក្នុងប្រទេសថយចុះ ប្រទេសអេស្ប៉ាញបានតម្រូវឲ្យអ្នកធ្វើដំណើរមកពីក្រៅប្រទេសទាំងអស់ត្រូវដាក់ឲ្យស្ថិតនៅដាច់ដោយឡែកពីគេរយៈពេលពីរសប្តាហ៍។
អេស្ប៉ាញទើបរើបខ្លួនពីវិធានការរឹតត្បិតសកម្មភាពសង្គមដ៏តឹងតែងរយៈពេល៧សប្តាហ៍ បន្ទាប់ពីប្រទេសនេះបានក្លាយជាកន្លែងមានករណីផ្ទុះរាតត្បាតនៃជំងឺឆ្លងកូវីដ១៩ដ៏ធ្ងន់ធ្ងរបំផុតមួយក្នុងពិភពលោក។
បទបញ្ជាមួយរបស់ក្រសួងសុខាភិបាលអេស្ប៉ាញដែលត្រូវបានផ្សាយក្នុងថ្ងៃអង្គារនេះ ហើយដែលចូលជាធរមាននៅថ្ងៃសុក្រនឹងអនុវត្តចំពោះទាំងពលរដ្ឋអេស្ប៉ាញនិងជនបរទេស។ ក្នុងរយៈពេល១៤ថ្ងៃនោះ ពួកគេត្រូវបានអនុញ្ញាតឲ្យចេញក្រៅ តែដើម្បីទៅទិញអាហារនិងទៅពេទ្យប៉ុណ្ណោះ។
អាជ្ញាធរចិនបានប្រើវិធានការរឹតត្បិតអ្នកមកពីបរទេសដូច្នេះដែរ ខណៈដែលករណីឆ្លងក្នុងប្រទេសចិនបានធ្លាកចុះយ៉ាងខ្លាំង ហើយដែលបានអនុញ្ញាតឲ្យអាជ្ញាធរនៅទីនោះបន្ធូរបន្ថយវិធានការដាក់កំហិតខ្លះ។
រដ្ឋាភិបាលនៅជុំវិញពិភពលោកកំពុងថ្លឹងថ្លែងយុទ្ធសាស្ត្រវិធានការរបស់ពួកគេ ថាតើដល់ពេលត្រូវដាក់កំហិតជាថ្មីដើម្បីទប់ស្កាត់ការឆ្លងកូវីដ១៩ ឬអនុញ្ញាតឲ្យពលរដ្ឋអាចចូលរួមសកម្មភាពសង្គមខ្លះវិញបាន។
ជាឧទាហរណ៍ អាជ្ញាធរប្រទេសសិង្ហបុរី និងឥណ្ឌា បានអនុញ្ញាតឲ្យពលរដ្ឋចេញទៅហាងកាត់សក់និងបើកដំណើរការសេវារថភ្លើងឡើងវិញដោយប្រុងប្រយ័ត្ន។ ក៏ប៉ុន្តែនៅកូរ៉េខាងត្បូង អាជ្ញាធរកំពុងបារម្ភអំពីការផ្ទុះរាលដាលថ្មីក្រោយពីការបន្ធូរបន្ថយនេះ ដែលបាននាំឲ្យមានការឆ្លងនៅក្លឹបកម្សាន្តមួយក្នុងទីក្រុងសេអ៊ូល ហើយដែលមកដល់ពេលនេះមានអ្នកឆ្លង១០០នាក់ហើយ។ នៅក្នុងថ្ងៃអង្គារនេះអាជ្ញាធរស្រវាស្រទេញប្រើទិន្នន័យទូរស័ព្ទនិងប័ណ្ណឥណទានរបស់មនុស្សជាង២.០០០នាក់ ដើម្បីស្វែងរកឲ្យពួកគេទៅធ្វើតេស្តរកវីរុសកូរ៉ូណា។
ការធ្វើតេស្តក៏ជាការផ្តោតខ្លាំងនៅសហរដ្ឋអាមេរិកដែរ ដោយរដ្ឋបាលលោកប្រធានាធិបតីដូណាល់ ត្រាំ និយាយថាមកទល់ពេលនេះមានពលរដ្ឋអាមេរិក៩លាននាក់ត្រូវបានធ្វើតេស្ត ហើយការធ្វើតេស្តដោយប្រើ antigen ថ្មីមួយនឹងជួយឲ្យគេអាចធ្វើតេស្តបានកាន់តែលឿន។
អង្គការសុខភាពពិភពលោកបានអំពាវនាវឲ្យប្រទេសនានាគ្រប់គ្រងការឆ្លងជំងឺកូវីដ១៩ឲ្យបានសិនមុននឹងបន្ធូរបន្ថយវិធានការរឹតត្បិតសកម្មភាពសង្គមនានា។
នៅទូទាំងពិភពលោក គិតមកត្រឹមថ្ងៃអង្គារនេះ មានអ្នកឆ្លងវីរុសកូរ៉ូណាប្រមាណ៤លាន២សែននាក់ ហើយអ្នកស្លាប់សរុបពីជំងឺកូវីដ១៩ចំនួនជាង២៨៦.០០០នាក់៕
