ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

ប្រទេស​អាហ្វ្រិក​ចំនួន ៦ ទទួល​បាន​បច្ចេកវិទ្យា mRNA សម្រាប់​ផលិត​វ៉ាក់សាំង​កូវីដ


ពីឆ្វេងទៅស្តាំ៖ ប្រធានគណៈកម្មការអឺរ៉ុប អ្នកស្រី Ursula von der Leyen និងប្រមុខ អេហ្ស៊ីប អាហ្រ្វិកខាងត្បូង សេណេហ្គាល់ ក្រុមប្រឹក្សាអឺរ៉ុប បារាំង កេនយ៉ា ទុយនីស៊ី និងអង្គការសុខភាពពិភពលោក ឈរលើវេទិកាកិច្ចប្រជុំកំពូលសហភាពអឺរ៉ុបអាហ្វ្រិកនៅទីក្រុងប្រ៊ុចសែល ថ្ងៃទី១៨ ខែកុម្ភៈ ឆ្នាំ ២០២២។

ប្រទេស​អេហ្ស៊ីប កេនយ៉ា នីហ្សេរីយ៉ា សេណេហ្គាល់ អាហ្វ្រិក​ខាង​ត្បូង និង​ទុយនីស៊ី គឺ​ជា​ប្រទេស​អាហ្វ្រិក​ដំបូង​បង្អស់​ដែល​នឹង​ទទួល​បាន​បច្ចេកវិទ្យា​ចាំបាច់​សម្រាប់​ផលិត​វ៉ាក់សាំង mRNA ពី​អង្គការ​សុខភាព​ពិភពលោក។

វ៉ាក់សាំង​ពីរ​ដែល​ប្រើប្រាស់​សម្រាប់​បង្ការ​ជំងឺ​កូវីដ១៩ គឺ​ជា​វ៉ាក់សាំង mRNA។

អគ្គនាយក​អង្គការ​សុខភាព​ពិភពលោក លោក Tedros Adhanom Ghebreyesus បាន​ប្រកាស​អំពី​អំណោយ​នេះ​កាល​ពី​ថ្ងៃ​សុក្រ នៅ​ក្នុង​រដ្ឋធានី​ប៊្រុចសែល ប្រទេស​ប៊ែលហ្ស៊ិក ក្នុង​កិច្ចប្រជុំ​កំពូល​សហភាព​អឺរ៉ុប-សហភាព​អាហ្វ្រិក។

លោក Tedros ​បាន​ថ្លែង​ថា៖ «គ្មាន​ហេតុការណ៍​ណា​ដូច​ការ​រាតត្បាត​ជា​សាកល​នៃ​ជំងឺ​កូវីដ១៩​ទេ ដែល​បាន​បង្ហាញ​ថា ការ​ពឹងផ្អែក​លើ​ក្រុមហ៊ុន​មួយ​ចំនួន​ដើម្បី​ផ្គត់ផ្គង់​ទំនិញ​សាធារណៈ​ជា​សាកល​នាំឲ្យមាន​កម្រិត និង​មានគ្រោះថ្នាក់។ ​

លោក Tedros ​បាន​ថ្លែង​ទៀត​ថា៖ «ក្នុង​រយៈពេល​មធ្យម​ទៅ​រយៈពេល​វែង មធ្យោបាយ​ល្អ​បំផុត​ដើម្បី​ដោះស្រាយ​បញ្ហា​សុខភាព​ជាបន្ទាន់​ និង​ដើម្បី​ឲ្យ​បាន​ទូទាំង​ពិភពលោក​ គឺ​ត្រូវ​បង្កើន​យ៉ាង​ខ្លាំង​នូវ​សមត្ថភាព​នៃ​រាល់​តំបន់​ទាំងអស់​ក្នុង​ការ​ផលិត​ផលិតផល​សុខភាព​ដែល​ពួកគេ​ត្រូវការ ជាមួយ​នឹង​ការ​ទទួល​បាន​ដោយ​សមធម៌​នៅក្នុង​ប្រទេស​របស់​ពួកគេ»។​ ​

ប្រជាជន​ជាង ៨០% នៅ​ទ្វីប​អាហ្វ្រិក​នៅ​មិន​ទាន់​ទទួល​បាន​វ៉ាក់សាំង​កូវីដ១៩​ដូស​ទី​មួយ​នៅ​ឡើយ​ទេ។

លោក Tedros បាន​មាន​ប្រសាសន៍​ថា៖ «ភាគច្រើន​នៃ​វិសមភាព​នេះ​កើតឡើង​ដោយសារ​ នៅ​ទូទាំង​ពិភពលោក ការ​ផលិត​វ៉ាក់សាំង​ត្រូវ​បាន​ធ្វើ​ឡើង​យ៉ាងច្រើនតែ​នៅតាម​បណ្ដា​ប្រទេស​ដែល​មាន​ប្រាក់​ចំណូល​ខ្ពស់​មួយ​ចំនួន​តែ​ប៉ុណ្ណោះ»។

ស្រប​ពេល​ជាមួយ​គ្នា​នេះ​ដែរ កាសែត The Washington Post បាន​រាយការណ៍​ថា ខ្លួន​ទទួល​បាន​ឯកសារ​មួយ ដែល​និយាយ​ថា រដ្ឋបាល​របស់​ប្រធានាធិបតី​សហរដ្ឋ​អាមេរិក លោក Joe Biden នឹង​បង្កើន​ថវិកា ជាង ២៥០ លាន​ដុល្លារ​សម្រាប់​ឲ្យ​ប្រទេស​អាហ្វ្រិក​ចំនួន ១១ ក្នុង​យុទ្ធនាការចែកចាយ​វ៉ាក់សាំង​បង្ការ​ជំងឺ​កូវីដ១៩៕

XS
SM
MD
LG