ធនាគារបម្រុងរបស់ប្រទេសស៊ីមបាវ៉េ បានឲ្យដឹងថា ខ្លួនមិនបានផ្តល់សិទ្ធិអំណាចឲ្យក្រុមនាយកគ្រប់គ្រងក្រុមហ៊ុនដ៏ធំឈ្មោះ Innscor Africa បើកគណនីធនាគារក្រៅប្រទេសឡើយ។ គណនីទាំង នោះ ត្រូវបានលាតត្រដាងនៅក្នុងការស៊ើបអង្កេតលើឯកសារសម្ងាត់ដែលបែកធ្លាយពីប្រទេសប៉ាណាម៉ា។
ឯកសារត្រូវបានរកឃើញពីការស៊ើបអង្កេតនេះ បានបង្ហាញថា នាយកគ្រប់គ្រងក្រុមហ៊ុន Innscor Africa ឈ្មោះ Zinona (Zed) Koudounaris និងឈ្មោះ Michael Fowler បានបើកក្រុមហ៊ុនចំនួនបួននៅប្រជុំកោះ British Virgin និងបានផ្ទេរលុយពីប្រាក់ខែរបស់ពួកគេ ទៅក្រុមហ៊ុនទាំងនោះ កាលពីដើមឆ្នាំមុន ដោយធ្វើប្រតិបត្តិការតាមរយៈមេធាវី និងគណនេយ្យករ។
ទង្វើបែបនេះគឺជាការបំពានច្បាប់ប្រទេសស៊ីមបាវ៉េ ដែលការពារលុយដែលរកបាននៅក្នុងប្រទេសស៊ីមបាវ៉េ មិនឲ្យដាក់ផ្ញើនៅក្នុងគណនីធនាគារក្រៅប្រទេស លុះត្រាតែមានការអនុម័តយល់ព្រមពីធនាគារកណ្តាល។
VOA ផ្សាយជាភាសាស៊ីមបាវ៉េ បានព្យាយាមទូរស័ព្ទទៅលោក Koudounaris និងលោក Fowler ដើម្បីសាកសួរយោបល់ ប៉ុន្តែ ភរិយារបស់់លោកទាំងពីរនេះ បានឲ្យដឹងថា ពួកគេកំពុងនៅក្រៅប្រទេស។
លោក Addington Chinake ប្រធានគណៈគ្រប់គ្រងរបស់ក្រុមហ៊ុន Innscor Africa បាននិយាយថារាល់ការផ្ទេរហិរញ្ញវត្ថុទាំងអស់ របស់ក្រុមហ៊ុន Innscor «រៀបចំធ្វើឡើងដោយស្របច្បាប់នៃការផ្ទេរប្រាក់ ដែលអនុលោមទៅតាមវិធានច្បាប់ពាក់ព័ន្ធទាំងអស់ រួមទាំងច្បាប់ទាំងឡាយរបស់ធនាគារបម្រុងនៃប្រទេសស៊ីមបាវ៉េផងដែរ»។
មេធាវីម្នាក់ឈ្មោះ Chinake បានប្រាប់ VOA ថា «ក្រុមហ៊ុន Innscor Africa Limited គ្មានហេតុផលអ្វីដែលត្រូវផ្ទេរលុយប្រាក់ខែបូកឡើងជាបន្តបន្ទាប់ ទៅក្នុងអង្គភាពធនាគារណាមួយដូចដែលបានចោទនោះទេ»។
នៅពេលស្នើឲ្យបញ្ជាក់ពីទំនាក់ទំនងរបស់ Koudounaris និង Fowler ជាមួយនឹងក្រុមហ៊ុនច្បាប់ និងគណនេយ្យដែលជាប់ពាក់ព័ន្ធនឹងការផ្ទេរលុយនោះ Chinake បាននិយាយថា «នៅដំណាក់កាលនេះ គ្មានអ្វីត្រូវនិយាយទៀតទេ»។
ប្រភពថវិកា៖ «ប្រាក់បៀរវត្សរ៍កើនឡើងជាបន្តបន្ទាប់»
