ស្របពេលដែលប្រធានាធិបតីសហរដ្ឋអាមេរិកលោក Donald Trump រៀបចំដំណើរទស្សនកិច្ចរយៈពេល ១០ ថ្ងៃ ទៅកាន់ទ្វីបអាស៊ី ដែលជាដំណើរទស្សនកិច្ចដំបូងបង្អស់របស់លោកទៅកាន់ទ្វីបនេះតាំងពីលោកកាន់តំណែងជាប្រធានាធិបតីមក មេដឹកនាំប្រទេសសិង្ហបុរីលោក Lee Hsien Loong បានបញ្ជាក់នូវការស្វែងយល់មួយចំនួនដែលរដ្ឋាភិបាលប្រទេសផ្សេងអាចយល់ឃើញដូចគ្នានេះដែរនៅក្នុងរដ្ឋធានីវ៉ាស៊ីនតោន កាលពីសប្ដាហ៍មុន។
នាយករដ្ឋមន្ត្រីសិង្ហបុរីលោក Lee Hsien Loong ដែលជាកូនទីមួយរបស់លោក Lee Kuan Yew ដែលជានាយករដ្ឋមន្ត្រីដំបូងបង្អស់របស់ប្រទេសសិង្ហបុរី បានប្រាប់ទស្សនិកជនទូទៅនៅឯវិមានរដ្ឋសភាសហរដ្ឋអាមេរិកថា ទិដ្ឋភាពភូមិសាស្ត្រជាយុទ្ធសាស្ត្រនៃតំបន់អាស៊ីប៉ាស៊ីហ្វិកដែលកំពុងតែលេចឡើង ពឹងផ្អែកមិនត្រឹមតែលើកម្លាំង ជំរុញក្នុងតំបន់ប៉ុណ្ណោះទេ ប៉ុន្តែថែមទាំងលើគោលបំណង និងសកម្មភាពរបស់សហរដ្ឋអាមេរិកផងដែរ។
នៅឯសេតវិមាន លោក Lee Hsien Loong បានប្រាប់លោក Donald Trump ថា ប្រទេសសិង្ហបុរី «ក៏ដូចជាប្រទេសដទៃទៀតដែរ» តាមដានទំនាក់ទំនងរវាងសហរដ្ឋអាមេរិក និងចិន «យ៉ាងហ្មត់ចត់»។
លោក Lee Hsieng Loong ដែលកាន់តំណែងជានាយករដ្ឋមន្ត្រីសិង្ហបុរីតាំងពីឆ្នាំ ២០០៤ មក បានលើកឡើងពីការប្រកួតប្រជែងភូមិសាស្ត្រនយោបាយរវាងសហរដ្ឋអាមេរិក និងចិន នៅពេលលោកថ្លែងទៅកាន់អង្គការក្រុមប្រឹក្សាទំនាក់ទំនងកិច្ចការបរទេស (Council on Foreign Relations)។
លោកបានសង្កត់ធ្ងន់ពីសារៈសំខាន់នៃការរក្សាវត្តមានបែបយុទ្ធសាស្ត្ររបស់សហរដ្ឋអាមេរិកនៅក្នុងតំបន់អាស៊ីប៉ាស៊ីហ្វិក ដោយបាននិយាយយ៉ាងដូច្នេះថា៖ «ប្រសិនបើសហរដ្ឋអាមេរិកមិនមានវត្តមាននៅតំបន់អាស៊ីប៉ាស៊ីហ្វិក ហើយប្រទេសផ្សេងៗនៅលើពិភពលោកដែលចង់ចងសម្ព័ន្ធភាពជាមួយនឹងសហរដ្ឋអាមេរិក និងចិន គឺគេប្រាកដជាចាប់ផ្ដើមជាមួយនឹងចិនហើយ ដោយសារតែចិនគឺត្រៀមខ្លួនរួចជាស្រេចលើរឿងហ្នឹង»៕
