ការជ្រើសរើសយកបុគ្គលដែលបម្រើប្រជាពលរដ្ឋបានល្អជាចៅសង្កាត់ដោយមិនផ្តោតទៅលើគណបក្សនយោបាយ គឺជាការសម្រេចរបស់ប្រជាពលរដ្ឋមួយចំនួននៅក្នុងរាជធានីភ្នំពេញ
ដែលបានចូលរួមទៅបោះឆ្នោតជ្រើសរើសក្រុមប្រឹក្សា ឃុំ សង្កាត់អាណត្តិទី៥ នៅថ្ងៃអាទិត្យ។ នេះបើតាមប្រជាពលរដ្ឋដែលវីអូអេបានសាកសួរ។
រាជធានីភ្នំពេញមានការិយាល័យបោះឆ្នោតចំនួន២.១៩៧ ហើយអ្នកដែលមានឈ្មោះនៅក្នុងបញ្ជី
បោះឆ្នោតជិត៩០ម៉ឺននាក់ នៅក្នុងសង្កាត់ចំនួន១០៥ ដែលមានអាសនៈក្រុមប្រឹក្សាសរុបចំនួន៨៩៩។
នៅក្នុងមណ្ឌលបោះឆ្នោតសាលាវិចិត្រសិល្បៈ មាន១៤ការិយាល័យបោះឆ្នោតហើយប្រជាពលរដ្ឋមួយចំនួនបានមករង់ចាំបោះឆ្នោតតាំងពីមុនការបើកការិយាល័យបោះឆ្នោត។
យុវជន ភឺន ប្រច័ក្រ អាយុ២៣ឆ្នាំ ជាមន្ត្រីប៉ូលិស រស់នៅសង្កាត់ភ្នំពេញថ្មី ខ័ណ្ឌសែនសុខ ក្រុងភ្នំពេញ ដែលបានទៅបោះឆ្នោតនៅមណ្ឌលបោះឆ្នោតសាលាវិចិត្រសិល្បៈបានឱ្យដឹងថាចៅសង្កាត់ដែលត្រូវបោះឆ្នោតឱ្យជាចៅសង្កាត់ដែលបម្រើសេវាដល់ប្រជាពលរដ្ឋ ដោយមិនគិតពីពេលវេលា មិនប្រកាន់វណ្ណៈ ឬបក្សពួក។
«យើងជាប្រជាជន ចឹងយើងត្រូវតែបំពេញកាតព្វកិច្ចរបស់យើង បោះឆ្នោតយើងចង់បានអ្នកធ្វើការ
ល្អ អ្នកយល់ពីទុក្ខធុរៈប្រជាជន បើសិនជាបុគ្គលម្នាក់ហ្នឹងធ្វើការអត់ល្អ ក៏អត់បោះឱ្យដែរពីព្រោះ
អីបោះឱ្យហើយធ្វើការអត់កើតផងចឹងបើសិនជាបក្សល្អហើយតែអ្នកធ្វើការ ធ្វើអត់កើតក៏យើងអត់
បោះឱ្យដែរ»។
ជាមួយគ្នានេះដែរ លោក ហម វាសនា អាយុ៥៩ឆ្នាំ ជាសន្តិសុខឯកជនរស់នៅសង្កាត់ភ្នំពេញថ្មី ខណ្ឌសែនសុខ ក្រុងភ្នំពេញ ដែលបានទៅបោះឆ្នោតនៅមណ្ឌលបោះឆ្នោតសាលាវិចិត្រសិល្បៈ
ក៏បានឱ្យដឹងដែរថាការបោះឆ្នោតរបស់លោក គឺសំដៅទៅលើបុគ្គលដែលបម្រើប្រជាពលរដ្ឋស្អាតសំ មិនពុករលួយ មិនប្រកាន់គណបក្សនយោបាយ។
«មេឃុំដែលខ្ញុំចង់បាន គឺជាមេឃុំដែលស្អាតស្អំហើយមេឃុំដែលបម្រើប្រជាពលរដ្ឋដោយពុំប្រកាន់
និន្នាការគណបក្សនយោបាយ ពេលដែលខ្ញុំសម្រេចបោះឆ្នោតនេះគឺខ្ញុំបានមើលឃើញបុគ្គលហ្នឹង
ហើយគឺគាត់មានសមត្ថភាព បុគ្គលហ្នឹងគឺគាត់បម្រើប្រជារាស្រ្តដោយរលូន អាហ្នឹងគឺខ្ញុំបោះឆ្នោត
ឱ្យគាត់។ចៅសង្កាត់អត់មានរើសអើងប្រជាពលរដ្ឋនៅពេលដែលធ្វើលិខិតស្នាមអីគឺខ្ញុំចង់បានចៅសង្កាត់ហ្នឹង»។
នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥នេះ នៅតាមមណ្ឌលបោះឆ្នោតសាលាវិចិត្រសិល្បៈ គេសង្កេតឃើញថាមិនមានករណីបាត់ឈ្មោះ ឬមិនអាចចូលរួមការបោះឆ្នោតនោះទេ។
នៅក្នុងមណ្ឌលបោះឆ្នោតសាលាវិចិត្រសិល្បៈនោះដែរ អ្នកស្រី ដានី អាយុ៣៣ឆ្នាំ ជាស្ត្រីមេផ្ទះ
រស់នៅសង្កាត់ភ្នំពេញថ្មី ខណ្ឌសែនសុខ ក្រុងភ្នំពេញទើបតែបោះឆ្នោតរួច បានឱ្យដែរថាអ្នកស្រី
មិនប្រកាន់បក្សណានោះទេ សំខាន់បុគ្គលណាដែលបម្រីប្រជាពលរដ្ឋបានល្អប្រសើរ អ្នកស្រីបោះឱ្យបុគ្គលនោះ។
«គាត់ហ្នឹងហើយដែលគេហៅថាមេបារបស់យើង ចង់និយាយថាយើងអាចពឹងពាក់បានអីចឹង យើងអត់គិតថាលើបក្សឬមិនលើបក្សទេ សំខាន់មើលបុគ្គលណាគាត់អភិវឌ្ឍភូមិឃុំយើងអត់ ពីព្រោះខ្ញុំមើលតែបុគ្គលមិនមើលលើបក្សទេ ខ្ញុំមើលលើបុគ្គលថាគាត់ មិនមែនតែយើងទេ អ្នកផ្សេងទៅពឹងពាក់អីចឹងបាន ឬអត់ យើងមិនមែនប្រកាន់បក្សណាបក្សណីទេ ក៏ប៉ុន្តែសំខាន់អ្នកណាយើងអាចពឹងពាក់បានយើងបោះឱ្យអ្នកហ្នឹង»។
នៅក្នុងទីក្រុងភ្នំពេញ គណបក្សចំនួន១១ ចូលរួមការប្រកួតប្រជែងការបោះឆ្នោតនេះក្នុងនោះគណបក្សប្រជាជនកម្ពុជាដាក់បេក្ខជនឈរឈ្មោះបានក្នុងសង្កាត់ទាំងអស់ សរុបចំនួន១០៥សង្កាត់ គណបក្សភ្លើងទៀន ៩៥សង្កាត់ គណបក្សហ៊្វុនស៊ិនប៉ិច១៩សង្កាត់ គណបក្សខ្មែររួបរួមជាតិ១៩សង្កាត់ គណបក្សឆន្ទៈខ្មែរ១១សង្កាត់ គណបក្សយុវជនកម្ពុជា១០សង្កាត់ គណបក្សសំបុកឃ្មុំសង្គមប្រជាធិបតេយ្យ៤សង្កាត់ គណបក្សប្រជាធិបតេយ្យមូលដ្ឋាន និងគណបក្សកម្ពុជានិយមមាន២សង្កាត់ គណបក្សសញ្ជាតិកម្ពុជា និងគណបក្សខ្មែរស្រលាញ់ជាតិមាន១សង្កាត់។
ចំណែកឯនៅមណ្ឌលវិទ្យាល័យឥន្ទ្រទេវីវិញ លោក ជឿន សាខុន អាយុ៨៧ឆ្នាំ ជាប្រជាពលរដ្ឋ
រស់នៅសង្កាត់បឹងកក់ទី២ខណ្ឌទួលគោក ក្រុងភ្នំពេញ។ ដៃកាន់ឈើច្រត់សម្រាប់ជំនួយក្នុងការធ្វើ
ដំណើរ លោកបានប្រាប់VOAថាការបោះឆ្នោតឃុំសង្កាត់ គឺសំខាន់ណាស់ ដើម្បីរើសអ្នកគ្រប់គ្រងមូលដ្ឋានដូច្នេះចៅសង្កាត់ដែលត្រូវជ្រើសរើស គឺត្រូវស្គាល់ពីសុខទុក្ខប្រជាពលរដ្ឋ និងជួយដោះស្រាយបញ្ហានៅក្នុងមូលដ្ឋានពេលប្រជាពលរដ្ឋជួបការលំបាក។
«អូមានសារៈសំខាន់ណាស់ចំពោះប្រជាជនខ្មែរ គឺថាត្រូវការគ្រប់គ្រងភូមិស្រុក គឺថាត្រូវមើលប្រជា
ពលរដ្ឋថាក្រីក្រ ឬយ៉ាងម៉េចៗសុខទុក្ខ យើងរើសអ្នកកាន់អំណាចណាដែលមានសមត្ថភាព គឺ
