ភ្ជាប់​ទៅ​គេហទំព័រ​ទាក់ទង

ព្រឹទ្ធសភា​រដ្ឋ ​South Carolina ​​អនុម័តិ​សេចក្តី​ព្រាង​ច្បាប់​​ដក​ទង់​ពី​សម័យ​សង្គ្រាម​ស៊ីវិល​អាមេរិកាំង


រូបថតឯកសារ៖ ក្រុមបាតុករ​ឈរ​នៅ​ជិត​ទង់​ក្នុង​សម័យ​សង្គ្រាម​ស៊ីវិល​អាមេរិកាំង ដោយ​គាំទ្រ​ឲ្យ​ដក​ទង់​នោះ​ចេញ​ពីទីធ្លា​វិមានរដ្ឋ​ ក្នុង​រដ្ឋ​ Carolina កាលពីថ្ងៃទី២០ ខែមិថុនា ឆ្នាំ២០១៥។

ព្រឹទ្ធសភា​នៃរដ្ឋ South Carolina ​បាន​អនុម័តិ​សេចក្តី​ព្រាង​ច្បាប់​មួយ​ឱ្យ​ដក​ទង់​របស់​ពួក​រដ្ឋ​ខាង​ត្បូង​ក្នុង​សម័យ​សង្គ្រាម​ស៊ីវិល​អាមេរិកាំង​ដែល​ភាសា​អង់គ្លេស​ហៅ​ថា Confederate flag ​ចេញ​ពី​ទីធ្លា​នៃ​វិមាន​សភា​ capitol​ របស់​រដ្ឋ​នេះ​ ដែល​ត្រូវ​បាន​បង្ហូត​នៅ​ទី​នោះ​អស់​រយៈពេល​ជាង​៥០ឆ្នាំ​មក​ហើយ។​

សំណើ​របស់​គណបក្ស​ទាំងពីរ​បាន​ទទួល​ការ​អនុម័តិ​នៅ​ក្នុង​ការ​បោះឆ្នោត​លើកទី​បី​និង​លើក​ចុង​ក្រោយ​កាល​ពី​ថ្ងៃអង្គារ​ ដោយមានសំឡេង​ឆ្នោត​គាំទ្រ​៣៦​ទល់​នឹង​៣​សំឡេង​ជំទាស់​នៅ​ក្នុង​ព្រឹទ្ធសភា​រដ្ឋ​ដែលត្រួតត្រា​ដោយ​គណបក្សសាធារណរដ្ឋ។​

នៅ​ពេល​នេះ​សេចក្តី​ព្រាង​ច្បាប់​នេះ​នឹង​ត្រូវ​បញ្ជូន​ទៅ​កាន់​សភា​តំណាង​រាស្ត្រ​នៃរដ្ឋ​ South Carolina ​ដើម្បី​ធ្វើការ​បោះឆ្នោត។​

ការ​ពិភាក្សា​ខាង​នយោបាយ​នេះ​មាន​ធ្វើឡើង​ក្រោយ​ពី​មាន​មន្ត្រី​ច្រើន​នាក់​ដោយ​មានរួម​បញ្ចូល​ទាំង​អភិបាល​រដ្ឋ​ Nikki Haley​ ខាង​គណបក្ស​សាធារណរដ្ឋ​ផង​បាន​អំពាវ​នាវ​ឱ្យ​មាន​ការ​ដក​ទង់​នេះ​ចេញនៅ​ក្រោយ​ការ​សម្លាប់​រង្គាល​កាល​ពី​ថ្ងៃ​ទី​១៧ខែ​មិថុនា​លើ​ជន​ជាតិ​អាមេរិកាំង​ដើមកំណើត​អាហ្វ្រិក​៩នាក់​នៅ​ក្នុង​ព្រះវិហារ​គ្រិស្តសាសនា​ Emanuel African Methodist Episcopal church នៅ​ក្នុងក្រុង Charleston៕

XS
SM
MD
LG