ភាគហ៊ុននៅក្នុងប្រទេសចិនបានឡើងចុះយ៉ាងខ្លាំង ក៏ប៉ុន្តែបានបញ្ចប់ដោយការឡើងថ្លៃបន្តិចនៅថ្ងៃពុធនេះ នៅពេលដែលក្រុមអ្នកវិនិយោគទុនងឿយឆ្ងល់យ៉ាងខ្លាំងថា តើរដ្ឋាភិបាលនឹងបន្តការខំប្រឹងប្រែងរបស់ខ្លួនដើម្បីធ្វើឲ្យភាគហ៊ុនឡើងថ្លៃវិញដែរឬទេ។
ភាគហ៊ុនទីក្រុងសៀងហៃ បានធ្លាក់តម្លៃ៥ភាគរយនៅក្នុងការលក់ដូរពេលព្រឹកមុនពេលរើបឡើងវិញ១,៦១ ភាគរយនៅពេលបញ្ចប់ការលក់ដូរនៅថ្ងៃនេះ។
ភាគហ៊ុនក្រុងសៀងហៃបានធ្លាក់តម្លៃជាង៦ភាគរយកាលពីថ្ងៃអង្គារម្សិលមិញ។ វាជាការធ្លាក់ចុះតម្លៃយ៉ាងខ្លាំងបំផុតចាប់តាំងពីចុងខែកក្កដាមក នៅពេលរដ្ឋាភិបាលបានធ្វើការលក់ចេញភាគយ៉ាងច្រើនដើម្បីទ្រទ្រង់ទីផ្សារ។
នៅទីកន្លែងផ្សេងទៀតក្នុងតំបន់អាស៊ីភាគហ៊ុនមានភាពចម្រុះ។ ផ្សារភាគហ៊ុនទីក្រុងតូក្យូបានធ្លាក់ចុះតម្លៃប្រហែល ១,៦ភាគរយ បន្ទាប់ពីរដ្ឋាភិបាលបានរាយការណ៍ពីតួលេខនៃការនាំចេញទំនិញទៅក្រៅប្រទេសមិនល្អ។ ការលក់ដូភាគហ៊ុនបានធ្លាក់ចុះក្នុងទីក្រុងហុងកុង និងទីក្រុងសេអ៊ូល ក៏ប៉ុន្តែបានឡើងថ្លៃនៅទីក្រុងស៊ីដនី។
ក្រុមអ្នកវិនិយោគទុនជាច្រើននៅតែមានការភ័យខ្លាចថា ចិនអាចបញ្ចប់វិធានការទ្រទ្រង់ទីផ្សាររបស់ខ្លួន ហើយក៏មានការព្រួយបារម្ភដែរថា រដ្ឋាភិបាលក្រុងប៉េកាំង អាចបញ្ចុះតម្លៃប្រាក់យាន់របស់ខ្លួនបន្តទៅទៀត។
រដ្ឋាភិបាលទីក្រុងប៉េកាំងបានបញ្ចុះតម្លៃប្រាក់យាន់កាលពីសប្តាហ៍មុនក្នុងចំណាត់ការដ៏ភ្ញាក់ផ្អើលមួយ ដែលក្នុងន័យជំរុញការនាំចេញទំនិញទៅក្រៅប្រទេសរបស់ចិន។វាក៏ជាការផ្តល់សញ្ញាមួយដែរថា សេដ្ឋកិច្ចរបស់ចិនមានភាពអាក្រក់ជាងការរំពឹងទុក។
មានការព្រួយកង្វល់ទៀតថា ប្រទេសផ្សេងៗទៀតនៅក្នុងតំបន់នឹងធ្វើការឆ្លើយតបដោយការបញ្ចុះតម្លៃរូបិយប័ណ្ណដើម្បីការពារការប្រកួតប្រជែងទីផ្សារនាំទំនិញចេញទៅក្រៅប្រទេសរបស់ខ្លួន។ នៅថ្ងៃពុធនេះ វៀតណាមបានបញ្ចុះតម្លៃប្រាក់ដុងរបស់ខ្លួន១ភាគរយ៕
