ប្រទេសកូរ៉េខាងជើងនៅថ្ងៃសុក្រនេះបានព្រមានធ្វើការឆ្លើយតបមួយដែលមិនធ្លាប់មានពីមុន ប្រសិនបើសហរដ្ឋអាមេរិកនិងកូរ៉េខាងត្បូងនៅតែមានគម្រោងធ្វើសមយុទ្ធយោធារួមគ្នាទៅតាមផែនការរបស់ខ្លួនដែលជាការបង្កើនការឆ្លើយតបថ្មីៗទៅនឹងការ សាកល្បងអាវុធជាបន្តបន្ទាប់របស់កូរ៉េខាងជើង។
នៅក្នុងការធ្វើអត្ថាធិប្បាយដែលត្រូវបានចេញផ្សាយដោយទីភ្នាក់ងារសារព័ត៌មានមជ្ឈិមកូរ៉េខាងជើង ក្រសួងការបរទេសកូរ៉េខាងជើងបានបញ្ជាក់ថាឧបទ្វីបកូរ៉េជាថ្មីម្តងទៀតនឹងធ្លាក់ទៅក្នុងភាពតានតឹងដ៏ធ្ងន់ធ្ងរ ប្រសិនបើសមយុទ្ធយោធារួមគ្នារវាងអាមេរិកនិងកូរ៉េខាងត្បូងនឹងធ្វើដូចការគ្រោងទុកមែននោះ។
សេចក្តីថ្លែងការណ៍របស់កូរ៉េខាងជើងបានបញ្ជាក់ថា៖ «ក្នុងករណីអាមេរិកនិងកូរ៉េខាងត្បូងអនុវត្តនូវការធ្វើសមយុទ្ធយោធា ដូចដែលគេបានប្រកាសរូចហើយមែននោះ ពួកគេនឹងប្រឈមនូវប្រតិកម្មឆ្លើយតបដ៏ខ្លាំងនិងយូរអង្វែងដែលមិនធ្លាប់មានក្នុងពេលកន្លងមក»។
នៅថ្ងៃសុក្រនេះដែរ យោធាកូរ៉េខាងត្បូងបានប្រកាសថាខ្លួននឹងធ្វើសមយុទ្ធយោធាក្នុងថ្នាក់រៀនមួយនៅក្រសួងការពារជាតិអាមេរិកនៅថ្ងៃពុធខាងមុខនេះដោយរៀបចំធ្វើត្រាប់ដូចការវាយប្រហារពិតប្រាកដមួយដោយអាវុធនុយក្លេអ៊ែររបស់កូរ៉េខាងជើង។
ក្រសួងការពារជាតិកូរ៉េខាងត្បូងនិយាយថាលំហាត់សមយុទ្ធក្នុងថ្នាក់រៀននេះក៏នឹងរួមមានផងដែរនូវការទៅមើលមូលដ្ឋានកងនាវាជើងទឹកអាមេរិកនៅរដ្ឋGeorgia ភាគនិរតីអាមេរិកជាទីកន្លែងដែលមាននាវាមុជទឹកដើរដោយថាមពលនុយក្លេអ៊ែរដ៏សំខាន់របស់អាមេរិកផងដែរ។
លំហាត់សមយុទ្ធយោធានេះគឺក្នុងន័យដើម្បីផ្តល់ឱ្យមន្ត្រីកូរ៉េខាងត្បូងនូវការយល់ដឹងកាន់តែប្រសើរឡើងថែមទៀត ពីរបៀបដែលសម្ព័ន្ធមិត្តអាមេរិកត្រូវឆ្លើយតបយ៉ាងណា ក្នុងករណីដែលមានកាវាយប្រហារដោយអាវុធនុយក្លេអ៊ែររបស់កូរ៉េខាងជើងនោះ។
ក្រុមមន្ត្រីកូរ៉េខាងត្បូងរួមទាំងប្រធានាធិបតីរបស់ខ្លួនគឺលោក Yoon Suk Yeolបានបង្ហាញពីភាពមិនច្បាស់លាស់នៅឡើយពីប្រសិទ្ធភាពនៃការប្តេជ្ញាចិត្តការពាររបស់អាមេរិកចំពោះកូរ៉េខាងត្បូង។
ជាការប្រឹងប្រែងក្នុងការធានាដល់កូរ៉េខាងត្បូងនោះ រដ្ឋមន្ត្រីការពារជាតិអាមេរិកលោក Lloyd Austin កាលពីខែមុន បានសន្យាបង្កើនការបង្ហាញកម្លាំងយោធា ដល់កូរ៉េខាងត្បូង ដែលរួមមានការដាក់ពង្រាយឧបករណ៍យុទ្ធសាស្ត្ររបស់អាមេរិក ដែលមានយន្តហោះទម្លាក់គ្រាប់បែកចម្ងាយឆ្ងាយ យន្តហោះបំពាក់នុយក្លេអ៊ែរនិងក្រុមនាវាផ្ទុកយន្តហោះប្រយុទ្ធជាដើម៕
កូរ៉េខាងជើងគំរាមឆ្លើយតប«ដែលមិនធ្លាប់មានពីមុន»ចំពោះសមយុទ្ធយោធារវាងអាមេរិកនិងកូរ៉េខាងត្បូង
ក្រុងសេអ៊ូល ប្រទេសកូរ៉េខាងត្បូង —
