៣ឆ្នាំក្រោយប្រទេសកម្ពុជាបានរំកិលចេញពីវិបត្តិជំងឺសាកលកូវីដ១៩នោះមក នៅក្នុងក្រុងព្រះសីហនុ ការសាងសង់អគារខ្ពស់ៗជាច្រើននៅផ្អាកដំណើរការ ហើយអគារខ្លះ បានទុកចោលជាមួយគំនរសម្រាម កាន់ស្លែ ប្រែជាអគារចាស់ៗ។ ក៏ប៉ុន្តែក៏មានសំណង់អគារថ្មីៗមួយចំនួនកំពុងស្ថិតក្នុងដំណើរការសាងសង់ ឬសង់ហើយរួចរាល់ផងដែរ។
អ្នកសម្របសម្រួលរបស់សមាគមការពារសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ជាប សុធារី ប្រាប់វីអូអេក្នុងបទសម្ភាសន៍កាលពីចុងខែកក្កដាថា រដ្ឋាភិបាលគួរមានផែនការទាក់ទាញអ្នកវិនិយោគដែលមានសក្តានុពលមកបង្ហើយសំណង់អគារដែលនៅសេសសល់ ក្រោយទុកចោលជាច្រើនឆ្នាំ តាំងពីមានការឆ្លងរាតត្បាតនៃជំងឺកូវីដ១៩។
អ្នកស្រីថ្លែងថា៖ «អ្នកដែលមកជួល មកអីគាត់ហ្នឹង រត់ចោលសំណង់អគារទាំងអស់ហ្នឹងដែរ។ ហើយអភិបាលខេត្តលោកក៏ពិបាកចិត្តដែរ រាល់ថ្ងៃឃើញសំណង់អគារដែលអត់ទាន់ហើយស្អេកស្កះដុះស្លែអស់ហើយ។ ហើយលោកបានប្រកាសដែរថា សំណង់អគារទាំងអស់ហ្នឹងមើលទៅ វាធ្វើឱ្យប៉ះពាល់សោភ័ណ្ឌភាព ខេត្តព្រះសីហនុ។ យើងមើលទៅ ឃើញសំណង់អគារទាំងអស់ហ្នឹងនៅទ្រឹងនៅហ្នឹង ហើយដុះស្លែអស់ ហើយមិនមែនត្រឹមតែនៅទ្រឹងទេ អាឧបករណ៍សម្រាប់សាងសង់អគារវានៅចោលនៅហ្នឹង ហើយស្ងាត់ឈឹង អត់មានអ្នកណាធ្វើទេ។ ហើយប្រជាពលរដ្ឋខ្មែរយើងមួយចំនួនដែលគាត់ជាបុរសហ្នឹង គាត់បានការងារ ពីអាកន្លែងហ្នឹងដែរ។ ប៉ុន្តែឥឡូវសួរគាត់ថា មានការងារធ្វើទេ? ឥឡូវសេដ្ឋកិច្ចខេត្តព្រះសីហនុកំពុងធ្លាក់ចុះ លក់ដូរអីក៏អត់ដាច់ដែរ»។
លោក ជៀប ផល្លា មេកាសំណង់មួយរូបនិយាយថា៖ «អារឿងនេះ វាជារឿងមួយពិតហើយ ធម្មតាយើង អគារនីមួយៗ នៅខេត្តព្រះសីហនុយើងគឺខ្ញុំជាមេកាសំណង់ឃើញថា គាំងច្រើន ដល់ពេលអ៊ីចឹង យើងចង់ឱ្យគាត់មកធ្វើការវិនិយោគដើម្បីឱ្យកម្មករខ្មែរយើងគាត់មានការងារធ្វើឡើងវិញ។ សព្វថ្ងៃយើងមើល សូម្បីតែកូនចៅខ្ញុំរាល់ថ្ងៃហ្នឹងក៏សល់ច្រើននាក់ ដាច់គាត់អត់មានការងារធ្វើ»។
នៅតាមបណ្តោយឆ្នេរអូឈើទាល សំណង់អគារមួយចំនួនត្រូវគេទុកទំនេរចោល ប៉ុន្តែក៏គេឃើញមានអគារថ្មីៗដែលកំពុងស្ថិតនៅក្នុងដំណើរការសាងសង់។
អភិបាលរងខេត្តព្រះសីហនុលោក ឡុង ឌីម៉ង់ ថា រដ្ឋាភិបាលមានផែនការជាក់លាក់សម្រាប់ទាក់ទាញអ្នកវិនិយោគឱ្យមកបញ្ចប់ការសាងសង់អគារដែលទុកចោលនោះ។
