ភ្ជាប់​ទៅ​គេហទំព័រ​ទាក់ទង

ប្រទេស​ស្លូវេនី ក្រូអាស៊ី និងប្រទេស​​ស៊ែរប៊ី អនុម័ត​ការ​រឹតបន្តឹង​ថ្មី​លើ​ជន​ចំណាកស្រុក


ក្មេង​ប្រុស​ម្នាក់​ដើរ​កាត់​ភក់​នៅជំរំ​អភិវឌ្ឍឯព្រំដែន​រវាង​ Macedonia និង Serbia ក្បែរ​ភូមិ​ Macedonian ខាងលិច​ Tabanovce កាល​ពី​ថ្ងៃ​អង្គារ​ទី០៨​ មិនា​ ២០១៦។​

ប្រទេស​ស្លូវេនី ក្រូអាស៊ី និងប្រទេសស៊ែរប៊ី និយាយ​ថា​ពួកគេ​លែង​អនុញ្ញាត​ឲ្យ​ជន​ចំណាកស្រុក ​ដែល​គ្មានបំណង​ដាក់ពាក្យ​ស្នើ​សុំ​សិទ្ធិ​ជ្រកកោន ឲ្យ​ឆ្លង​កាត់​ព្រំដែន​របស់​ពួកគេ​តទៅ​ទៀត​ហើយ ដោយ​បាន​បិទ​ជា​ស្ថាពរ​ ផ្លូវ​មួយ​ដែល​គេ​ហៅ​ថា «ផ្លូវ​បាល់កង់» ដែល​ជន​ចំណាក​ស្រុក​ជាច្រើន បាន​ប្រើប្រាស់ ដើម្បី​ឆ្ពោះ​ទៅកាន់​ប្រទេសដែល​មាន​ជីវភាព​ធូរធារ​ជាង​ នៅ​ក្នុង​ទ្វីប​អឺរ៉ុបខាង​លិច។

ប្រទេស​ស្លូវេនី​បាន​ប្រកាស​ថា ខ្លួន​បាន​ចាប់​ផ្តើម​អនុវត្ត​គោលនយោបាយ​ថ្មីនេះ​កាលពី​ពាក់កណ្តាល​យប់​ថ្ងៃ​អង្គារ។ ចំនែក​ឯ​ក្រូអាស៊ី​និង​ប្រទេសស៊ែរប៊ី​វិញ​ និយាយ​ថា​ប្រទេស​ទាំង​ពីរ​ក៏​ធ្វើ​ដូចគ្នា​ដែរ។

វិធានការ​របស់​ប្រទេស​ស្លូវេនី គឺ​ស្រប​នឹង​ក្រិត្យ​ច្បាប់​មួយ ដែល​ត្រូវ​បាន​សម្រេច​នៅក្នុង​កិច្ច​ប្រជុំ​របស់​សហភាព​អឺរ៉ុប ក្នុង​ទីក្រុង​ព្រុចស៊ែល​កាល​ពី​ថ្ងៃ​ច័ន្ទ ដែល​បាន​កំណត់​ថា ប្រទេស​ជា​សមាជិក​សហភាព​អឺរ៉ុប ត្រូវ​តែ​ងាក​ទៅ​អនុវត្ត​កិច្ច​ព្រមព្រៀង​ Schengen ស្តី​ពី​ការ​បើក​ព្រំដែន ដែល​បាន​កំណត់​ថា ប្រទេស​ជាតិ​ទាំង​នេះ អាច​ហាមប្រាម​ជន​ចំណាក​ស្រុក​ មិន​ឲ្យ​ចូល​ទៅក្នុង​ប្រទេស​ខ្លួន​បាន បើ​ជន​ទាំងនោះ​មិនមាន​បំណង​ស្នើ​សុំ​សិទ្ធិ​ជ្រកកោន​ក្នុង​ប្រទេស​ទាំង​នោះ​ទេ។

ទីភ្នាក់ងារ​ព័ត៌មានReuters បាន​រាយការណ៍​ថា ជន​ចំណាកស្រុក​ប្រមាណ​ ៤៧៨.០០០​នាក់ ត្រូវ​គេ​ជឿ​ថា​បាន​ចូល​ទៅក្នុង​ប្រទេស​ស្លូវេនី​ក្នុង​ដំណើរ​ឆ្ពោះ​ទៅ​ទិស​ខាង​លិច​របស់​ពួកគេ ប៉ុន្តែ​មាន​តែ​៤៦០​នាក់​ប៉ុណ្ណោះ បាន​ដាក់ពាក្យ​ស្នើ​សុំ​សិទ្ធិ​ជ្រក​កោន​នៅ​ក្នុង​ប្រទេស​នោះ៕

XS
SM
MD
LG