មន្រ្តីសន្តិសុខបាននិយាយថា សមាជិកសភាសូម៉ាលីម្នាក់ត្រូវបានគេបាញ់សម្លាប់កាលពីថ្ងៃសៅរ៍នៅរដ្ឋធានីម៉ូហ្គាឌីស្យូ។
សាក្សីបានឱ្យដឹងថា ជនសង្ស័យជាក្រុមសកម្មប្រយុទ្ធ al-Shabab កាន់កាំភ្លើងខ្លីបានបាញ់សម្លាប់លោក Osman Ilmi Boqorre សមាជិកសភា ខណៈដែលលោកកំពុងទៅមើលផ្ទះថ្មីរបស់លោកដែលកំពុងសាងសង់នៅសង្កាត់ Karan ភាគខាងជើងរដ្ឋធានីម៉ូហ្គាឌីស្យូ។
ប៉ូលិសបាននិយាយថា លោក Boqorre បានស្លាប់ភ្លាមៗ មុនពេលអ្នកជួយសង្គ្រោះដំបូងបានទៅដល់។ លោក Boqorre គឺជាសមាជិកចាស់បំផុតនៃសភាសូម៉ាលីបច្ចុប្បន្ន។ លោកធ្លាប់ធ្វើជាវរសេនីយទោនៅក្នុងជួរកងទ័ព ហើយបានក្លាយជាអនុប្រធានសភានៃរដ្ឋាភិបាលបណ្ដោះអាសន្នសូម៉ាលីកាលពីឆ្នាំ២០០៧។ ប៉ុន្តែគាត់បានលាលែង ដោយសារមូលហេតុសុខភាពក្នុងឆ្នាំ២០១០។
ម្នាក់ក្នុងចំណោមសហការីរបស់លោកនៅក្នុងរដ្ឋសភាគឺលោក Dahir Amin Jessow បានទទួលព័ត៌មានដំបូងអំពីការសម្លាប់។ លោកបានប្រាប់វីអូអេថា លោក Boqorre មានឈ្មោះបោះសំឡេងជាអ្នកបង្កើតសន្តិភាពនិងជាអ្នកចរចា។ លោក Boqorre គឺជាសមាជិកសភាទីមួយដែលត្រូវបានគេសម្លាប់នៅក្នុងរដ្ឋធានីម៉ូហ្គាឌីស្យូនៅឆ្នាំនេះ។
គ្មាននរណាម្នាក់បានប្រកាសទទួលខុសត្រូវការសម្លាប់នោះទេ ប៉ុន្តែពួកសកម្មប្រយុទ្ធ al-Shabab តែងតែប្រកាសទទួលខុសត្រូវការធ្វើឃាតសមាជិកសភា មន្រ្តីរដ្ឋការស៊ីវិល បុគ្គលិករដ្ឋាភិបាលនិងសកម្មជនសង្គមស៊ីវិល៕