លោកថ្លែងថា៖ «អគារវិនិយោគជាប់គាំងទាំងអស់នៅក្នុងខេត្តព្រះសីហនុ យើងអាចនិយាយបានថា កើតឡើងដោយសារការបាត់បង់ទីផ្សារ ពីព្រោះកាលពីពេលដែលកន្លងមក ទីផ្សារសម្រាប់អ្នកវិនិយោគ គឺការវិនិយោគ ការអភិវឌ្ឍអីផ្សេងៗ ដែលពាក់ព័ន្ធទៅនឹងវិស័យកាស៊ីណូ និងអនឡាញ។ ដល់ពេលយើងបិទអនឡាញ វាធ្វើឱ្យមួយផ្នែកធំនោះ ធ្វើឱ្យវាគាំង វាផ្អាកដំណើរការបាត់ទៅហើយ»។
លោកបន្ថែមថា៖ «ប្រភពមូលនិធិដើម្បីយកមកវិនិយោគហ្នឹង ត្រូវបានកាត់បន្ថយដោយសារយើងបិទអនឡាញ។ យើងត្រូវទទួលស្គាល់រឿងហ្នឹង។ ចប់បិទអនឡាញភ្លាម យើងមានកូវីដ អាអស់ហ្នឹងហើយដែលធ្វើឱ្យវាបាត់ទីផ្សារ។ បាត់ទីផ្សារបានវានៅសល់អគារជាប់គាំទាំងអស់ហ្នឹង។ អ៊ីចឹង ធ្វើម៉េចយើងដោះស្រាយបញ្ហាហ្នឹង ទាល់តែយើងបង្កើតផ្សារឡើងវិញ មិនអ៊ីចឹង។ អ៊ីចឹងបង្កើតទីផ្សារឡើងវិញ ខ្ញុំនិយាយមិញហើយ។ Master plan [ផែនការមេ] អភិវឌ្ឍខេត្តទៅជាតំបន់សេដ្ឋកិច្ចពិសេសពហុបំណងនេះ។ ការដោះស្រាយនោះគឺរាជរដ្ឋាភិបាលបានត្រៀមជា គេហៅកញ្ចប់លើកទឹកចិត្តនេះ package incentive នេះ គឺវាជាកញ្ចប់មួយដែលយើងមានទាំងកញ្ចប់ផ្នែកពន្ធ tax incentive ហើយ non-tax incentive កញ្ចប់ដែលមិនពន្ធ។ ការសម្រួលក្នុងការបញ្ចេញច្បាប់សាងសង់ ការត្រួតពិនិត្យគុណភាពសំណង់ដូចគ្នានឹងដែរ មានទាំងការសម្របសម្រួលក្រៅប្រព័ន្ធតុលាការ ពីព្រោះភាគច្រើនវាមាន វិវាទរវាងម្ចាស់ដី ហើយនិងអ្នកសាងសង់ អ្នកវិនិយោគ»។
ទេសចរក្នុងស្រុកមួយចំនួនក៏ចង់ឃើញ ការបញ្ចប់ការសាងសង់អគារដែលទុកចោលផងដែរ គឺទី១ដើម្បីបង្កើតការងារ និងទី២ដើម្បីលើកសោភ័ណ្ឌភាពទីក្រុងរបស់ខេត្តទេសចរណ៍ជាប់មាត់សមុទ្រនេះ។
លោក គ្រី អ៊ាន អ្នកមកលេងខេត្តព្រះសីហនុថ្លែងថា៖ «ខ្ញុំអត់សូវដឹងរឿងអគារ ក្រែងលោក គឺទើបធ្វើអត់ទាន់ហើយដឹង។ គ្រាន់តែថា បើបានហើយទាំងអស់ក៏ស្អាតទៅណ៎ា!«។
អ្នកស្រី អិន ធានី អ្នកមកលេងខេត្តព្រះសីហនុមួយរូបទៀតថ្លែងថា៖ «ក្នុងករណីថា ពួកគាត់សុំឱ្យមកហ្នឹងបន្តការអភិវឌ្ឍអគារណាដែលអត់ទាន់ផុតខ្ពស់ចឹង ឱ្យគេធ្វើឡើងវិញឱ្យស្អាត ហើយឱ្យគាត់មកវិនិយោគទៅដើម្បីគ្រប់គ្នាយើងហ្នឹងក៏មានការងារធ្វើដែរ»។
ចំណែកលោក ឡុច សឿត ថ្លែងថា៖ «រាជរដ្ឋាភិបាលហើយអាជ្ញាធរ គួរទាក់ទងអ្នកវិនិយោគមកឡើងវិញ ព្រោះឥឡូវចេះបានគាត់មក[ទី]នេះហើយជាងមុនហើយ។កាលកូវីដហើយមិនទាន់មាន ឥឡូវចេះមកបណ្តើរៗហើយ»។
