ប្រទេសកូរ៉េខាងត្បូងនិងប្រទេសជប៉ុនបានដាក់ទណ្ឌកម្មឯកតោភាគីទៅលើប្រទេសជិតខាងរបស់ពួកគេ ដែលមានបំពាក់ដោយអាវុធនុយក្លេអ៊ែរ នោះគឺប្រទេសកូរ៉េខាងជើង។
ការដាក់ទណ្ឌកម្មនេះត្រូវបានប្រកាសឡើងនៅថ្ងៃសុក្រនេះ បន្ទាប់ពីរដ្ឋាភិបាលក្រុង ព្យុងយ៉ាង សន្យាថានឹងសងសឹកទណ្ឌកម្មរបស់អង្គការសហប្រជាជាតិដែលបានដាក់កាលពីដើមសប្តាហ៍នេះ។
ប្រទេសកូរ៉េខាងត្បូង និងជប៉ុនបានត្រៀមទណ្ឌកម្មរួចរាល់ហើយសម្រាប់ដាក់ទៅលើប្រទេសកូរ៉េខាងជើង។ ទណ្ឌកម្មថ្មីនេះគឺផ្តោតសំខាន់ទៅលើពាណិជ្ជកម្មនិងការដោះដូររវាងប្រទេសកូរ៉េខាងជើង និងប្រទេសជិតខាងទាំងពីរដែលស្ទើរតែលែងមាន ដោយសារតែទណ្ឌកម្មដែលមានស្រាប់ ជាពិសេសទណ្ឌកម្មដែលបានដាក់ដោយអង្គការសហប្រជាជាតិ។
ប៉ុន្តែការសាកល្បងនុយក្លេអ៊ែរចុងក្រោយបង្អស់របស់កូរ៉េខាងជើងបានធ្វើឲ្យប្រទេសជិតខាងរបស់ខ្លួនប្រកាសអំពីការដាក់កំហិតថ្មីៗមួយចំនួនទៀត។
ទណ្ឌកម្មថ្មីរបស់រដ្ឋាភិបាលក្រុងសេអ៊ូលគឺហាមឃាត់មិនឲ្យទីប្រឹក្សាជាន់ខ្ពស់ពីរនាក់របស់មេដឹកនាំកូរ៉េខាងជើង លោក Kim Jong Un ចូលក្នុងប្រទេសរបស់ខ្លួនឡើយ។ អ្នកទាំងពីរនោះគឺលោក Choe Ryong Hae និងលោក Hwang Pyong So។
ប្រទេសកូរ៉េខាងត្បូងក៏ហាមឃាត់មិនឲ្យអ្នកជំនាញការខាងគ្រាប់មីស៊ីលនិងនុយក្លេអ៊ែរបរទេសចូលមកក្នុងប្រទេសកូរ៉េខាងជើងដែរ ប្រសិនបើការធ្វើដំណើរមកកាន់ប្រទេសកូរ៉េខាងជើងរបស់ពួកគេអាចជាការគំរាមកំហែងដល់ប្រទេសកូរ៉េខាងត្បូងនោះ៕