លោក Ray Choto នៃ VOA ស៊ីមបាវ៉េ គឺជាអ្នកយកព័ត៌មានដៃគូជាមួយសមាគមអ្នកកាសែតស៊ើបអង្កេតអន្តរជាតិ (International Consortium of Investigative Journalists)។ សមាគមនេះកំពុងពិនិត្យមើលឯកសារជាង១១លានច្បាប់ មកពីក្រុមហ៊ុនច្បាប់របស់ប៉ាណាម៉ា ដែលបញ្ចេញឲ្យឃើញនូវបណ្តាញទូទាំងពិភពលោកនៃកន្លែងគេចពន្ធនៅក្រៅប្រទេសដ៏អាថ៌កំបាំង។
លោក Choto និយាយថា លោកបានប្រទះឃើញឈ្មោះ Koudounaris និង Fowler នៅពេលកំពុងស្វែងរកឯកសារអំពីក្រុមហ៊ុន និងជនដែលមានជាប់ពាក់ព័ន្ធនឹងប្រទេសស៊ីមបាវ៉េ។ លោកបានឲ្យដឹងថា «មានឯកសាររាប់ពាន់» ពាក់ព័ន្ធនឹងបុរសពីរនាក់នេះ។
ឯកសារទាំងនោះបង្ហាញថា លោក Koudounaris និងលោក Fowlerប្រើក្រុមហ៊ុនច្បាប់នៅស៊ីមបាវ៉េ ឈ្មោះ Mossack Fonseca និងក្រុមហ៊ុនគណនេយ្យ Northern Wychwood ដើម្បីចុះឈ្មោះក្រុមហ៊ុននៅក្រៅប្រទេស ចំនួនបួនដែលមានឈ្មោះហៅថា ក្រុមហ៊ុន Federated Properties Holdings Limited ក្រុមហ៊ុន Skyfox ក្រុមហ៊ុន Acia Aero Limited និងក្រុមហ៊ុន Acia Aero Holdings។
នៅខែមករា ឆ្នាំ២០១៥ អ្នកស្រី Sophia Birchall ជាភ្នាក់ងាររដ្ឋបាល និងជាអ្នកគ្រប់គ្រងមូលនិធិជាន់ខ្ពស់របស់ក្រុមហ៊ុន Northern Wychwood បានសរសេរទៅអ្នកស្រី Helen Okell អ្នកគ្រប់គ្រងក្រុមហ៊ុន Mossack Fonseca ដោយប្រាប់ថា ថវិកាដែលត្រូវបញ្ជូនទៅក្រុមហ៊ុនទាំងនោះ គឺជាប្រាក់ខែរបស់លោក Koudounaris និងលោក Fowler បានពីក្រុមហ៊ុន Innscor។
«Koudounaris គឺជាអ្នកជំនួញជោគជ័យ និងមានឈ្មោះល្បីម្នាក់ និងជានាយកក្រុមហ៊ុន Innscor Africa Limited ដ៏ធំមួយនៅប្រទេសស៊ីមបាវ៉ែ ក្នុងវិស័យទំនិញលក់រាយ និងឧស្សាហកម្មផលិត សណ្ឋាគារ និងទេសចរណ៍នៅអាហ្វ្រិកភាគខាងត្បូង»។ អ្នកស្រី Birchall បានសរសេរថា «ប្រភពថវិកាបានមកពីប្រាក់ខែបូកឡើងបន្តបន្ទាប់គ្នា»។ នៅពេលសួរថា តើលោក Koudounaris ឬលោក Fowler ចុះបញ្ជីការពីការបង់ចំណាយនេះឬទេនោះ លោក John Mangudya ដែលជាទេសាភិបាលធនាគារបម្រុងបានប្រាប់ VOA តាមរយៈសារអេឡិចត្រូនិច(អ៊ីម៉ែល) ថា៖ «យោងតាមកំណត់ត្រារបស់ធនាគារ យើងមិនមានការអនុម័តយល់ព្រមណាមួយទៅឲ្យបុគ្គល ដែលលោកបានលើកឈ្មោះឡើងនេះទេ»។