ពលករចិនជាង ២០០.០០០ នាក់បានវិលត្រឡប់ទៅស្រុកកំណើតវិញ ដោយបោះបង់ចោលអគារកាស៊ីណូនិងអគារខ្ពស់ដែលសាងសង់មិនទាន់រួចរាល់។
មន្ត្រីសិទ្ធិមនុស្សអ្នកស្រី ជាប សុធារី ថា រដ្ឋាភិបាលឈាមថ្មីរបស់គណបក្សប្រជាជនកម្ពុជាគួរបើកចិត្តទូលាយទទួលយកការរិះគន់ផ្សេងៗ ហើយនឹងរិះរកមធ្យោបាយ ឱ្យអ្នកវិនិយោគចិនចូលមកក្រុងព្រះសីហនុវិញ ដោយមានរបៀបរបប ហើយមិនបង្កបញ្ហាដូចគ្រាមុនវិបត្តិកូវីដ១៩។
អ្នកស្រីថ្លែងថា៖ «អាហ្នឹងក៏ខ្ញុំកំពុងតែព្រួយបារម្ភដែរ ខ្ញុំចង់និយាយថា ខ្ញុំអត់ចង់ឱ្យមានការវិនិយោគទុនសូមឱ្យរដ្ឋាភិបាលលោកពិចារណា។ ខ្ញុំអត់ចង់ឱ្យមានការវិនិយោគទុនទៅលើវិស័យ អាកាស៊ីណូហ្នឹងទេ ព្រោះយើងដឹងស្រាប់ហើយខ្មែរយើង ទោះបីយើងថា កាស៊ីណូហ្នឹងបើក ខ្មែរមិនមែនលេងក៏ដោយ ក៏វាជារឿងដែលខ្មែរយើង ប្រពៃណីទំនៀមទម្លាប់ខ្មែរយើង មិនបានគាំទ្រ អារឿងល្បែងស៊ីសងទេ។ ទោះបីអ្នកណាលេងក៏ដោយ។ ឥឡូវយើងមើលខេត្តព្រះសីហនុ នៅពេលដែលចិនគាត់មកកាលមុនម្ហឹកមុន ខ្ញុំចង់សួរថា បទល្មើសផ្សេងៗដែលខេត្តព្រះសីហុនអត់ធ្លាប់កើតមាន គឺកើតមានគួរឱ្យភ័យខ្លាច និងព្រួយបារម្ភ។ កាំភ្លើងបាញ់គ្នា កើតការផ្ទុះអាវុធនៅកណ្តាលទីរួមខេត្ត»។
អភិបាលរងខេត្តព្រះសីហនុ លោក ឡុង ឌីម៉ង់ ជឿលើសមត្ថភាពរបស់រដ្ឋាភិបាលជំនាន់ថ្មីក្នុងការដោះស្រាយបញ្ហាប្រឈមនានា។
លោកថ្លែងថា៖ «ខ្ញុំជឿជាក់ទៅលើការដឹកនាំរបស់រាជរដ្ឋាភិបាលថ្មី ហើយយើងបានឃើញថា អ្វីដែលជាការត្រួសត្រាយផ្លូវរបស់រាជរដ្ឋាភិបាលជិតផុតអាណត្តិនេះ គឺបានធ្វើឱ្យប្រទេសកម្ពុជាយើង ទូទាំងប្រទេសរួមទាំងខេត្តព្រះសីហនុ មានសុខសន្តិភាព មានស្ថិរភាពនយោបាយ មានសិ្ថរភាពម៉ាក្រូសេដ្ឋកិច្ច។ យើងបានរៀបចំខេត្តរបស់យើងបានល្អ ក្រោយពីពេលយើងឃើញពីភាពអសកម្មមួយចំនួនកន្លងមក។ ឥឡូវនេះ ខ្ញុំគ្រប់គ្រងបញ្ហាសន្តិសុខ និងសិ្ថរភាពបានយ៉ាងល្អ ណែនពេញដៃហ្មង»។
គួររំឭកថា កាលពី ៥ ឆ្នាំមុន វិនិយោគិនចិនបានចាប់ផ្តើមប្រែផ្លាស់ក្រុងព្រះសីហនុដែលមានភាពស្ងប់ស្ងាត់ឱ្យទៅជាតំបន់កាស៊ីណូដ៏ទាក់ទាញមួយប្រជែងនឹងក្រុងម៉ាកាវរបស់ចិននិងក្រុង Las Vegas របស់សហរដ្ឋអាមេរិក ប៉ុន្តែការព្យាយាមប្រែផ្លាស់នេះបានបញ្ចប់ដោយសារការដាក់បម្រាមលើល្បែងអនឡាញនិងវិបត្តិជំងឺកូវីដ១៩៕
