ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការកើនឡើង​នៃ​ចំនួន​ជនអន្តោប្រវេសន៍​បង្ក​ជា​ក្តីបារម្ភ​ដល់​ថ្នាក់ដឹកនាំក្នុង​ប្រទេសអូស្រា្តលី


រូបភាព​ឯកសារ៖ រដ្ឋ​មន្រ្តី​អូស្រ្តាលីអ្នកស្រី Gladys Berejiklian ថ្លែង​នៅក្នុងកិច្ច​ប្រជុំ​​សមាគមអភិបាលជាតិ​ឆ្នាំ​២០១៨កាល​ពី​ថ្ងៃទី​២៤ ខែ កុម្ភៈ ឆ្នាំ ២០១៨​ក្នុង​ទីក្រុង​វ៉ាស៊ីនតោន។
រូបភាព​ឯកសារ៖ រដ្ឋ​មន្រ្តី​អូស្រ្តាលីអ្នកស្រី Gladys Berejiklian ថ្លែង​នៅក្នុងកិច្ច​ប្រជុំ​​សមាគមអភិបាលជាតិ​ឆ្នាំ​២០១៨កាល​ពី​ថ្ងៃទី​២៤ ខែ កុម្ភៈ ឆ្នាំ ២០១៨​ក្នុង​ទីក្រុង​វ៉ាស៊ីនតោន។

រដ្ឋមន្ត្រី​ទី១ប្រចាំរដ្ឋ New South Wales ប្រទេស​អូស្រា្តលី​ចង់​កាត់បន្ថយ​ចំនួន​ជន​អន្តោប្រវេសន៍​នៅក្នុង​រដ្ឋ​ដែល​មាន​ចំនួន​ពលរដ្ឋ​រស់នៅ​ច្រើន​បំផុត​ក្នុង​ប្រទេស​អូស្រា្តលី​ដោយ​ទទូ​ចថា​រដ្ឋ​នេះ​កំពុង​ប្រឈម​នឹង​ការកើនឡើង​នៃ​ចំនួន​មនុស្ស​យ៉ាង​ច្រើន​លើសលប់។

លោកស្រី Gladys Berejiklian ដែល​ជា​រដ្ឋមន្រ្តីទី១នៃរដ្ឋ New South Wales បាន​ស្តី​បន្ទោស​រដ្ឋាភិបាល​សហព័ន្ធ​អូស្រា្តលី​ដែល​គ្មាន​សមត្ថភាព​ដោះស្រាយ​បញ្ហា​អន្តោប្រវេសន៍​បាន។

លោកស្រី Gladys Berejiklian គឺ​ជា​កូនស្រី​របស់​ជនចំណាកស្រុក​អាមរិកាំង​ប៉ុន្តែ​លោកស្រី​និយាយ​ថា​ប្រទេសអូស្តា្រលី​កំពុង​បើក​ទ្វារ​ទទួល​យក​ពួក​អ្នកតាំងទីលំនៅ​ថ្មី​ច្រើន​ពេក។ លោកស្រី​និយាយ​បន្ត​ថា ​លោកស្រី​គឺ​ជា​អ្នកគាំទ្រ​យ៉ាងខ្លាំង​ចំពោះ​វប្បធម៌​ចម្រុះ​នៅក្នុង​ប្រទេស​ដែល​ជាង​មួយភាគបួន​នៃ​ចំនួន​ប្រជាពលរដ្ឋ​គឺ​ជា​អ្នក​កើតនៅ​ក្រៅ​ប្រទេស​ប៉ុន្តែ​លោកស្រី​ក៏​បាន​បញ្ជាក់​ដែរ​ថា​ ចំនួន​ជនអន្តោប្រវេសន៍​ដែល​ធ្វើ​ដំណើរ​មក​ក្នុង​រដ្ឋ New South Wales បាន​កើនឡើង​ជាង​ពីរដង​ក្នុង​រយៈពេល​មួយ​ទសវត្សរ៍​នេះ។ លោកស្រី​ចង់​កាត់​បន្ថយ​ពាក់កណ្តាល​នៃ​ចំនួន​នេះ។

លោកស្រី​រដ្ឋមន្រ្តីទី១​បាន​ទទូច​ថា​ចំនួន​ជនអន្តោប្រវេសន៍​ដ៏​ច្រើន​លើសលប់​នេះ​បង្ក​អស្ថិរភាព​ និង​បង្ក​ឲ្យ​មាន​ភាពកកកុញ​នៅ​តាម​ផ្លូវ​មន្ទីពេទ្យ​ និង​សាលារៀននៅ​ក្នុង​រដ្ឋ ដែល​ជា​ការ​មិន​អាច​ទប់ទប់​បាន។

