ប្រធានគណបក្សអំណាចប្រជាជន (People Power Party) ដែលជាគណបក្សកាន់អំណាចនៅកូរ៉េខាងត្បូង បានប្រកាសគាំទ្រការព្យួរតួនាទីរបស់ប្រធានាធិបតីកូរ៉េខាងត្បូងលោក Yoon Suk Yeol។ ការប្រកាសគាំទ្រដ៏គួរឲ្យភ្ញាក់ផ្អើលក្នុងនាទីចុងក្រោយដើម្បីបោះបង់ចោលមេដឹកនាំបក្សអភិរក្សនិយមនេះត្រូវបានអ្នកវិភាគនិយាយថាបង្កើនឱកាសធំធេងដល់ការចោទប្រកាន់ជាសាធារណៈដើម្បីដកតំណែងលោក Yoon ដោយសារការប៉ុនប៉ងមិនបានសម្រេចរបស់លោកក្នុងការប្រើច្បាប់អាជ្ញាសឹក។
ក្នុងកិច្ចប្រជុំមួយរបស់គណបក្សនេះកាលពីថ្ងៃសុក្រ មេដឹកនាំបក្សលោក Han Dong-hoon បានអំពាវនាវឲ្យ «ព្យួរជាបន្ទាន់» នូវតួនាទីរបស់លោក Yoon ដោយសំអាង «អង្គហេតុដែលទើបត្រូវបានលាតត្រដាងថ្មី» ដែលបង្ហាញថាលោក Yoon បានប៉ុនប៉ងប្រើទីភ្នាក់ងារស៊ើបការណ៍សម្ងាត់ដើម្បីចាប់ខ្លួនតំណាងរាស្ត្រលេចធ្លោមួយចំនួនដោយចោទប្រកាន់ពួកគេថាជា «កម្លាំងប្រឆាំងរដ្ឋ»។
លោក Han បាននិយាយថា៖ «លោកប្រធានាធិបតី Yoon មិនបានទទួលស្គាល់ថាការប្រើច្បាប់អាជ្ញាសឹកដែលខុសច្បាប់នោះគឺជាកំហុសទេ។ បើលោកប្រធានាធិបតី Yoon បន្តអនុវត្តតួនាទីរបស់លោកទៀត នោះនឹងមានហានិភ័យដ៏ធំនៃការកើតឡើងម្តងទៀតនូវសកម្មភាពជ្រុលនិយមបែបនេះ... ដែលអាចបង្កជាការគំរាមកំហែងយ៉ាងខ្លាំងដល់សាធារណរដ្ឋកូរ៉េនិងប្រជាជនរបស់ប្រទេសនេះ»។
លោក Yoon ដែលរកាំចិត្តរាប់ខែមកហើយដោយសារអ្វីដែលលោកមើលឃើញថាជាការប៉ុនប៉ងរបស់បក្សប្រឆាំងក្នុងការរារាំងការគ្រប់គ្រងរបស់លោក បានប្រកាសឲ្យប្រើច្បាប់អាជ្ញាសឹកកាលពីយប់ថ្ងៃអង្គារ ដោយអះអាងថាវាជាការចាំបាច់ដើម្បី «កម្ទេចកម្លាំងប្រឆាំងរដ្ឋ» និង «ការពាររបៀបរៀបរយតាមរដ្ឋធម្មនុញ្ញ»។
ក្នុងពេលប៉ុន្មានម៉ោងក្រោយមក ក្រុមតំណាងរាស្ត្រកូរ៉េខាងត្បូងបានបដិសេធសារាចររបស់លោក ក្រោយពីពួកគេបានជម្នះផុតប៉ូលិសនិងយោធាដែលត្រូវបានបញ្ជូនទៅអគាររដ្ឋសភាជាតិមក។
គណបក្សប្រឆាំងដែលមានសំឡេងភាគច្រើនក្នុងរដ្ឋសភាគ្រោងបោះឆ្នោតចោទប្រកាន់ដកតំណែងលោក Yoon នៅយប់ថ្ងៃសៅរ៍នេះ៕
ប្រធានាធិបតីកូរ៉េខាងត្បូងប្រឈមការចោទប្រកាន់ដកតំណែង
វេទិកាបញ្ចេញមតិ