ភ្ជាប់​ទៅ​គេហទំព័រ​ទាក់ទង

ទឹក​ជំនន់​លិច​លង់​ខេត្ត​ចំនួន​៣ ​សម្លាប់​មនុស្ស​និង​បំផ្លាញ​ដំណាំ​ធ្ងន់ធ្ងរ


តាម​ការ​ព្យាករណ៍​របស់​ក្រសួង​ធនធាន​ទឹក​និង​ឧតុនិយម​ឲ្យ​ដឹង​ថា​ ប្រទេស​កម្ពុជា​នឹង​រង​ផល​ប៉ះពាល់​ដោយ​ទឹក​ជំនន់​តិច​ជាង​ឆ្នាំ​មុន​ ដែល​បាន​ប៉ះពាល់​រហូត​ដល់​១៨​ខេត្ត​​ និង​មនុស្ស​ស្លាប់​ចំនួន​២៧​នាក់។​
ភ្នំពេញ៖ ទឹក​ជំនន់​នៅ​ដើម​ឆ្នាំ​នេះ ​បាន​ធ្វើ​ឱ្យ​លិច​លង់​ខេត្តចំនួន​បី ​និងនាំ​ឱ្យ​ប៉ះពាល់​ប្រជា​ពលរដ្ឋ​រាប់ពាន់​គ្រួសារ​ និង​ដំណាំ​កសិផល​រាប់​ពាន់​ហិកតា។​ យ៉ាង​ណា​ក៏​ដោយ មន្ត្រី​ជំនាញ​អះអាង​ថា​ ផល​ប៉ះពាល់​ដោយ​សារ​ទឹក​ជំនន់​មាន​កម្រិត​ទាប​ជាង​ឆ្នាំ​មុន​នៅ​ឡើយ​ទេ។​

យ៉ាង​ហោច​ណាស់​មាន​មនុស្ស​ស្លាប់ចំនួន​៧​នាក់ ​និង​ពល​រដ្ឋ​៤៤៧​គ្រួសារ​ត្រូវ​បាន​ជម្លៀស​ទៅ​ទី​ទួល​មាន​សុវត្ថិភាព​ ដោយ​សារទឹក​ជំនន់​តាំង​ពី​ចុង​ខែ​កក្កដា។​
លោក​កែវ វី ​នាយ​ខុទ្ទកាល័យ​ និង​ជា​អនុ​ប្រធាន​នាយកដ្ឋាន​ព័ត៌មាន​នៃ​គណៈ​កម្មាធិការ​ជាតិ​គ្រប់គ្រង​គ្រោះ​មហន្ដរាយ​ឱ្យ​ដឹង​ថា ​មក​ត្រឹម​ថ្ងៃ​នេះ​មាន​ខេត្ត​ចំនួន​បី​ដែល​កំពុង​រង​ផល​ប៉ះពាល់​ខ្លាំង​ពី​ទឹក​ជំនន់​នៅ​ដើម​ឆ្នាំ​នេះ​គឺ​ខេត្ត​បន្ទាយ​មានជ័យ​ ព្រះ​វិហារ ​និង​ខេត្ត​កំពង់​ធំ​ ដោយ​សារទទួល​រង​ឥទ្ធិពល​ប្រព័ន្ធ​សម្ពាធ​ទាប ​ហើយ​បាន​បង្ក​ឲ្យ​មាន​ភ្លៀង​ធ្លាក់​ខ្លាំង។​

លោក​និយាយថា៖​ «នៅ​ខេត្ត​បន្ទាយ​មានជ័យ​ មក​ទល់​ពេល​នេះ​ យើង​មាន​ស្រុក​ប៉ះពាល់​ចំនួន​៦ ​ក្នុង​នោះ​មាន​ពលរដ្ឋ​រងគ្រោះ​២៥៩២​គ្រួសារ​ ជម្លៀស​ចេញ​២៤៦​គ្រួសារ ​ មនុស្ស​៧​នាក់​ស្លាប់ ​និង​ខូចខាត​ដំណាំ​ស្រូវនិង​ដំណាំ​កសិផល​៣០៦៤​ហិចតា ​និង​លិច​ផ្លូវ​សរុប​ប្រវែង​១៧​គីឡូ​ម៉ែត្រ»។

ចំណែក​ឯ​នៅ​ខេត្ត​ព្រះ​វិហារ​វិញ​ ទឹក​ទន្លេ​ឡើងដល់​កម្ពស់​១១,២៧​ម៉ែត្រ​ដែល​ខ្ពស់​ជាង​កម្ពស់ប្រកាស​អាសន្ន​០,២៧​ម៉ែត្រ ​ដោយសារ​ភ្លៀង​ធ្លាក់​ខ្លាំង​ និង​ទឹក​ហូរ​ធ្លាក់​មក​ពីជួរ​ភ្នំ​ដងរែក​ ដែល​នាំ​ឱ្យ​ជន់​លិចស្រុក​ចំនួន​៤​ ជាពិសេស​ស្រុក​ជាំក្សាន្ត​ និង​ក្រុង​ព្រះ​វិហារ ​និង​នាំ​ឱ្យ​ពលរដ្ឋ​១២៧៧​គ្រួសារ​រង​ផល​ប៉ះពាល់ ​២០១​គ្រួសារ​ត្រូវ​ជម្លៀស​ចេញ​ លិច​លង់​ផ្ទះ​ពលរដ្ឋ​១២៧​ខ្នង​ និង​ខូចខាត​ស្រូវ​និង​ដំណាំ​កសិផល​ចំនួន​១៥៧៣​ហិចតា។​