ក្រុមហ៊ុន Innscor មានទីស្នាក់ការកណ្តាលនៅរដ្ឋធានីហារ៉ារ៉េ (Harare) នៅក្នុងប្រទេសស៊ីមបាវ៉េ។ លោក Fowler គឺជាសហស្ថាបនិករួមចំណែកភាគហ៊ុនម្នាក់ ហើយលោក Koudounaris បានជួយដឹកនាំផ្នែកសំខាន់របស់ក្រុមហ៊ុនលក់អាហារឆ្អិនស្រាប់ ដែលមានហាងប្រើឈ្មោះដូចៗគ្នា រួមមានហាង Bakers Inn ហាង Chicken Inn និងហាង Pizza Inn ដែលមាននៅប្រទេសស៊ីមបាវ៉េ សំប៊ី ម៉ាឡាវី និងកេនយ៉ា។ ក្រុមហ៊ុននេះក៏មានការវេចខ្ចប់សាច់ ឧស្សាហកម្មធុនស្រាល គ្រឿងប្រើប្រាស់អេឡិកត្រូនិក និងគ្រឿងបន្លាស់រថយន្តផងដែរ។
ក្រុមហ៊ុននេះ មានបុគ្គលិកធ្វើការជាជនជាតិស៊ីមបាវ៉េចំនួនជាង១៤.០០០នាក់ និងនៅមានដំណើរការអាជីវកម្មនឹងល្អ ទោះបីស្ថិតនៅក្នុងស្ថានភាពសេដ្ឋកិច្ចដែលកំពុងធ្លាក់ចុះខ្សោយក៏ដោយ ជាមួយនឹងប្រាក់ចំណូលច្រើនជាង៨១៤លានដុល្លារសម្រាប់ឆ្នាំ២០១៥។
ធនាគារ គណនេយ្យករ ជួយបង្កើតក្រុមហ៊ុនទាំងនោះ
ឯកសារក្រុមហ៊ុនច្បាប់ Mossack Fonseca បង្ហាញថា លោក Koudounaris និងលោក Fowler បានប្រើប្រាស់លិខិតបញ្ជាក់របស់ធនាគារពាណិជ្ជ ស៊ីមបាវ៉េ (CBZ) ដើម្បីចុះឈ្មោះបង្កើតក្រុមហ៊ុនក្រៅប្រទេសទាំងនោះ។ លិខិតទាំងអស់សុទ្ធតែចុះហត្ថលេខាដោយអ្នកគ្រប់គ្រងជាន់ខ្ពស់នៅក្នុងអង្គភាពគ្រប់គ្រងទ្រព្យរបស់ធនាគារ ដែលអះអាងបញ្ជាក់ថា អ្នកទាំងពីរនេះគឺជាម្ចាស់គណនី នៅមជ្ឈមណ្ឌលប្រតិបត្តិការគ្រប់គ្រងទ្រព្យ ដែលត្រូវបានទទួលស្គាល់ពីធនាគារថាជា «អង្គភាពប្រកបដោយកិត្តិនាមមួយសម្រាប់អតិថិជនមានទ្រព្យសម្បត្តិច្រើន»។
លិខិតបញ្ជាក់របស់លោក Koudounaris កាលពីខែមីនា ឆ្នាំ២០១៤ ត្រូវបានចុះហត្ថលេខាដោយប្រធានគ្រប់គ្រងទ្រព្យនៃធនាគារ CBZ ឈ្មោះ Maureen Marimirofa។ ដប់ថ្ងៃក្រោយមក អ្នកស្រី Birchall បានបញ្ជូនលិខិតនោះទៅឲ្យក្រុមហ៊ុន Mossack Fonseca បន្ទាប់ពីបោះត្រាកាលបរិច្ឆេទលើលិខិតនោះជាតំណាងហត្ថលេខារបស់ភាគីផ្តល់សិទ្ធិយល់ស្របនៅក្រុមហ៊ុន Northern Wychwood។ លិខិតបញ្ជាក់របស់ Fowler កាលពីខែកញ្ញា ឆ្នាំ២០១៤ ត្រូវបានចុះហត្ថលេខាដោយអ្នកស្រី Marimirofa និងលោកស្រី N Dube ដែលចុះហត្ថលេខាក្នុងនាមជាអ្នកគ្រប់គ្រងជាន់ខ្ពស់នៃផ្នែកគ្រប់គ្រងទ្រព្យ។
