នៅថ្ងៃព្រហស្បតិ៍នេះ កូរ៉េខាងត្បូងសាទរចំពោះសេចក្តីសម្រេចរបស់សហរដ្ឋអាមេរិកក្នុងការហៅប្រទេសកូរ៉េខាងជើងថាជា «ក្តីបារម្ភអំពីការលាងលុយកខ្វក់សាកលលោក» ដែលមានគោលបំណងទុករដ្ឋាភិបាលក្រុងព្យុងយ៉ាង ឲ្យនៅឯកោពីប្រព័ន្ធហិរញ្ញវត្ថុសាកលលោក។ លោក Cho June-Hyuck អ្នកនាំពាក្យរបស់ក្រសួងការបរទេសរបស់កូរ៉េខាងត្បូងបាននិយាយថា ការណ៍នេះឆ្លុះបញ្ចាំងពីឆន្ទៈមោះមុតរបស់រដ្ឋាភិបាលក្រុងវ៉ាស៊ីនតោន ក្នុងការអនុវត្តទៅតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ២២៧០ និងដាក់ទណ្ឌកម្មធ្ងន់ធ្ងរដល់ប្រទេសកូរ៉េខាងជើងជុំវិញកម្មវិធីនុយក្លេអ៊ែរ និងមីស៊ីលរបស់ប្រទេសនេះ។
អ្នកនាំពាក្យក្រសួងការបរទេសអាមេរិក លោក John Kirby កាលពីថ្ងៃពុធបានប្រកាសអំពីការស្នើចំណាត់ការថ្មីរបស់ក្រសួងរតនាគារជាតិអាមេរិក ដែលមានគោលបំណងរារាំងមិនឲ្យមានសកម្មភាពហិរញ្ញវត្ថុដោយផ្ទាល់ និងប្រយោលរបស់កូរ៉េខាងជើងនៅក្នុងប្រព័ន្ធធនាគាររបស់សហរដ្ឋអាមេរិកនោះទេ។
អ្នកនាំពាក្យក្រសួងការបរទេសកូរ៉េខាងត្បូងរូបនោះបាននិយាយថា ចំណាត់ការចុងក្រោយបង្អស់របស់សហរដ្ឋអាមេរិកមួយនេះអាចនឹងធ្វើបានជោគជ័យច្រើនជាងចំណាត់ការកាលពីឆ្នាំ២០០៥ទៅលើធនាគារ Banco Delta Asia ដែលមានមូលដ្ឋាននៅម៉ាកាវ។ ចំណាត់ការនោះបានធ្វើឲ្យមានការបង្កកប្រាក់២៥លានដុល្លារនៅក្នុងគណនីធនាគាររបស់កូរ៉េខាងជើងមួយចំនួន។ ការបង្កកប្រាក់នោះបានធ្វើឲ្យកូរ៉េខាងជើងសន្យាថានឹងដកកម្មវិធីនុយក្លេអ៊ែររបស់ខ្លួនចេញ។
ខណៈពេលជាមួយគ្នានោះដែរ ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ បានសម្រេចជាឯកច្ឆ័ន្ទថ្កោលទោសទៅលើការសាកល្បងគ្រាប់មីស៊ីលនាពេលបច្ចុប្បន្ននេះរបស់កូរ៉េខាងជើង ដោយបានហៅសកម្មភាពនេះថាជាការបំពានយ៉ាងធ្ងន់ធ្ងរទៅលើសេចក្តីសម្រេចរបស់អង្គការសហប្រជាជាតិកាលពីលើកមុន ដែលហាមឃាត់រាល់សកម្មភាពពាក់ព័ន្ធនឹងគ្រាប់មីស៊ីលនិងនុយក្លេអ៊ែរ។ ក្រុមប្រឹក្សានេះបានស្នើឲ្យប្រទេសជាសមាជិកទាំងអស់បង្កើនកិច្ចខិតខំប្រឹងប្រែងទ្វេដង ដើម្បីអនុវត្តសេចក្តីសម្រេចកាលពីលើកមុន និងបានព្រមានកូរ៉េខាងជើងអំពីការចាត់វិធានការចាំបាច់បន្ថែមទៀត៕
