រដ្ឋមន្ត្រីការពារជាតិសិង្ហបុរីបានជំរុញឱ្យប្រទេសចិនដែលជាមហាអំណាចនៅក្នុងតំបន់អាស៊ីដឹកនាំក្នុងការកាត់បន្ថយការតានតឹងនៅក្នុងតំបន់ដោយបានព្រមានថាជម្លោះយោធាណាមួយដូចជានៅក្នុងប្រទេសអ៊ុយក្រែនឬសង្គ្រាមរវាងអ៊ីស្រាអែលនិងក្រុមហាម៉ាស់នឹងក្លាយជាមហន្តរាយចំពោះទ្វីបអាស៊ីនិងអនាគតរបស់ទ្វីបនេះ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ថ្លែងនៅថ្ងៃអង្គារនេះនៅថ្ងៃទី៣និងជាថ្ងៃបញ្ចប់នៃសន្និសីទការពារជាតិប្រចាំឆ្នាំដែលរៀបចំឡើងដោយប្រទេសចិន លោក Ng Eng Hen បានបញ្ជាក់ពីសារៈសំខាន់នៃការទាក់ទងរវាងយោធានិងយោធាដើម្បីគ្រប់គ្រងវិបត្តិនេះ ដោយលោកសង្ឃឹមថាសហរដ្ឋអាមេរិកនិងចិននឹងបន្តប្រើប្រាស់បណ្តាញទំនាក់ទំនងយោធាផ្ទាល់របស់ខ្លួន។
លោក Ng បាននិយាយទៀតថាសន្តិភាពមានភាពផុយស្រួយហើយមិនដែលត្រូវបានផ្តល់ឱ្យនៅទីកន្លែងណាមួយក្នុងពិភពលោកទេ។ លោកនិយាយថា៖«អ្វីដែលបានកើតឡើងនៅក្នុងតំបន់អឺរ៉ុបនិងមជ្ឈិមបូព៌ាមិនត្រូវកើតឡើងនៅទីនេះទេ។ យើងត្រូវតែធ្វើអ្វីៗទាំងអស់ដែលយើងអាចដើម្បីបញ្ចៀសជម្លោះនេះ»។
វេទិកា Xiangshan ចូលរួមដោយមន្ត្រីការពារជាតិមកពីប្រទេសនិងអង្គការរាប់សិប។ ចិនដែលកាលពីពេលថ្មីៗនេះបានដករដ្ឋមន្ត្រីការពារជាតិចេញពីតំណែងនោះត្រូវបានតំណាងដោយលោក Zhang Youxia អនុប្រធានគណៈកម្មការយោធាមជ្ឈិម។
រដ្ឋមន្ត្រីការពារជាតិរុស្ស៊ីលោក Sergei Shoigu បានប្រើវេទិកានេះដើម្បីបញ្ជាក់ពីចំណងទាក់ទងកាន់តែជ្រាលជ្រៅឡើងរបស់រុស្ស៊ីជាមួយចិននៅពេលដែលខ្លួនប្រឈមភាពឯកោពីប្រទេសលោកខាងលិចអំពីការឈ្លានពានរបស់ខ្លួនលើប្រទេសអ៊ុយក្រែន។
លោក Shoigu ត្រូវបានគេទទួលស្វាគមន៍ដោយកងកិត្តិយសយោធាមុនពេលជួបជាមួយលោក Zhang កាលពីថ្ងៃចន្ទ។ ទីភ្នាក់ងារសារព័ត៌មាន Tass របស់រុស្ស៊ីបានដកស្រង់សម្តីរបស់លោក Zhang មកចុះផ្សាយថាចិនបានប្រុងប្រៀបឆ្លើយតបជាមួយរុស្ស៊ីដល់ការគំរាមកំហែងសន្តិសុខនិងបញ្ហាប្រឈមផ្សេងៗទៀតហើយនឹង«រក្សារួមគ្នានូវតុល្យភាពនិងស្ថិរភាពយុទ្ធសាស្ត្រសាកលលោក»។
លោក Ng ដែលបានថ្លែងពីជម្លោះទឹកដីក្នុងសមុទ្រចិនខាងត្បូងនិងការគំរាមកំហែងនុយក្លែអ៊ែរពីប្រទេសកូរ៉េខាងជើងបាននិយាយថាវាជាការសំខាន់សម្រាប់ស្ថាប័នការពារប្រទេសនិងយោធាធ្វើការដើម្បីកាត់បន្ថយហានិភ័យនៃការវាយតម្លៃស្ថានការណ៍ខុស៕