អ្នកស្រី Marimirofa និងលោកស្រី Dube បានសរសេរថា «រាល់កិច្ចការទាក់ទងរបស់យើងជាមួយលោក M J Fowler គឺបានបញ្ជាក់ឲ្យឃើញថា លោកជាមនុស្សមានអត្តចរិតល្អ និងសុចរិតថ្លៃថ្នូរ។ លោកបានប្រកបរបរជំនួញទាំងអស់ក្នុងភាពជាមនុស្សគួរឲ្យគោរព ដែលមិនប្រព្រឹត្តខ្លួនហួសពីសមត្ថភាពខ្លួនឡើយ។ ហេតុដូច្នេះ យើងបានណែនាំលោកទៅតាមសេវាកម្មសមស្របណាមួយ ដែលលោកត្រូវការ។ ដូច្នេះ លិខិតនេះត្រូវបានចេញផ្សាយដោយមិនមានការលម្អៀងពីធនាគារ ឬបុគ្គលិកណាម្នាក់របស់ធនាគារឡើយ»។
របាយការណ៍ផ្ទៃក្នុងមួយ ចេញពីលោកស្រី Okell អ្នកគ្រប់គ្រងរបស់ក្រុមហ៊ុន Mossack Fonseca បាននិយាយថា លោកស្រីបានជួបជាមួយអ្នកស្រី Birchallជានាយកគ្រប់គ្រងរបស់ Northern Wychwood និង«បានពិនិត្យមើលរាល់ឯកសារដែលតម្រូវ ហើយអ្នកស្រី (Birchall) បានចុះហត្ថលេខា និងបិទភ្ជាប់ដោយឯកសារដើមចំនួនពីរច្បាប់ ដែលខ្ញុំនឹងបញ្ជូនទៅពិនិត្យផ្ទៀងផ្ទាត់ក្នុងសប្តាហ៍នេះ។ លោកស្រីមានចំណាប់អារម្មណ៍យ៉ាងខ្លាំងចំពោះវគ្គបង្រៀនរបស់យើង និងបាននិយាយថា លោកស្រីនឹងចុះឈ្មោះឲ្យបុគ្គលិករបស់គាត់ភ្លាមៗ នៅពេលវគ្គបង្រៀនទាំងនេះចាប់ផ្តើមបើក»។
មេធាវីនៅរដ្ឋធានីហារ៉ារ៉េម្នាក់ដែលបានសុំមិនបញ្ចេញឈ្មោះ បាននិយាយថា សំណើរបស់ក្រុមហ៊ុន Northern Wychwood ដែលសុំឲ្យមានលិខិតយោងបញ្ជាក់នោះ គឺជានីតិវិធីដើម្បីបង្ហាញថា ក្រុមហ៊ុន Mossack Fonseca បានអនុលោមតាមច្បាប់ប្រឆាំងនឹងការលាងលុយរបស់ប្រជុំកោះ British Virgin។
មេធាវីរូបនេះបានពន្យល់ថា «ក្រុមហ៊ុន Northern Wychwood បានប្រើវគ្គបង្រៀនខ្លីៗនេះជាវេទិកាសម្រាប់ពិភាក្សាជាមួយអតិថិជនរបស់ខ្លួនពីវិធីបញ្ជូនថវិកាពីតំបន់ ក្រៅពីយុត្តាធិការនៃប្រជុំកោះ British Virgin និងពីវិធីបង្កើតក្រុមហ៊ុនក្រៅប្រទេស សម្រាប់ម្ចាស់អ្នកទទួលអត្ថប្រយោជន៍ពិតប្រាកដ»។
VOA ស៊ីមបាវ៉េ បានទូរស័ព្ទទៅលោក Shaun Fergusson Cairns នាយករបស់ក្រុមហ៊ុន Northern Wychwood ដើម្បីសាកសួរយោបល់ ប៉ុន្តែប្រពន្ធរបស់លោកឈ្មោះ Tracy បានឲ្យដឹងថា គាត់កំពុងសម្រាន្ត។ ទូរស័ព្ទក្រោយៗទៀត មិនមានអ្នកលើក។