ដោយ​ឡែក ​នៅខេត្ត​កំពង់ធំ កម្ពស់​ទឹក​មិន​ទាន់​ឡើងដល់​កម្រិត​ប្រកាស​អាសន្ន​នៅ​ឡើយ​ទេ។​ ប៉ុន្តែ​ទឹក​ដែល​ធ្លាក់​មក​ពី​ខេត្ត​ព្រះ​វិហារ​នាំ​ឱ្យ​ប៉ះពាល់​ស្រុក​ចំនួន​បី ​និងនាំ​ឱ្យ​លិច​លង់​ដំណាំ​ស្រូវ​៨៥០​ហិចតា។​ នេះ​បើ​តាម​លោក​កែវ វី។​

លោក​កែវ វី​បន្ថែម​ថា​ ទឹក​ភ្លៀង​អាច​នឹង​ថយ​ចុះ​នៅ​ថ្ងៃ​ស្អែក​ ប៉ុន្តែ​ប្រសិន​បើ​ភ្លៀង​នៅ​តែ​បន្ត​ធ្លាក់​ខ្លាំង ​ផល​ប៉ះពាល់​អាច​នឹង​ធ្ងន់ធ្ងរ​ជាង​នេះ។​

លោក​និយាយថា៖​ «តាម​សេចក្តី​ជូន​ដំណឹង​របស់​ក្រសួង​ធនធាន​ទឹកឲ្យ​ដឹង​ថា​ ប្រព័ន្ធ​សម្ពាធ​ទាប​ ដែល​បង្ក​ឱ្យ​មាន​ភ្លៀង​ នឹង​អស់​នៅ​ថ្ងៃ​ស្អែក។​ ដូច្នេះ​ប្រសិន​បើ​ថ្ងៃ​ស្អែក​លែង​មាន​ភ្លៀង ​ទឹក​ហ្នឹង​នឹង​ស្រក​លឿន។​ ប៉ុន្តែ​ប្រសិន​បើ​មាន​ប្រព័ន្ធ​សម្ពាធ​ទាប​កើត​ឡើង​បន្ត​បន្ទាប់​គ្នា​ ដូចជា​កាល​ពី​ព្យុះ​ទី​១០​មក​ទី​១១​ហ្នឹង​ បរិមាណ​ទឹក​ភ្លៀង​វា​អាច​ជន់​លិច»។​ ​
លោក​ខូយ ឃុនហ៊ ​ប្រធាន​រដ្ឋបាល​សាលា​ខេត្ត​ព្រះ​វិហារ ​ថ្លែង​ថា​ មក​ត្រឹម​ថ្ងៃ​នេះ ទឹក​ភ្លៀង​មាន​ការ​ថយ​ចុះ​បន្តិច​ហើយ។​

លោក​និយាយថា៖​ «ថ្ងៃ​នេះ​ទឹក​នៅ​ហ្នឹង​១១,២៧​ម៉ែត្រ​ តាំង​ពី​ថ្ងៃ​ម្សិលមិញ​ម៉្លេះ។ ​ប៉ុន្តែ​ថ្ងៃ​នេះ​ ខ្ញុំ​ទើប​តែ​មក​ពី​ផ្នែក​ខាង​លើ ​ខាងស្រុកជាំស្សាន្តនៅ​តែ​ភ្លៀង​ មិន​ទាន់​ឈប់។ ប្រសិន​បើ​ភ្លៀង​ វា​[ទឹក​ជំនន់​នៅ​តែ]​ ឡើង​ទៀត​ ព្រោះ​នៅ​ទឹក​ស្ទឹង​នៅ​ខេត្ត​ព្រះ​វិហារ​នេះ ​វា​ជន់​ហ្នឹង​[ដោយសារ] ​ទឹក​ភ្លៀង​តែ​ម្តង»។

យ៉ាង​ណា​ក៏​ដោយ ​តាម​ការ​ព្យាករណ៍​របស់​ក្រសួង​ធនធាន​ទឹក​និង​ឧតុនិយម​ឲ្យ​ដឹង​ថា​ ប្រទេស​កម្ពុជា​នឹង​រង​ផល​ប៉ះពាល់​ដោយ​ទឹក​ជំនន់​តិច​ជាង​ឆ្នាំ​មុន​ ដែល​បាន​ប៉ះពាល់​រហូត​ដល់​១៨​ខេត្ត និង​មនុស្ស​ស្លាប់​ចំនួន​២៧​នាក់។​

លោក​ម៉ៅ ហាក់ ​ប្រធាន​នាយកដ្ឋាន​ធនធាន​ទឹក​នៃ​ក្រសួង​ធនធាន​ទឹក​និង​ឧតុនិយម​មិន​អាច​ទំនាក់​ទំនង​បាន​ទេ​នៅ​ថ្ងៃ​នេះ។​

លោក​កែវ វី​ថ្លែង​ថា​ អាជ្ញាធរ​បាន​ត្រៀម​កង​កម្លាំង​ដើម្បី​ជម្លៀស​ប្រជា​ពលរដ្ឋ ​ស្បៀង​ ពូជស្រូវ ​និង​សម្ភារៈចាំ​បាច់​មួយ​ចំនួន​ដើម្បី​ជួយ​ឧបត្ថម្ភប្រជា​ពលរដ្ឋ ​និង​ស្នើ​ឱ្យ​ប្រជា​ពលរដ្ឋ​ធ្វើ​ស្រែ​ដើម​រដូវ និង​ប្រមូល​ផល​មុន​ពេល​ទឹក​ជំនន់​មក​ដល់៕​
XS
SM
MD
LG