សំដៅទៅលើបុគ្គលបម្រើប្រជាពលរដ្ឋតែម្តងអត់មើលគណបក្សទេ។ គាត់អ្នកគ្រប់គ្រងធ្វើល្អ អាហ្នឹងយើងស្រលាញ់ហើយ យើងមិនបានគិតគូរទៅលើបក្សអី»។
ស្របពេលជាមួយគ្នានោះដែរ លោក សុន ឆ័យ អនុប្រធានគណបក្សភ្លើងទៀនដែលបានទៅបោះឆ្នោតនៅមណ្ឌលវិទ្យាល័យឥន្ទ្រទេវី បានគាំទ្រចំពោះការយល់ឃើញរបស់ប្រជាពលរដ្ឋដែលជ្រើសរើសមេដឹកនាំមូលដ្ឋានរបស់ខ្លួន ដោយសំឡឹងមើលលើសមត្ថភាពបុគ្គលជាជាងលើគណបក្ស។
«ប្រជារាស្រ្តរើសតំណាងរបស់គេ គឺដើម្បីឱ្យអ្នកតំណាងបម្រើគេមិនមែនបម្រើបក្សទេដូច្នេះខ្ញុំពេញចិត្តនូវគំនិតរបស់ពលរដ្ឋដែលបានសម្តែងនេះ។ ខ្ញុំថាបើពលរដ្ឋខ្មែរទូទៅយកចិត្តទុកដាក់រើសមនុស្សល្អ ដើម្បីបម្រើខ្លួនជាជាងរើសបក្សដែលក្នុងនោះអាចមានមនុស្សមិនល្អដែលអាចយកឈ្មោះបក្សហ្នឹងទៅលាយឡំអាចក្លាយទៅជាអ្នកដឹកនាំអាក្រក់ហ្នឹង ដូច្នេះខ្ញុំគាំទ្រនូវគំនិតនេះ ហើយយើងនៅបន្តគំនិតថាឃុំត្រូវបម្រើរាស្រ្តកុំបម្រើបក្សនេះតទៅទៀត»។
ប្រជាពលរដ្ឋដែលបានចេញទៅបោះឆ្នោតនៅថ្ងៃនេះ មួយចំនួនមានការខ្លាចរអាក្នុងការផ្តល់បទសម្ភាសន៍ដល់អ្នកសារពត៌មាន។ ហើយប្រជាពលរដ្ឋមួយចំនួនឲ្យដឹងថាពួកគេស្គាល់តែគណបក្សប្រជាជនកម្ពុជា និងគណបក្សភ្លើងទៀន។
ជុំវិញការយល់ឃើញរបស់ប្រជាពលរដ្ឋក្នុងការជ្រើសរើសមេដឹកនាំថ្នាក់មូលដ្ឋានរបស់ខ្លួនដោយសំដៅទៅលើបុគ្គលច្រើនជាងគណបក្ស លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឱ្យដឹងថាវាគឺជាសិទ្ធរបស់ប្រជាពលរដ្ឋ ក៏ប៉ុន្តែនៅមិនទាន់បានគ្រប់ជ្រុងជ្រោយនៅឡើយចំពោះការសម្រេចចិត្តរបស់ប្រជាពលរដ្ឋបែបនេះ។
លោកថ្លែងថា៖ «គាត់គ្រាន់តែឃើញឈ្មោះអត់ដែលស្គាល់បេក្ខជនហ្នឹងផង គាត់ធ្វើម៉េចថាចៅសង្កាត់ល្អឬមិនល្អចឹងបានជាគេឱ្យយើងវាយតម្លៃទៅលើកម្មវិធីនយោបាយរបស់គណបក្សអាហ្នឹងទី១ ទី២ បើចៅសង្កាត់ឬមួយមេឃុំណាដែលមានមុខតំណែងហើយ ហើយឆ្លងកាត់ការងារអាហ្នឹងបានអាចវាយតម្លៃទៅបាន។ ចំពោះបេក្ខជនភាគច្រើនគឺថាអត់ទាន់បានឆ្លងកាត់ការងារផងធ្វើម៉េចឱ្យវាយតម្លៃកើតថាមនុស្សនេះល្អ ឬអាក្រក់ យើងមិនអាចគ្រាន់តែឮឈ្មោះហើយឮការសន្យាយើងវាយតម្លៃថាល្អទេ»។
គួរបញ្ជាក់ថាកាលពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ កន្លងទៅ អតីតគណបក្សសង្គ្រោះជាតិបានឈ្នះតំណែងចៅសង្កាត់ចំនួន៥៧ក្នុងរាជធានីភ្នំពេញ ហើយ៤៨សង្កាត់បានទៅគណបក្សប្រជាជនកម្ពុជា៕
