ប្រធានាធិបតីសហរដ្ឋអាមេរិក លោក Joe Biden នឹងទទួលស្វាគមន៍ប្រធានាធិបតីកូរ៉េខាងត្បូងលោក Yoon Suk Yeol ក្នុងដំណើរទស្សនកិច្ចផ្លូវរដ្ឋមកកាន់សហរដ្ឋអាមេរិក នៅថ្ងៃទី២៦ ខែមេសាខាងមុខនេះ។
អ្នកនាំពាក្យសេតវិមានលោកស្រី Karine Jean-Pierre បានប្រាប់ក្រុមអ្នកយកព័ត៌មាននៅថ្ងៃអង្គារម្សិលមិញថា ទស្សនកិច្ចរបស់ប្រធានាធិបតីកូរ៉េខាងត្បូង គឺដើម្បីប្រារព្ធខួបទី៧០នៃសម្ព័ន្ធភាពសន្តិសុខរវាងសហរដ្ឋអាមេរិកនិងប្រទេសកូរ៉េខាងត្បូង។ សម្ព័ន្ធភាពសន្តិសុខរវាងប្រទេសទាំងពីរ ត្រូវបានបង្កើតឡើងក្រោយសង្គ្រាមកូរ៉េដែលមានរយៈពេល៣ឆ្នាំ ដែលត្រូវបានបញ្ចប់ដោយបទឈប់បាញ់គ្នាមួយក្នុងឆ្នាំ១៩៥៣ ដែលធ្វើឱ្យឧបទ្វីបកូរ៉េត្រូវបែងចែកជាពីរប្រទេសរហូតដល់សព្វថ្ងៃ ដែលម្ខាងជាប្រទេសកុម្មុយនីស្តកូរ៉េខាងជើង និងម្ខាងទៀតជាប្រទេសកូរ៉េខាងត្បូងដែលដើរតាមគន្លងប្រជាធិបតេយ្យ។
ដំណើរទស្សនកិច្ចរបស់ប្រធានាធិបតីកូរ៉េខាងត្បូងនេះ ជាផ្នែកមួយនៃកិច្ចប្រឹងប្រែងរបស់លោក Biden ក្នុងការស្ថាបនានិងរក្សាទំនាក់ទំនងជាមួយភាគីក្នុងតំបន់ ដើម្បីជាមធ្យោបាយមួយ ទប់ទល់នឹងវត្តមានសេដ្ឋកិច្ចនិងយោធាកាន់តែខ្លាំងឡើងរបស់ចិន ក៏ដូចជាកម្មវិធីមីស៊ីលបាលីស្ទិកនិងអាវុធនុយក្លេអ៊ែររបស់កូរ៉េខាងជើងផងដែរ បើទោះបីជាមានការដាក់ទណ្ឌកម្មជាច្រើនលើករបស់អង្គការសហប្រជាជាតិទៅលើប្រទេសនេះក្តី។
នេះជាដំណើរទស្សនកិច្ចផ្លូវរដ្ឋលើកទី១របស់មេដឹកនាំកូរ៉េខាងត្បូងចាប់តាំងពីឆ្នាំ២០១១មក នៅពេលដែលអតីតប្រធានាធិបតីអាមេរិកលោក Barack Obama ទទួលអតីតប្រធានាធិបតីកូរ៉េខាងត្បូងលោក Lee Myung-bak។ នេះក៏ជាការទទួលដំណើរទស្សនកិច្ចផ្លូវរដ្ឋជាលើកទី២ផងដែររបស់លោក Biden ដែលលើកទីមួយ លោកបានទទួលស្វាគមន៍ប្រធានាធិបតីបារាំងលោក Emmanuel Macron កាលពីខែធ្នូឆ្នាំទៅ៕
(ព័ត៌មានខ្លះនៅក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន APនិង Reuters)