លោកស្រី Berejiklian​ បាន​និយាយ​ថា៖

«អ្វី​ដែល​ខ្ញុំ​បាន​និយាយ​គឺ​ថា​ យើង​ចាំ​បាច់​ត្រូវ​កាត់បន្ថយ​ចំនួន​ជនចំណាកស្រុក។ យើង​ចាំបាច់​ត្រូវ​ពិនិត្យ​មើល​ចំនួន​នេះ។ ចំនួន​ជនចំណាកស្រុក​បាន​កើនឡើង​ពី ៤៥.០០០នាក់​កាល​ពី១០ឆ្នាំ​មុន​ទៅ ១០០.000នាក់​នា​ពេល​បច្ចុប្បន្ន។ យើង​ទទួល​យក​ជនចំណាកស្រុក​ប្រហែល១០០.០០០នាក់​ចូល​ក្នុង​រដ្ឋ New South Wales ជា​រៀងរាល់​ឆ្នាំ។ ខ្ញុំ​សើ្ន​ឲ្យ​កាត់បន្ថយ​ចំនួន​នេះ។ យើង​ត្រូវ​ការ​ខ្យល់​ដក​ដង្ហើម។ រដ្ឋ​នានា​មិន​ដែល​មាន​សិទ្ធិ​សម្រេច​អំពី​គោលនយោបាយ​ជនអន្តោប្រវេសន៍​ ឬ​ចំនួន​ពលរដ្ឋ​នៅ​ក្នុង​រដ្ឋ​ទេ។ ខ្ញុំ​គិតថា​រឿង​នេះ​ត្រូវ​កែប្រែ»។

កាល​ពី​ដើមឆ្នាំ​នេះ​ចំនួនប្រជាជន​រស់នៅ​ក្នុង​ប្រទេសអូស្រា្តលី​បាន​កើនឡើង​ដល់​២៥លាននាក់​ជា​លើក​ទីមួយ។ មាន​ការ​ខ្វែង​គំនិត​គ្នា​ក្នុង​ការជជែកដេញដោល​អំពី​បញ្ហា​នេះ។ មាន​ការលើកឡើង​ដោយសារ​តែ​ការកកស្ទះ​នៅ​តាម​ទីក្រុង​ធំៗ និង​ការ​ឡើង​ថ្លៃ​ផ្ទះ​ខ្លាំង​គេ​គួរ​កាត់បន្ថយ​ចំនួន​ជនអន្តោប្រវេសន៍។ ហើយ​ក៏​មាន​ការលើកឡើង​ដែរ​ថា​ពួក​ជនអន្តោ​ប្រវេសន៍​ជា​អ្នក​ជួយ​ឲ្យ​សេដ្ឋកិច្ចប្រទេស​លូតលាស់​ឡើង​វិញ។
ចំនួនប្រជាជន​កំពុង​កើនឡើង​ជា​មធ្យម​ម្នាក់​រៀងរាល់​៨៣វិនាទី​ម្តង។ ពួកជនចំណាក​ស្រុក​ថ្មីៗ​ភាគច្រើន​មក​ពី​ឥណ្ឌា​និង​ចិន។

ការព្យាករណ៍​ផ្លូវការ​ចុងក្រោយ​បំផុត​បង្ហាញ​ថា​ចំនួនប្រជាជន​ក្នុង​ប្រទេសអូស្រា្តលី​នឹង​កើនឡើង​ដល់​ជិត៥០លាននាក់​ក្នុង​រយៈពេល ៤០ឆ្នាំ​ខាង​មុខ​នេះ។
ផ្នែក​សំខាន់​មួយ​ផ្សេងទៀត​នៃ​គោលនយោបាយ​អន្តោប្រវេសន៍​អូស្រា្តលី​គឺ​បញ្ហា​ជនភៀស​ខ្លួន។ ជនចំណាក​ស្រុក​គ្មាន​ក្រដាស​ស្នាម​ដែល​ធ្វើដំ​ណើរ​តាម​ទូក​ត្រូវ​បាន​ឃាត់​ខ្លួន​នៅក្នុង​ជំរំ​នៅ​ភាគខាងត្បូង​មហាសមុទ្រ​ប៉ាស៊ីហ្វីក។

ជំរំ​ជនភៀសខ្លួន​ក្នុង​ប្រទេសប៉ាពូនូហ្គីណេ​ដែល​ឧបត្ថម្ភ​ដោយ​ប្រទេសអូស្ត្រាលី​បាន​បិទ​ទ្វារ​កាល​ពី​ឆ្នាំមុន ប៉ុន្តែ​ពួក​អ្នក​សុំ​សិទ្ធិជ្រកកោន​និង​ជនភៀស​ខ្លួន​កំពុង​ជាប់​នៅ​លើ​កោះ Nauru ​ដែល​ជា​កោះ​តូច​មួយ។

ពួកគេ​គ្មាន​សង្ឃឹម​ថា​នឹង​អាច​ជ្រកកោន​ក្នុង​ប្រទេស​អូស្រ្តាលី​បាន​ទេ ដោយសារ​តែ​ច្បាប់​តឹងតែង​មួយ​ដែល​រដ្ឋាភិបាល​ក្រុងកង់បេរ៉ា​ទទូច​ថា​ជា​ច្បាប់​ការពារ​ដែន​សមុទ្រ​របស់​ប្រទេស។ ទោះ​ជា​យ៉ាងណា​ក្តី​ពួកអ្នករិះគន់​បាន​លើកឡើង​ថា​ការ​ចាប់​ឃុំ​ខ្លួន​មនុស្ស​នៅ​តាម​ច្រាំង​សមុទ្រ​គឺ​ជា​អំពើ​ឃោឃៅ និង​អមនុស្សធម៌​បំផុត៕

ប្រែសម្រួលដោយ ស៊ូ ពេជ្រចិន្តា

XS
SM
MD
LG