មន្ត្រីទទួលបន្ទុកផ្នែកទំនាក់ទំនងរបស់ក្រុមហ៊ុន Mossack Fonseca លោក Jordan Spencer បានបដិសេធមិនឆ្លើយនឹងសំណួរពាក់ព័ន្ធនឹងលោក Koudounaris និងលោក Fowler ឬក្រុមហ៊ុន Innscor Africa ឡើយ ដោយនិយាយថា លោកមិនត្រូវបានអនុញ្ញាតឲ្យពិភាក្សារឿងឯកសារសម្ងាត់ប៉ាណាម៉ាជាមួយសារព័ត៌មានឡើយ។
នៅក្នុងឯកសារចុះឈ្មោះក្រុមហ៊ុនក្រៅប្រទេសមានចុះអាសយដ្ឋានទីលំនៅរបស់លោក Koudounaris និងលោក Fowler នៅ Alexandra Park និង Colne Valley ដែលជាតំបន់ពីរនៅជាយក្រុងហារ៉ារ៉េ ជាមួយនឹងលិខិតឆ្លងដែនថតចម្លងរបស់ពួកគេ ដែលបញ្ជាក់ដោយលោក Andrew Lorimerលេខាធិការបស់ក្រុមហ៊ុន Innscor Africa។ លោក Lorimer ក៏មិនអាចឲ្យទាក់ទងសុំអត្ថាធិប្បាយបានដែរ។
លោក Koudounaris និងលោក Fowler មានឈ្មោះជាម្ចាស់អ្នកទទួលប្រយោជន៍របស់ក្រុមហ៊ុន Federated Properties ដែលមាននាយកប្រតិបត្តិលោក Bryan Ellisនៃក្រុមហ៊ុន Northern Wychwood និងលោក Brett Hurst ជានាយកគ្រប់គ្រង។ លោក Koudounaris និងលោក Fowlerក៏ជាម្ចាស់ក្រុមហ៊ុន Acia Aero Holdings និងក្រុមហ៊ុន Acia Aero Limited ជាមួយនឹងលោក Hurst ផងដែរ។
លោក Koudounaris ជាម្ចាស់របស់ក្រុមហ៊ុន Skyfox ដែលមានលោក Hurst និងលោក Huan Berger Badenhorst ជានាយក និងចំណែកភាគហ៊ុន៨០-២០រវាងក្រុមហ៊ុន Innscor International និងក្រុមហ៊ុន Chimanimani Holdings Limited រៀងគ្នា។
ស្ថាប័នសារព័ត៌មានជាង១០០ កំពុងធ្វើការពិនិត្យលើឯកសារសម្ងាត់ដែលបែកធ្លាយពីប្រទេសប៉ាណាម៉ា ដែលមានព័ត៌មានលម្អិតអំពីក្រុមហ៊ុនក្រៅប្រទេសជាង២០០.០០០។ ក្នុងចំណោមនេះ ក្រុមហ៊ុនខ្លះមានតាំងពីទសវត្សរ៍១៩៧០។
VOA ផ្សាយជាភាសាស៊ីមបាវ៉េ បន្តធ្វើការពិនិត្យលើឯកសារដែលផ្សារភ្ជាប់នាយកប្រតិបត្តិរបស់ក្រុមហ៊ុន Northern Wychwood គឺលោក Cairns លោក Ellis និងលោក Hurst ទៅនឹងក្រុមហ៊ុនដែលមិនធ្វើអាជីវកម្ម និងដែលមានទំនាក់ទំនងជាមួយអតិថិជនស៊ីមបាវ៉េរាប់រយនាក់៕
ប្រែសម្រួលដោយ សើ សាយ្យាណា
